Read Fulfulde 1 Samuyila 5 Bible Online

1 Samuyila 5 - Fulfulde bible

1 Samuyila 5

¹Filisti'en kooci sundukru Allah. Nden ɓe njahri ndu diga Eben-Ezer haa Asdod,

²ɓe nastini ndu nder suudu lawru maɓɓe Daagon, ɓe njo'ini ndu kommbi maaru.

³Fajiri cub yimɓe Asdod ngari, tawi suura Daagon do'ake haa lesdi, ɗon waali dow yeeso mum, yeeso sundukru Jawmiraawo. Ɓe ndartini nga haa nokkuure maaga.

⁴Jaŋngo maajum fajiri cub boo, ɓe tawi suura Daagon do'ake haa lesdi, ɗon waali dow yeeso mum, yeeso sundukru Jawmiraawo. Hoore maaga e juuɗe maaga ɗiɗi ta'aama, ɗon mbaali haa les dammugal, ɓanndu maaga tan lutti.

⁵Ngam maajum liman'en Daagon e nastooɓe suudu Daagon fuu njaaɓataa les dammugal suudu man haa wargo hannde.

⁶Jawmiraawo tikkani yimɓe Asdod. Asdod e gure maagol fuu, Jawmiraawo sarri ɗum, hiiti ɗum bee ɓuule naawɗe.

⁷Nde ɓe ngi'i ko laati, ɓe mbi'i: “Ɗowanteeɗo Isra'iila'en ɗon hiito en bee caatal, enen bee ɗowanteeɗo men Daagon fuu. Taa en njogo sundukru maako haa ɗo.”

⁸Ɓe neldi ewnaandu, ɓe mooɓti laamiiɓe Filisti'en fuu, ɓe ƴami: “Ɗume min mbaɗata bee sundukru ɗowanteeɗo Isra'iila'en?” Laamiiɓe njaabi: “Njahre ndu haa Gaat.” Ɓe njahri ndu ton.

⁹Ammaa nde ndu yotti haa Gaat, Jawmiraawo tikkani berniwol man boo, saklere mawnde waɗi. O nyawni yimɓe ton, mawɓe e ɓikkoy fuu, ɓuule peeri haa maɓɓe.

¹⁰Ngam maajum ɓe neldi sundukru Allah haa Ekuruun. Nde ndu yotti Ekuruun, yimɓe wonɓe ton ngooki. Ɓe mbi'i: “Ɓe ngaddi sundukru ɗowanteeɗo Isra'iila'en haa meeɗen, ngam haa ndu mbara en.”

¹¹Kamɓe boo ɓe neldi ewnaandu, ɓe mooɓti laamiiɓe Filisti'en fuu, ɓe mbi'i ɓe: “Lorne sundukru ɗowanteeɗo Isra'iila'en haa nokkuure maaru, ngam taa ndu mbara min, minin e yimɓe amin fuu.” Kultoreeŋgol maayde ukkani berniwol maɓɓe, ngam Jawmiraawo hiiti ɓe bee caatal.

¹²Koo nde yimɓe ɓe maayaay boo, ɓe nyawi nyawu ɓuule, gookaali maɓɓe njotti haa asama.