Read Fulfulded Laataanooji 28 Bible Online

Laataanooji 28 - Fulfulded bible

Laataanooji 28

¹Isiyaaku ewni Yaakubu, barkiɗini mo. O umri mo: “Taa te'u debbo haa ɓiɓɓe rewɓe Kanaana.

²Umma, yah haa Paddan-Aram, haa saare Betu'iila, maama ma, a te'a debbo ton haa ɓiɓɓe rewɓe Laban, kaawu ma.

³Allah Baawɗo barkiɗine, o ɗuuɗɗine, ngam laatoɗa mooɓre le'i.

⁴O hokke barka Ibrahiima, an e danygol ma bee maaɗa, ngam a mara lesdi koɗamku ma ndi o hokki Ibrahiima.”

⁵Isiyaaku jaɓɓiti Yaakubu, kaŋko o yehi Paddan-Aram haa Laban ɓii Betu'iila Aramiijo, deerɗiraawo Rebekka, daada Yaakubu e Isuwa.

⁶Isuwa nani no Isiyaaku barkiɗiniri Yaakubu, jaɓɓiti mo o yaha Paddan-Aram, ngam o te'a debbo haa ton. Yaake o ɗonno barkiɗina mo, o umruɗo mo boo: “Taa te'u debbo haa ɓiɓɓe rewɓe Kanaana.”

⁷Yaakubu ɗowtani saaro'en muuɗum. Saa'i man o dilluɗo Paddan-Aram.

⁸Isuwa faami ɓiɓɓe rewɓe Kanaana pottanaay baaba muuɗum Isiyaaku,

⁹o yehi haa Isma'iilu, o te'i, dow rewɓe ɓe o mari, Mahalat deerɗiraawo Nebayot, ɓii Isma'iilu ɓii Ibrahiima.

¹⁰Yaakubu ummi Biirsaba, yehi Haran.

¹¹O yotti nokkuure woɗnde, o waali ton ngam naaŋge muti. O hoo'i woore haa kaa'e nokkuure maajum, o wafli nde. Nden o waali ton.

¹²O hoyɗi: O yi'i ɓaargal darnaaŋgal dow lesdi, hoore maagal meemi asama. Malaa'ika'en Allah ɗonno mba'oro ngal e ɗonno njippiro ngal.

¹³Jawmiraawo ɗonno dari yeeso maako, wi'i: “Min woni Jawmiraawo, Allah maama maaɗa Ibrahiima e baaba ma Isiyaaku. Lesdi ndi mbaaliiɗa dow muuɗum, mi hokkete ndi, an e danygol ma.

¹⁴Danygol ma ɗuuɗan bana njaareendi. Ngol yaajan haa hiirnaaŋge e fuunaaŋge, haa woyla e fombina. Ummaatooje duniyaaru fuu laatoto barkiɗinaaɗe ngam daliila ma e danygol ma.

¹⁵Anndu, mi ɗon wondi bee ma. Mi aynete haa njahata fuu. Mi lornete nder lesdi ndi'i, ngam mi wudintaa ma, sey to mi hiɓɓini ko mbi'maami.”

¹⁶Yaakubu fini, wi'i: “Fakat, Jawmiraawo ɗon haa nokkuure nde'e, min boo mi anndaano ɗum.”

¹⁷O hultori, o wi'i: “Nokkuure nde'e hulniinde! Suudu Allah ɗon ɗo, haa ɗo dammugal asama woni.”

¹⁸Yaakubu dawi cub, hoo'i hayre nde o wafluno go, darni nde siftinorde. Nden o rufi nebbam dow hoore maare ngam senugo nde.

¹⁹O inndi nokkuure maajum Baytila[47], ammaa naane innde berniwol ngol Luus.

²⁰Nden Yaakubu togi togayeere nde'e, wi'i: “To Allah ɗon wondi bee am, to o ayni yam dow laawol ngol njahanmi, to o hokki yam nyaamdu ngam nyaamugo e limce ngam ɓornaago,

²¹to mi loroyi jam haa saare baaba am, nden kam Jawmiraawo laatoto Allah am.

²²Hayre siftinorde nde ndarnumi nde'e, laatanto ma suudu. Haa ko ndokkata mi fuu, mi ittante zakka.”