Read Fulfulded Laataanooji 16 Bible Online

Laataanooji 16 - Fulfulded bible

Laataanooji 16

¹Saray, debbo Abraama danyanaayno mo ɓiŋngel. O woodino korɗo Misraajo, innde maako Hajara.

²Saray wi'i Abraama: “Ndaa, Jawmiraawo haɗi yam danyugo. Ndikka a nasta haa korɗo am, teema mi heɓma ɓiŋngel bee maako.” Abraama jaɓi koŋngol Saray.

³Saray hoo'i korɗo mum Hajara, Misraajo, hokki mo Abraama ngam o laato culaaɗo maako. Yaake maajum ɓe ngaɗi duuɓi sappo haa lesdi Kanaana.

⁴Abraama hawti bee Hajara, Hajara reedi. Nde o yi'i o reeduujo, o yawi Saray jawmiiko.

⁵Saray wi'i Abraama: “Kuudi ɗi ɓe kuuɗatammi loro dow maaɗa! Min hokki ma korɗo am, jonta nde o yi'i o reeduujo, mi laati jawaaɗo haa gite maako. Jawmiraawo hiito hakkunde am e maaɗa!”

⁶Abraama jaabi Saray: “Ndaa, korɗo maaɗa ɗon haa juŋngo ma, waɗ mo ko fottante.” Nden Saray yarni Hajara boneeji, haa o doggi, o daayotiri bee maako.

⁷Malaa'ikaajo Jawmiraawo tawi Hajara kommbi seeɓoore nder ladde hamaadaare. Seeɓoore maajum ɗon dow laawol Sura.

⁸O wi'i: “Hajara, korɗo Saray, diga toy iwɗaa e toy njahataa?” Hajara jaabi: “Mi ɗon dogga jawmam Saray.”

⁹Malaa'ikaajo Jawmiraawo wi'i mo: “Lora haa jawma, leesan mo.”

¹⁰Malaa'ikaajo Jawmiraawo wi'i mo boo: “Mi ɗuɗɗinan danygol maaɗa masin, ngol limataake ngam ɗuuɗeeŋga maagol.”

¹¹Malaa'ikaajo Jawmiraawo wi'i mo fahin: “Ndaa ma, a reeduujo, a danyan ɓiɗɗo gorko, a inndan mo Isma'iilu[23], ngam Jawmiraawo nani bone maaɗa.

¹²Ɓiɗɗo maaɗa laatoto bana wamnde ladde[24]. O honan yimɓe fuu e yimɓe fuu boo konan mo. O jooɗoto feere maako, daayiiɗum bee deerɗiraaɓe maako.”

¹³Hajara ƴami hoore mum: Mi giiɗo mo yi'i yam na? Kanjum o ewni Jawmiraawo bolwanɗo mo: “An woni Allah gi'anɗo!”

¹⁴Ngam maajum ɓulndu ndu'u, hakkunde Kaades e Beret, inndaama: Beer-Lahay-Roy, waato: “Ɓulndu Allah Geeto gi'anɗo yam.”

¹⁵Hajara danyani Abraama ɓiɗɗo gorko. Abraama inndi ɓiyum, mo Hajara danyani ɗum Isma'iilu.

¹⁶Duuɓi Abraama mbaɗi cappanɗe joweetati e joweego, saa'i Hajara danyani mo Isma'iilu (86).