Read Fulfulde 1 Samuyila 4 Bible Online

1 Samuyila 4 - Fulfulde bible

1 Samuyila 4

¹Samuyila wolwani Isra'iila'en fuu wolde nde'e. Wakkati maajum Filisti'en mooɓi ngam haɓugo bee Isra'iila'en. Isra'iila'en njehi, caŋngini haa Eben-Ezer. Filisti'en boo caŋngini haa Afek.

²Filisti'en mbaɗi caffuuji muuɗum'en, haɓre wuli jaw. Ɓe njaali Isra'iila'en, ɓe mbari baakin worɓe ujine nayo haa nokkuure haɓre man.

³Nde Isra'iila'en luttuɓe ngarti nder saŋngeere, mawɓe maɓɓe mbi'i: “Ngam ɗume Jawmiraawo acci Filisti'en njaalo en hannde? Sey en ɗaɓɓa sundukru alkawal maako haa Silo. Nden kam Jawmiraawo yahdan bee meeɗen, hisnan en juuɗe konne'en men.”

⁴Ɓe neli worɓe woɗɓe haa Silo ngam haa ɓe ɗaɓɓitoya sundukru alkawal Jawmiraawo honooɓe Isra'iila, jooɗiiɗo caka keruba'en[4]. Hofni e Pinehas, ɓiɓɓe Eeli ɗofti ndu.

⁵Nde sundukru alkawal yotti saŋngeere, Isra'iila'en fuu ceyi, ɓe kooli masin haa lesdi dimmbi.

⁶Filisti'en nani hoolo man, ƴami: “Ɗume hoolo nder saŋngeere Ibraniŋke'en yiɗi wi'go?” Nde ɓe nani sundukru Jawmiraawo wari nder saŋngeere,

⁷ɓe kuli, ɓe mbi'i: “Allah wari haa maɓɓe. En majji! Bana nii meeɗaay waɗeego.

⁸En majji! Moy hisnata en juuɗe ɗowanteeɗo baawɗo bana oo? Naa kaŋko ukkani Misra'en torraaji ɗuuɗɗi nder ladde na?

⁹Tiɗɗine ɓerɗe mon, onon Filisti'en, laate on worɓe! Kaɓe ngam taa on laato maccuɓe Ibraniŋke'en, bana kamɓe ɓe laati maccuɓe mooɗon haa wargo hannde. Laate on worɓe, kaɓe!”

¹⁰Filisti'en kaɓi bee semmbe, njaali Isra'iila'en. Isra'iila'en ndoggi, koo moy haa suudu laaymaaru mum. Jaaleeki ki teddi masin, honooɓe Isra'iila'en baakin ujine cappanɗe tato (30.000) mbaraama.

¹¹Filisti'en kooci sundukru alkawal Allah. Hofni e Pinehas, ɓiɓɓe Eeli ɗiɗo go, kamɓe boo ɓe maayi.

¹²Goɗɗo lenyol Benyamin doggi nokkuure haɓre, yotti Silo nyalaade maajum. Ngam daliila mettamɓeram o seekino limce maako, o waɗino mbulwuldi dow hoore maako boo.

¹³O yotti, o tawi Eeli ɗon jooɗi dow koromwal mum, ɗon reena haa kommbi laawol, ngam ɓernde mum ɗon saklano sundukru alkawal Allah. Duuɓi maako cappanɗe joweenayi e joweetati, o bumɗo. Nde goɗɗo go nasti berniwol, saŋkiti habaru haɓre boo, yimɓe fuu kuli, ɓe ngooki. Eeli ƴami: “Ngam ɗume yimɓe ngookata?” Gadduɗo habaru yaawɗi, wari haa maako,

¹⁶wi'i mo: “Mi doggi haɓre, hannde nde'e ngarmi diga ton.” Eeli ƴami mo: “Ɓiŋngel am, noy haala men wa'i?”

¹⁷O jaabi: “Filisti'en njaali en, yimɓe men ndoggi, ɗuuɗɓe maayi. Ɓiɓɓe ma ɗiɗo, kamɓe boo ɓe maayi. Sundukru Allah boo, Filisti'en kooci ndu.”

¹⁸Nde o wolwi haala sundukru, Eeli do'iri ɓaawo dow koromwal mum haa dammugal suudu seniindu. Ngam o ndottiijo, loorɗo, daande maako yewi. O laatino alkaaliijo Isra'iila duuɓi cappanɗe nayi.

¹⁹Esiraawo maako, debbo Pinehas o reeduujo ɓadiiɗo ɓesnugo. Nde o nani Filisti'en kooci sundukru Allah, esiiko e goriiko boo maayi, luuwe naŋngi mo, o turi, nden o danyi.

²⁰Nde o ɗon maaya, rewɓe walluɓe mo mbi'i: “Tiɗɗin ɓernde ma, a danyi ɓiɗɗo gorko.” Ammaa o jaabaaki, o sali de'itineego.

²¹O numi haala sundukru, non boo maayde esiiko e goriiko, o wi'i: “Sundukru Allah majji. Tedduŋgal maako wurtake Isra'iila.” Ngam maajum o inndi ɓiɗɗo maako Ikabood[5].