Read Fulfulded Laataanooji 27 Bible Online

Laataanooji 27 - Fulfulded bible

Laataanooji 27

¹Isiyaaku naywi, gite maako boo tampi, haa yotti o yi'ataa sam. O ewni Isuwa, afo maako, o wi'i mo: “Ɓiŋngel am.” Isuwa jaabi: “Na'am.”

²Isiyaaku wi'i: “Ndaa, mi naywi, mi anndaa nyalaade nde maayanmi.

³Kadi, hoo'u balmi ma, ɓaaru ma e lagaawal ma, yah ladde, loohanam kusel ladde.

⁴Waɗanam nyaamdu welndu, bana no ngiɗmi. Waddanam ndu, mi nyaama, ngam haa mi barkiɗine hiddeko mi maaya.”

⁵Rebekka ɗonno nana saa'i Isiyaaku wolwani ɓiyum Isuwa. Isuwa dilli ladde ngam loohaago kusel ladde, ngam waddugo ngel haa saare,

⁶Rebekka wolwani ɓiyum Yaakubu: “Ndaa, mi nani baaba ma wolwani deerɗa Isuwa ni'i:

⁷Waddanam kusel ladde, waɗanam nyaamdu welndu, mi nyaama. Mi barkiɗinte yeeso Jawmiraawo hiddeko mi maaya.

⁸Jonta kam, ɓiŋngel am, nananam e waɗ ko umranmaami:

⁹Yah haa tokkere, waddanam njawkoy mbooɗkoy ɗiɗoy. Mi defanan koy baaba ma nyaamdu welndu, bana o yiɗi ɗum.

¹⁰A yahrana ndu baaba ma, o nyaama, ngam haa o barkiɗine hiddeko o maaya.”

¹¹Yaakubu jaabi Rebekka, daada mum: “Ndaa, deerɗam Isuwa o goɗɗo ɗuuɗa-gaasaajo, ammaa min mi walaa gaasa haa ɓanndu.

¹²Teema baaba am meematam, mi laatanto mo bana jancoowo, nden mi waddanan hoore am naaloore, naa barka.”

¹³Ammaa daada maako wi'i mo: “Naaloore man wara dow hoore am, ɓiŋngel am. Nananam tan, yah waddanam!”

¹⁴Yaakubu dilli, ɗaɓɓitoyi njawkoy, waddani koy daada muuɗum. Daada maako defi nyaamdu welndu, bana no baaba maako yiɗi.

¹⁵Nden o hoo'i limce Isuwa, afo maako, ɗuuɗa-samanje gonɗe nder suudu maako, o ɓorni ɗe Yaakubu, ɓiyiiko minyiraajo.

¹⁶O ɓornani mo lare njawkoy go haa juuɗe e ɗigguɗum daande maako.

¹⁷Nden o hokki ɓiyiiko Yaakubu nyaamdu welndu ndu o defi e tamseere nde o tamsi.

¹⁸Yaakubu nasti haa baaba muuɗum, wi'i: “Baaba am!” O jaabi: “Na'am. An moy, ɓiŋngel am?”

¹⁹Yaakubu wi'i baaba muuɗum: “Ɗum min Isuwa, afo maaɗa. Mi waɗi bana a wi'i yam. Umma, jooɗa, nyaam kusel ladde ngel ngaddumi, ngam haa a barkiɗinammi.”

²⁰Isiyaaku ƴami: “Noy tawruɗaa kusel ladde man law, ɓiŋngel am?” O jaabi: “Ngam Jawmiraawo, Allah maaɗa fottini yam bee maajum.”

²¹Isiyaaku wi'i Yaakubu: “Ɓadita, ɓiŋngel am, ngam mi meeme, mi anndita fakat a ɓiyam Isuwa na malla naa non.”

²²Yaakubu ɓaditi baaba muuɗum Isiyaaku. Baaba go meemi mo, wi'i: “Sawtu kam, ɗum sawtu Yaakubu, ammaa juuɗe boo, ɗe Isuwa.”

²³O annditaay mo, ngam juuɗe maako keewi gaasa bana ɗe deerɗiiko Isuwa. O barkiɗini mo.

²⁴O ƴamti mo fahin: “A ɓiyam Isuwa fakat na?” Yaakubu jaabi: “Ɗum min!”

²⁵Isiyaaku wi'i: “Ɓadinanam kusel ladde ngel ɓiyam loohoyi haa mi nyaama, ngam haa mi barkiɗine.” Yaakubu ɓaditinani mo ɗum, o nyaami. O waddani mo inaboojam boo, o yari.

²⁶Nden Isiyaaku, baaba maako wi'i mo: “Ɓaditam, hebbam, ɓiŋngel am.”

²⁷O ɓaditi, o hebbi mo. Isiyaaku nani uureeŋga limce maako, o barkiɗini mo, o wi'i: “Uureeŋga ɓiyam ɗon bana uureeŋga ngesa ka Jawmiraawo barkiɗini.

²⁸Allah hokke saawawre asama, o rimna gese ma, alkamaari e inaboojam ma ɗuuɗa masin.

²⁹Ummaatooje kuuwane, jama'aaje boo cujida yeeso ma. Laata jaagorɗo deerɗiraaɓe ma, ɓiɓɓe daada ma cujida yeeso ma. Naaloore laatano naalanɗo ma, barka boo laatano barkiɗinanɗo ma.”

³⁰Nde Isiyaaku timmini barkiɗingo Yaakubu, neeɓaay boo Yaakubu wurti suudu baaba mum Isiyaaku, ndaa deerɗiiko Isuwa wartoyi loohaago.

³¹Kaŋko boo o defi nyaamdu welndu, o waddani ndu baaba maako. O wi'i mo: “Baaba am, umma, nyaam kusel ladde ngel ɓiya waddani ma, ngam haa a barkiɗinammi.”

³²Baaba maako Isiyaaku ƴami mo: “Moy an?” O jaabi: “Min Isuwa, ɓiɗɗo ma afo.”

³³Kultoreeŋgol maŋngol naŋngi Isiyaaku. O wi'i: “Kadi moy loohooyi kusel ladde, waddanimmi ɗum? Mi nyaami ɗum fuu hiddeko a wara. Mi barkiɗini mo e barka ka'a laatanto mo haa foroy.”

³⁴Nde Isuwa nani bolle baaba muuɗum, nder mettamɓeram, o hooli bee sawtu masin, o wi'i baaba maako: “Useni baaba am, barkiɗinam min boo!”

³⁵Isiyaaku jaabi: “Deerɗa wari bee rikici, o jaɓi barka ma.”

³⁶Isuwa wi'i: “Naa ɗum yahdi bee no ɓe inndiri mo Yaakubu[46] na? Ngam nde ɗiɗi o waɗi yam rikici. O hooci daraja afaaku am, ndaa, jonta boo o jaɓi barka am. A luttanaay yam barka na?”

³⁷Isiyaaku jaabi Isuwa: “Ndaa, mi waɗi mo jaagorɗo ma, mi hokki mo deerɗiraaɓe fuu bana huuwanooɓe mo, mi semmbiɗini mo bee alkamaari e inaboojam. Kadi ɗume mi waɗante, ɓiŋngel am?”

³⁸Isuwa wi'i baaba muuɗum: “Baaba am, barka ngoota tan marɗa na? Barkiɗinam min boo, baaba am!” Isuwa fuɗɗi woyugo bee sawtu.

³⁹Baaba maako Isiyaaku jaabi mo: “Ndaa, joonde ma daayoto bee lesdi ndimoori e saawawre asama.

⁴⁰A wuuran bee kaafahi maaɗa, a huuwanan deerɗa. Ammaa to a tuurtake, a yewan kaɓɓirgal maako dow daande ma.”

⁴¹Isuwa wanyi Yaakubu ngam daliila barka ka baaba maako barkiɗini mo. O numi: “Nyalɗe woyugo baaba am ɗon ɓadito. Saa'i man mi mbaran deerɗiraawo am Yaakubu.”

⁴²Nde Rebekka anndinaama nufaye afo mum Isuwa, o neli ewnoyaago Yaakubu, ɓiyiiko minyiraawo, o wi'i mo: “Ndaa, deerɗiraawo ma Isuwa ɗon ɗaɓɓa waataago bee mbarugo ma.

⁴³Jonta, ɓiŋngel am, nananam, umma, doggu haa deerɗiraawo am Laban, haa Haran.

⁴⁴Faɓɓu haa maako, sey to tikkere deerɗiraawo ma feewti,

⁴⁵sey to o yejjiti ko mbaɗanɗa mo. Nden mi nelan ngam ɗaɓɓitoygo ma diga ton. Ngam ɗume cooyiranmi ɓiɓɓe am ɗiɗo fuu nyalaade woore?”

⁴⁶Rebekka wi'i Isiyaaku: “Mi safti ngeendam ngam daliila ɓiɓɓe rewɓe Heti'en ɓe'e. To Yaakubu boo te'i gooto caka ɓiɓɓe lesdi ndi'i kam, ɗume yeeɗugo nafatammi fahin?”