Read Fulfulde 1 Samuyila 9 Bible Online

1 Samuyila 9 - Fulfulde bible

1 Samuyila 9

¹Woodino goɗɗo mo lenyol Benyamin. Innde maako Kis ɓii Abiyel ɓii Ceror ɓii Bekorat ɓii Afiyaha, o camɗinaaɗo.

²O woodi ɓiɗɗo gorko mo innde mum Sawulu. Kaŋko o suka booɗɗo, walaa gorko nder Isra'iila ɓuri mo wooɗugo. O juutɗo, hoore maako towti dow yimɓe fuu.

³Nyannde feere bamɗe Kis debbe majji. O wi'i Sawulu, ɓiyiiko: “Hoo'u gooto nder suka'en men, njehe, ɗaɓɓite bamɗe.”

⁴Ɓe njehi, ɓe ta'i nder kooseeje Efrayim e nder lesdi Salisa, ammaa ɓe keɓtaay ɗe. Ɓe ta'i nder lesdi Sa'aliima, ammaa ɗe ngalaa ton. Ɓe ta'i nder lesdi Yemini, walaa koo ɗume.

⁵Nde ɓe njotti lesdi Cuuf, Sawulu wi'i suka gonduɗo bee muuɗum: “Ndikka en loro, ngam taa baaba am ɓura saklanaago en dow bamɗe.”

⁶Ammaa suka jaabi mo: “Woodi goɗɗo Allah nder berniwol ngo'ol. O anndaaɗo, ko o wi'ata fuu ɗum waɗoto fakat. En njaha haa maako, teema o anndinan en toy en keɓtata ɗe.”

⁷Sawulu wi'i: “To en njehi kam, ɗume en ndokkata mo? Nyaamdu haa boorooji men jinni, caahu feere boo walaa.”

⁸Suka jaabi: “Ndaa, mi woodi suleyre cardi. Kayre ndokkanmi goɗɗo Allah, haa o anndina en laawol man.”

⁹Sawulu wi'i: “Booɗɗum, njemme kadi.” Ɓe njehi haa berniwol ngol goɗɗo Allah woni e mum. Nde ɓe ɗon mba'o wa'orde berniwol, ɓe potti bee faanyɓe rewɓe wurtiiɓe ngam nyeɗugo ndiyam. Ɓe ƴami faanyɓe man: “Gi'oowo ɗon haa berniwol na?” Zamanuuru maajum, to goɗɗo Isra'iilaajo yiɗi ƴamugo muuyo Allah, o wi'a: “Ngare, en njaha haa gi'oowo.” Ngam mo ɓe mbi'ata hannde annabiijo wi'eteno ɓooyma gi'oowo.

¹²Faanyɓe njaabi ɓe: “Ooho, ɗon. Hannde nde'e o wari, ngam yimɓe ɗon lii'a kirseteeɗi dow towndiire. Ammaa njaawɗe

¹³haa on tawa mo hiddeko o wa'o ton ngam haa o nyaamda bee yimɓe. Yimɓe ewnaaɓe puɗɗataa nyaamugo, sey to o wari. Ngam kaŋko barkiɗinta kirseteeŋga, ɓaawoɗon ɓe nyaama. Njaawɗe haa on tawoya mo.”

¹⁴Sawulu e suka go tokki laawol muuɗum'en yahugo berniwol. Nde ɓe ɗon nasta ngol, ɓe ngi'i Samuyila ɗon wurto yeeso maɓɓe ngam yahugo towndiire.

¹⁵Keenya man Jawmiraawo wi'no Samuyila:

¹⁶“Jaŋngo bana saa'iire nde'e nelanmi goɗɗo lenyol Benyamin haa maaɗa. Sey a moyta mo haa o laato ardiiɗo yimɓe am Isra'iila'en, o hisna ɓe juuɗe Filisti'en. Mi yi'i, mi nani bojji yimɓe am, mi wallan ɓe.”

¹⁷Nde Samuyila yi'i Sawulu, Jawmiraawo wi'i mo: “Kaŋko woni gorko mo mbolwanmaami e muuɗum. Kaŋko laamanto yimɓe am.”

¹⁸Haa dammugal berniwol, Sawulu ɓaditi Samuyila, ƴami mo: “Useni, toy saare gi'oowo?”

¹⁹Samuyila jaabi mo: “Min woni gi'oowo. Ardeeɗam wa'aago haa towndiire, ngam on nyaamdan bee am hannde. Jaŋngo fajiri mi jaaboto ƴamɗe ma fuu, nden mi jaɓɓito ma.

²⁰Taa saklana bamɗe majjirɗe ma diga nyalɗe tati, ɓe keɓti ɗe. Ammaa moy ɓerɗe Isra'iila'en fuu ɗaɓɓata? Naa ɗum an na, an e saare baaba ma?”

²¹Sawulu wi'i: “Asee! Mi goɗɗo lenyol Benyamin. Lenyol man ɓuri le'i Isra'iila fuu famɗugo. Kadiboo saare am ɓuri ci'e Benyamin fuu famɗugo. Ngam ɗume a wolwani yam irin bolle ɗe'e?”

²²Samuyila yahri Sawulu e suka mum haa nokkuure seniinde, nastini ɓe suudu ton, hokki ɓe joole tedduɗe caka ewnaaɓe. Woodi ton baakin worɓe cappanɗe tato.

²³Samuyila umri defoowo: “Waddu geɗal ngal mi hokkuno ma ngam haa a siga go.”

²⁴Defoowo waddi daŋngo, wallini ngo yeeso Sawulu. Samuyila wi'i: “Ndaa ko ɓe cigani ma, nyaam ɗum ngam haa ɓe mbi'a an ewni ɓe haa juulde kirseteeɗi nde'e.” Nden Sawulu nyaamdi bee Samuyila nyalaade man.

²⁵Samuyila diirtodi bee Sawulu haa berniwol, wolidi bee maako dow soorowol.

²⁶Fajiri cub jaŋngo maajum nde weeti, Samuyila ewni Sawulu gonɗo dow soorowol: “Umma, haa mi ɗofte seɗɗa.” Sawulu ummi, nden ɓe ngurti haa laawol, kaŋko e Samuyila.

²⁷Nde ɓe njotti keerol berniwol, Samuyila wi'i Sawulu: “Wi' suka ma ardo yeeso. Ammaa an, dara jonta, haa mi anndine ko Allah wi'i yam.” Suka ardi yeeso.