Read Fulfulded Laataanooji 2 Bible Online

Laataanooji 2 - Fulfulded bible

Laataanooji 2

¹Bana nii tageeki asamanji e lesdi e ko woni nder maaji fuu timmidiri.

²Haa nyalaade joweeɗiɗawre waɗa, Allah timmini kuugal muuɗum, o siwti nyalaade joweeɗiɗawre man.

³O barkiɗini nde, o seni nde. Ngam nder maare o siwti e tagugo kuuje fuu.

⁴Kanjum woni habaru tageeki asamanji e lesdi. Saa'i Jawmiraawo Allah tagi lesdi e asamanji,

⁵walaa guuɓe dow lesdi tawon, haakooji gese boo puɗaay, ngam Allah Jawmiraawo toɓnaayno iyeende dow lesdi, saa'i maajum walaa neɗɗo tawon haa rema ndi.

⁶Ammaa ndiyam ɗonno wurto diga lesdi, ɗonno yarna ndi.

⁷Bee mbulwuldi lesdi Jawmiraawo Allah tafri neɗɗo. O fuufi poofɗe ngeendam nder kine maako, nden o laati neɗɗo geeto.

⁸Allah Jawmiraawo jubi jarne haa Adnin, heedi fuunaaŋge. O jo'ini neɗɗo mo o tagno ɗum haa ton.

⁹Nden o fuɗni leɗɗe feere feereeje booɗɗe dow lesdi, belɗe boo haa nyaamugo. Haa caka cak jarne boo, o waɗi lekki ngeendam e lekki dokkanki faamu anndugo booɗɗum e kalluɗum.

¹⁰Maayel wurti diga Adnin ngam yarnugo jarne go. Diga ton ngel sennditi, ngel laati maaje nayi.

¹¹Innde maayel aranel, Pison, kaŋgel taari lesdi Hawila fuu, haa ton kaŋŋeeri tawete.

¹²Kaŋŋeeri lesdi maajum woodi saman ɗuuɗɗo. Ɗaccere uurnde ɗon tawe ton boo, non boo hayre onikis[1].

¹³Innde maayel ɗiɗaɓel, Gihon, kaŋgel taari lesdi Kus fuu.

¹⁴Innde maayel tataɓel, Hiddekel, ngel ɗon ilda fuunaaŋge Assuura. Maayel nayaɓel woni Efratis.

¹⁵Jawmiraawo Allah hoo'i neɗɗo go, jo'ini ɗum nder jarne Adnin haa o rema ɗe, o ayna ɗe.

¹⁶Jawmiraawo Allah umri mo: “A waawan nyaamugo ɓiɓɓe leɗɗe koo ɗeye fuu nder jarne,

¹⁷ammaa taa nyaam ɓiɓɓe lekki dokkanki faamu e anndugo booɗɗum e kalluɗum. Ngam nyalaade nde nyaamata, a maayan fakat.”

¹⁸Nden Jawmiraawo Allah wi'i: “Ɗum wooɗaay haa neɗɗo wona feere mum. Mi waɗanan mo balloowo, pottananɗo mo.”

¹⁹Jawmiraawo Allah tagi dabbaaji ladde e colli fuu bee mbulwuldi lesdi. O waddi ɗi haa neɗɗo ngam o nana no neɗɗo inndinirta ɗi ngam haa ko mari yoŋki fuu mara innde nde neɗɗo inndini ɗum.

²⁰Neɗɗo inndi dabbaaji e colli e kuuje ladde fuu. Ammaa o heɓaay balloowo, pottananɗo mo.

²¹Nden Jawmiraawo Allah neldi ɗoyŋgol tedduŋgol dow maako. O hoo'i beccal neɗɗo gootal, o maɓɓi nokkuure maajum bee kusel.

²²Bee beccal nga'al Allah Jawmiraawo waɗi debbo, yahri mo haa neɗɗo.

²³Nde neɗɗo yi'i mo, o wi'i: “Jonta kam ndaa i'al diga i'e am e kusel diga kusel am. O ewneteeɗo debbo, ngam o hoo'aama diga gorko[2].”

²⁴Ngam maajum gorko accan baaba muuɗum e daada[3] muuɗum, ɗakkotiran bee debbo muuɗum. Ɓe laatoto ɓanndu wooru.

²⁵Gorko e debbo muuɗum fuu ɓe temmbuɓe, ammaa koo moy maɓɓe semtaay yeeso tanum.