Read Fulfulded Laataanooji 24 Bible Online

Laataanooji 24 - Fulfulded bible

Laataanooji 24

¹Ibrahiima naywi masin, duuɓi maako ɗuuɗi, Jawmiraawo barkiɗinno mo nder koo ɗume fuu.

²Ibrahiima wi'i suka mum, ɓurduɗo duuɓi nder saare, mo o halfini mardi maako fuu: “Wallin juŋngo ma caka dawɗe am.

³Hunanam bee Jawmiraawo, Allah mo asama e lesdi, a te'antaa ɓiɗɗo am debbo caka ɓiɓɓe Kanaani'en ɓe njooɗiimi caka muuɗum'en.

⁴Ammaa a yahan haa lesdi am, haa banndiraaɓe am, ngam a te'ana ɓiyam Isiyaaku debbo.”

⁵Suka go jaabi mo: “Teema debbo jaɓataa tokkaago yam haa lesdi ndi'i. To non kam, mi yahra ɓiɗɗo ma haa lesdi ndi ngurtiiɗaa na?”

⁶Ibrahiima wi'i mo: “Reenta yahrugo ɓiyam haa ton!

⁷Allah Jawmiraawo mo asama, gurtinɗo yam saare baaba am e lesdi yimɓe am, o hunani yam no o hokkan danygol am lesdi ndi'i. O nelan malaa'ikaajo maako yeeso ma, haa ton a te'anta ɓiɗɗo am debbo.

⁸To debbo jaɓaay tokkaago ma, a dimɗinaaɗo diga hunayeere nde'e. Ammaa a yahrataa ɓiɗɗo am haa ton!”

⁹Suka go wallini juŋngo muuɗum caka dawɗe jaagorɗo mum Ibrahiima, o hunani mo dow haala ka'a.

¹⁰Nden o hoo'i geelooɗi sappo caka geelooɗi jaagorɗo maako, o dilli. O hoo'i boo marɗum saman ko jaagorɗo mum mari haa juŋngo. O yehi Mesopotamiya[35], haa wuro Nahor.

¹¹O hofnini geelooɗi yaasi wuro, kommbi ɓulndu. Ɗum kiikiiɗe, saa'i rewɓe ngurtoto nyeɗugo ndiyam.

¹²O tori: “Yaa Jawmiraawo, Allah jaagorɗo am Ibrahiima, mi fotta bee ko ɗaɓɓanmi hannde e woonanan jaagorɗo am Ibrahiima boo.

¹³Ndaa, mi ɗon dari haa kommbi ɓulndu. Ɓiɓɓe rewɓe yimɓe wuro ngo'o ngurtoto ngam nyeɗugo ndiyam.

¹⁴To mi wi'i paanyo debbo: Wur mbulku ma haa mi yara, kaŋko boo to o wi'i: Yar, mi yarnan geelooɗi ma boo — laato mo cuɓanɗa suka ma Isiyaaku. Bana non anndiranmi a woonani jaagorɗo am.”

¹⁵Diga o timminaay wolwugo tawon, Rebekka, ɓii Betu'iila, daada Betu'iila woni Milka debbo Nahor, deerɗiraawo Ibrahiima. O wurti bee mbulku dow balawal maako.

¹⁶Ɓiɗɗo debbo oo ŋarniiɗo masin, o paanyo mo gorko meeɗaay anndugo. O jippi haa waawru, o hebbini mbulku maako, o wa'iti.

¹⁷Suka Ibrahiima go doggi, fotti bee maako, wi'i mo: “Useni! Hokkam ndiyam seɗɗa diga mbulku ma haa mi yara.”

¹⁸O jaabi: “Yar, naywa!” O yaawɗi jippingo mbulku dow juŋngo maako, ngam o yara.

¹⁹Nde o safti yarugo, paanyo wi'i: “Mi safanan geelooɗi ma boo, ɗi njara, haa ɗi ɗomɗita.”

²⁰O yaawɗi, o rufi ndiyam mbulku nder heeleewo, o doggi kadiboo, o yehi haa ɓulndu, o nyeɗi. O safani geelooɗi maako fuu.

²¹Gorko oo laari mo. O jeeɗi haa o annda to Jawmiraawo humtani mo jahaaŋgal maako malla humtanaay mo.

²²Nde geelooɗi cafti yarugo, gorko go hoo'i halagaare nde kaŋŋeeri, o waɗi boo jawe kaŋŋeeri tedduɗe ɗiɗi haa juuɗe maako.

²³O ƴami mo: “Useni wi'am, a ɓii moye? Woodi pellel nder saare baaba ma haa min mbeera na?”

²⁴O jaabi mo: “Mi ɓii Betu'iila ɓii Nahor mo debbo mum Milka danyani ɗum.”

²⁵O wi'i fahin: “Huɗo e nyaamdu ɗon ɗuuɗɗum haa amin, pellel weernugo boo ɗon.”

²⁶Gorko oo turi, sujidani Jawmiraawo.

²⁷O wi'i: “Mi yetti Jawmiraawo, Allah jaagorɗo am Ibrahiima, mo ittanaay jaagorɗo am mbooɗeeŋga mum e gooŋgaaku mum! O ɗowi yam boo dow laawol cir haa saare banndiraaɓe jaagorɗo am!”

²⁸Paanyo debbo go doggi, anndini kuuje ɗe'e fuu yimɓe wonduɓe bee daada mum ko saali.

²⁹Rebekka woodi deerɗiraawo gorko, bi'eteeɗo Laban. Laban wurti, doggi haa gorko kommbi ɓulndu go.

³⁰O yi'i halagaare haa kine e jawe haa juuɗe deerɗiiko debbo, o nani boo bolle deerɗiiko Rebekka, bi'ɗo: “Bana non gorko oo wolwani yam”, o yehi haa gorko go. Gorko oo ɗonno dari kommbi geelooɗi, gal ɓulndu.

³¹Laban wi'i: “War, an barkiɗinaaɗo Jawmiraawo! Ngam ɗume ndarotoɗa yaasi? Mi wo'ini suudu, woodi pellel ngam geelooɗi boo.”

³²Gorko go nasti saare, Laban rifti geelooɗi, o hokki ɗi huɗo e nyaamdu. O waddi ndiyam lootirɗam kosɗe ngam gorko go e worɓe wonduɓe bee maako fuu.

³³O jo'ini nyaamdu yeeso maɓɓe, ammaa kaŋko o wi'i: “Mi nyaamataa, sey to mi yecci habaru am.” Laban wi'i: “Wolwu!”

³⁴O wi'i: “Mi kuuwanoowo Ibrahiima.

³⁵Jawmiraawo barkiɗini jaagorɗo am, haa o riski masin. O hokki mo dammooji e na'i e cardi e kaŋŋeeri e maccuɓe e horɓe e geelooɗi e bamɗe.

³⁶Saraatu, debbo jaagorɗo am, nder nayeewu muuɗum, o danyani jaagorɗo am ɓiɗɗo gorko. Jaagorɗo am boo hokki ɓiyiiko mardi mum fuu.

³⁷O hunni yam, o wi'i: Taa te'an ɓiɗɗo am debbo caka ɓiɓɓe Kanaani'en ɓe njooɗiimi nder lesdi muuɗum'en.

³⁸Ammaa yah haa saare baaba am e lenyol am, ngam te'ana ɓiɗɗo am debbo.

³⁹Mi wi'i jaagorɗo am: Teema debbo oo jaɓataa tokkaago yam.

⁴⁰O jaabi yam: Jawmiraawo mo mi ɗowtani ɗum foroy, nelan malaa'ikaajo mum bee maaɗa. O humtante jahaaŋgal ma, ngam a te'ana ɓiɗɗo am debbo mo lenyol am diga saare baaba am.

⁴¹To a yottake lenyol am, a rimɗi e hunayeere nde'e. Koo to ɓe ndokkaay ma paanyo debbo boo, a rimɗi e hunayeere nde'e.

⁴²Hannde kadi mi wari haa ɓulndu ndu'u, mi wi'i: Yaa Jawmiraawo, Allah jaagorɗo am Ibrahiima, humtanam jahaaŋgal am ngal mbaɗanmi hannde.

⁴³Ndaa, mi ɗon dari haa kommbi ɓulndu. Paanyo debbo gurtotooɗo nyeɗugo, mo mi wi'ata ɗum: Useni hokkam ndiyam seɗɗa diga mbulku ma haa mi yara,

⁴⁴kaŋko boo to o wi'i yam: Yar, mi safanan geelooɗi ma boo, — laato debbo mo cuɓanɗa ɓii jaagorɗo am.

⁴⁵Diga mi timminaay wolwugo nder ɓernde am tawon, ndaa Rebekka wurti bee mbulku dow balawal muuɗum. O jippi haa waawru, o nyeɗi. Mi wi'i mo: Hokkam mi yara!

⁴⁶Law o jippini mbulku diga balawal maako, o wi'i: Yar, mi yarnan geelooɗi ma boo. Mi yari, nden o yarni geelooɗi am.

⁴⁷Mi ƴami mo: A ɓii moye? O jaabi: Mi ɓii Betu'iila ɓii Nahor bee debbo mum Milka. Nden mi waɗi halagaare haa kine maako e jawe haa juuɗe maako.

⁴⁸Mi turi, mi sujidani Jawmiraawo. Mi yetti Jawmiraawo, Allah jaagorɗo am Ibrahiima, mo ɗowi yam dow laawol pottuŋgol, haa mi hoo'ana jaagorɗo am ɓii deerɗiiko.

⁴⁹Jonta kam, to on ngiɗi waŋgingo mbooɗeeŋga e gooŋgaaku haa jaagorɗo am, anndineeɗam! To naa non, mi waylititto gal nyaamo malla nano.”

⁵⁰Laban e Betu'iila njaabi: “Min mbaawataa wi'ugo ma ooho malla aa'a, ngam haala ka'a iwi haa Jawmiraawo.

⁵¹Ndaa, Rebekka yeeso ma, hoo'u mo, yah jam, o laato debbo ɓii jaagorɗo ma bana Jawmiraawo wi'i.”

⁵²Nde suka Ibrahiima nani bolle maɓɓe, o sujidani Jawmiraawo.

⁵³Nden o wurtini kuuje: Cardi e kaŋŋeeri e limce, o hokki ɗe Rebekka. O hokki deerɗiiko e daada maako boo kuuje marɗe saman.

⁵⁴Ɓaawo maajum ɓe nyaami, ɓe njari, kaŋko e worɓe wonduɓe bee maako, nden ɓe mbaali. Fajiri, nde weeti, o wi'i: “Acceeɗam mi lorto haa jaagorɗo am.”

⁵⁵Deerɗiraawo Rebekka e daada mum mbi'i: “Accu paanyo debbo jooɗo haa amin nyalɗe seɗɗa, koo sappo, nden o dilluma.”

⁵⁶Ammaa o wi'i ɓe: “Taa neeɓnaneeɗam! Ngam Jawmiraawo humtani yam jahaaŋgal am. Acceeɗam, mi hoota haa jaagorɗo am.”

⁵⁷Ɓe mbi'i: “Ewnen ma paanyo debbo, ƴamen mo.”

⁵⁸Ɓe ewni Rebekka, ɓe ƴami mo: “A yiɗi dillididgo bee gorko oo na?” O jaabi: “Ooho.”

⁵⁹Ɓe acci Rebekka e musininnooɗo ɗum dillida bee suka Ibrahiima go e worɓe muuɗum.

⁶⁰Ɓe mbarkiɗini Rebekka bee wi'go: “An, deerɗiraawo amin, laata daada yimɓe ujineeje ɗuuɗɗe! Danygol ma mara berniiji konne'en muuɗum!”

⁶¹Nden Rebekka e horɓe muuɗum ummi, ɓe mba'i geelooɗi, ɓe tokki gorko oo. O hoo'i Rebekka, o dilli.

⁶²Isiyaaku wartino diga ɓulndu wi'eteendu Beer-Lahay-Roy[36], ngam o jooɗi haa Lesdi Fombina.

⁶³O wurti asiriire woɗnde waancoyaago nder gese. O ɓaŋgti gite, o yi'i geelooɗi ɗon ngara.

⁶⁴Rebekka boo ɓaŋgti gite muuɗum, yi'i Isiyaaku. O jippi ngeelooba,

⁶⁵o ƴami suka go: “Moy nder ngesa haa to garanɗo fottugo bee meeɗen oo?” O jaabi: “Ɗum jawmam.” Rebekka hoo'i suddaare, suddi hoore mum.

⁶⁶Suka anndini Isiyaaku kuuje ɗe o waɗno fuu.

⁶⁷Isiyaaku yahri Rebekka nder suudu daada muuɗum Saraatu. O hoo'i Rebekka, laati debbo maako, o yiɗi mo. Bana nii Isiyaaku de'itiri dow maayde daada muuɗum.