Read Fulfulded Laataanooji 38 Bible Online

Laataanooji 38 - Fulfulded bible

Laataanooji 38

¹Saa'i maajum Yahuuda acci deerɗiraaɓe muuɗum, o yehi haa Adullam, haa bi'eteeɗo Hira.

²Yahuuda yi'i ton ɓiɗɗo debbo mo ɓii Su'a, goɗɗo Kanaaniijo. O te'i mo, o hawti bee maako.

³O reedi, o danyi ɓiɗɗo gorko, Yahuuda inndi mo Eer.

⁴O reedi kadiboo, o danyi ɓiɗɗo gorko, o inndi mo Oonan.

⁵Kadiboo o danyi ɓiɗɗo gorko, o inndi mo Sela. Yahuuda ɗonno haa Kejib, yaake debbo danya Sela.

⁶Yahuuda te'ani Eer, afo mum, debbo bi'eteeɗo Tamar.

⁷Ammaa Eer, afo Yahuuda, o kalluɗo yeeso Jawmiraawo, Jawmiraawo mbari mo.

⁸Yahuuda wi'i Oonan: “Nastu haa debbo deerɗiraawo ma, haɓɓu teegal eekiraagu bee maako, ngam a darnana deerɗa danygol.”

⁹Ammaa Oonan anndi ɗum laatataako danygol maako, ngam maajum nde o nastata haa debbo oo fuu, o ɗon acca mani maako rufa haa lesdi. Ngam o yiɗaa waɗanango deerɗiiko danygol.

¹⁰Ko o waɗi, ɗum fottanaay Jawmiraawo, Jawmiraawo mbari mo.

¹¹Yahuuda wi'i esum Tamar: “Lorta haa saare baaba ma yaake suddaare ma, haa to ɓiyam Sela mawni.” O numi boo: “Taa o maaya boo bana deerɗiraaɓe maako.” Tamar dilli, jooɗi nder saare baaba muuɗum.

¹²Ɓaawo nyalɗe ɗuuɗɗe, ɓii Su'a, debbo Yahuuda maayi. Nde Yahuuda de'iti, o yehi haa Timna, haa ta'ooɓe gaasa baali maako, kaŋko e soobaajo maako Hira Adullamjo.

¹³Tamar anndinaama: “Ndaa, esiraawo ma ɗon yaha haa Timna ngam ta'ugo gaasa baali maako.”

¹⁴Nden Tamar ɓorti limce suddaare go, o suddiri bee suddaare woɗnde, o wiirni, o jooɗi haa nastirde wuro Enayim, haa laawol Timna. Ngam o yi'i Sela mawni, ammaa o laataaki debbo maako.

¹⁵Yahuuda yi'i mo, o hoociri mo bana debbo daakaareejo, ngam o suddi yeeso maako.

¹⁶O seli laawol gal maako, o wi'i: “Accu mi nasta haa ma.” Ngam o anndaa ɗum esiiko. Tamar ƴami: “Ɗume ndokkata yam ngam a nasta haa am?”

¹⁷O jaabi: “Mi neldante jawgel mbeewa e tokkere am.” Tamar wi'i: “Sey to a hokki yam jeŋngina[69] hiddeko a nelda.”

¹⁸Yahuuda ƴami: “Jeŋngina ɗume ngiɗɗaa mi hokke?” O jaabi: “Haatummeere ma e ɓoggol ma e sawru haa juŋngo ma.” O hokki mo ɗum, o waaldi bee maako. O reedi ngam daliila maako.

¹⁹Tamar ummi, dilli, o itti suddaare go, o ɓorni limce suddaare.

²⁰Yahuuda neldiri jawgel mbeewa bee soobaajo mum Adulamjo, ngam o hoocitana mo jeŋngina maako haa juŋngo debbo go. Ammaa o tawaay mo.

²¹O ƴami yimɓe haa wuro: “Toy debbo daakaareejo mo jooɗino haa Enayim kommbi laawol?” Ɓe njaabi: “Walaa daakaareejo meeɗi taweego haa ɗo.”

²²O lori haa Yahuuda, o wi'i: “Mi tawaay mo. Yimɓe wuro boo mbi'i: Walaa daakaareejo meeɗi taweego haa ton.”

²³Yahuuda wi'i: “O jogo ko woni haa maako. Taa en toskina ko'e men. Ngam mi neli ma bee jawgel nge'el, ammaa a tawaay mo.”

²⁴Ɓaawo lebbi tati ɓe anndini Yahuuda: “Esiraawo ma Tamar laatake daakaareejo. Jonta o ɗon bee reedu.” Yahuuda wi'i: “Ngurtine mo yaasi, ngule mo.”

²⁵Nde ɓe ngurtini mo yaasi, o neli haa esiiko ɓe mbi'a mo: “Gorko marɗo kuuje ɗe'e reedni yam.” O wi'i boo: “Heɓtu moy mari haatummeere nde'e e ɓoggol ngo'ol e sawru ndu'u?”

²⁶Yahuuda annditi ɗum, o wi'i: “Adilaaku maako ɓuri ngu am, ngam mi hokkaay mo ɓiyam Sela.” O meetaay waaldugo bee maako fahin.

²⁷Saa'i ɓesnuki Tamar, ɓe paami ɗum siwtuɓe ngoni nder reedu maako.

²⁸Nde o ɗon danya, gooto wurtini juŋngo. Ɓesninoowo naŋngi ngo, haɓɓi gaarawol boɗeewol haa juŋngo maagel. O wi'i: “Kaŋko aarti wurtaago.”

²⁹Ammaa o lorniti juŋngo maako, deerɗiiko wurti. Ɓesninoowo wi'i: “Kay, an seeki laawol!” Ɓe inndi mo Peres[70].

³⁰Ɓaawo maajum deerɗiiko marɗo gaarawol boɗeewol haa juŋngo mum wurti. Ɓe inndi mo Zeraha[71].