Read Fulfulded Laataanooji 15 Bible Online

Laataanooji 15 - Fulfulded bible

Laataanooji 15

¹Ɓaawo kuuje ɗe'e, Jawmiraawo waŋgani Abraama nder koyɗol, wi'i mo: “Taa hul, Abraama, min woni wawarde[22] maaɗa, mi hokkete mbarjaari ɗuuɗndi!”

²Abraama jaabi: “Jawmiraawo Allah am, ɗume ndokkata yam? Donoowo saare am boo, ɗum Eli'ezer mo Damas, gooto caka sukaaɓe am.”

³Abraama wi'i fahin: “Ndaa, a hokkaay yam danygol. Ɗum gooto nder saare am, ronatammi.”

⁴Nden Jawmiraawo wolwani mo wolde nde'e: “Naa kaŋko ronete. Ammaa gurtotooɗo diga maaɗa ronete.”

⁵Nden o wurtini Abraama diga nder laymaaru muuɗum, wi'i ɗum: “Laar asama, lim koode to a waawan! Non danygol maaɗa laatoto.”

⁶Abraama nuɗɗini Jawmiraawo. Ngam maajum Jawmiraawo limani mo ɗum adilaaku.

⁷Allah wi'i Abraama: “Min woni Jawmiraawo, gurtinɗo ma Ur nder lesdi Kaldiya, ngam mi marne lesdi ndi ngonɗa nder maari jonta.”

⁸Abraama wi'i: “Yaa Jawmiraawo Allah, noy anndiranmi mi maran ndi?”

⁹O jaabi mo: “Waddanam wiige nge duuɓi tati e mbeewa nga duuɓi tati e njawdiri mbaaldiri ndi duuɓi tati e poola masar e poolel.”

¹⁰Abraama waddi ɗum fuu. O ta'i ɗum caka caka, tiitnotiri ta'e maajum. Ammaa colli kam o ta'aay.

¹¹Jigaaje ukki dow kusel, ammaa Abraama riiwi ɗe.

¹²Haa mutki naaŋge, ɗoyŋgol tedduŋgol naŋngi Abraama, kultoreeŋgol e nyiɓre ɓaleere ukkani mo.

¹³Allah wi'i Abraama: “Anndu fakat danygol maaɗa jooɗoto nder lesdi ndi ngol maraay, ngol huuwanan yimɓe maari. Ɓe njarnan ngol bone deydey duuɓi teemeɗɗe nayi.

¹⁴Ammaa ɓaawo to mi hiitake ummaatoore nde ngol huuwanta ɗum, ngol wurtiditto bee jawdi ɗuuɗndi.

¹⁵Ammaa an, a hawtoyan bee kaakiraaɓe maaɗa bee jam, a uweteeɗo ɓaawo ndottaaku mbooɗŋgu.

¹⁶Haa yidere nayaɓre, danygol maaɗa loroto haa ɗo, ngam jonta halleende Amoori'en heewtaay tawon.”

¹⁷Nde naaŋge muti, nyiɓre ɓaleere boo waɗi, ndaa, fayannde yiite suurannde e ɗemŋgal yiite, saali caka ta'e kusel go.

¹⁸Nyalaade maajum nden Jawmiraawo haɓɓi alkawal bee Abraama, o wi'i: “Mi hokkan danygol maaɗa lesdi ndi'i, diga maayo Misra haa maayo maŋngo wi'eteeŋgo Efratis,

¹⁹lesdi Keni'en e Kenizzi'en e Kadmoni'en

²⁰e Heti'en e Perezzi'en e Refa'en

²¹e Amoori'en e Kanaani'en e Girgasi'en e Yebusi'en.”