Read Fulfulded Laataanooji 39 Bible Online

Laataanooji 39 - Fulfulded bible

Laataanooji 39

¹Ɓe njahri Yusufu haa Misra. Potifar Misraajo, saraakiijo Firawna, mawɗo doogari'en, soodi mo haa juuɗe filooɓe ɓe asŋgol Isma'iilu yahruɓe mo ton.

²Jawmiraawo wondi bee Yusufu, hokki ɗum saa'a nder kuuɗe mum fuu. O jooɗi nder saare Potifar jawmiiko Misraajo.

³Jawmiiko yi'i Jawmiraawo ɗon wondi bee maako, Jawmiraawo hokki mo saa'a nder kuuɗe maako fuu.

⁴O seyori mo, o hoosi mo ngam huuwango mo. O halfini mo ardaaŋgal saare e mardi maako fuu.

⁵Diga o halfini Yusufu saare e mardi maako, Jawmiraawo barkiɗini ko o mari fuu, waato ko woni nder saare e ko woni nder gese ngam daliila Yusufu.

⁶Potifar halfini Yusufu ko o mari fuu. O suklanaay koo ɗume, sonaa nyaamdu ndu o nyaamata. Yusufu o booɗɗo, o ŋarniiɗo.

⁷Nyalɗe seɗɗa ɓaawoɗon, debbo jawmiiko fuɗɗi laarugo mo bee suuno. O wi'i mo: “Waaldu bee am!”

⁸O sali, o wi'i debbo jawmiiko: “Ndaa, jawmam suklantaa koo ɗume nder saare mum. O halfini yam mardi maako fuu.

⁹Walaa ɓurduɗo yam maŋngu nder saare nde'e. O haɗaay yam koo ɗume, sonaa an, ngam a debbo maako. Noy mi waɗata halleende mawnde nde'e, mi waɗa hakke heedi Allah?”

¹⁰Nyalaade fuu debbo oo tokki wolwango Yusufu, ngam o waala kommbi maako, haa o hawta bee maako. Ammaa o sali waaldugo bee maako.

¹¹Nyanndere woɗnde Yusufu nasti saare haa huuwa kuugal mum. Huuwooɓe nder saare ngalaa ton.

¹²Debbo go naŋngi mo ngapaleewol, wi'i mo: “Waaldu bee am!” Yusufu acci ngapaleewol mum haa juŋngo maako, doggi, wurti yaasi.

¹³Nde debbo yi'i Yusufu accidi mo bee ngapaleewol mum, doggi yaasi,

¹⁴o ewni huuwooɓe nder saare maako, o wi'i ɓe: “Ndaare! O waddani en Ibraniŋkeejo ngam fijira en. O wari haa am haa o waalda bee am. Ammaa mi wooki bee semmbe.

¹⁵Nde o nani mi wooki, o acci ngapaleewol maako baŋnge am, o doggi, o wurti yaasi.”

¹⁶O jo'ini ngapaleewol Yusufu kommbi maako, haa nde goriiko warti saare.

¹⁷Nden o yecci mo haala ka'a bana no o wi'no, o wi'i: “Maccuɗo Ibraniŋkeejo mo a waddani min, wari haa am haa o fijirammi.

¹⁸Nde mi wooki, mi ewni go, o acci ngapaleewol maako baŋnge am, o doggi yaasi.”

¹⁹Nde jaagorɗo nani ko debbo maako wi'i mo: “Bana nii maccuɗo ma waari bee am”. — Tikkere maako saati.

²⁰O naŋngi Yusufu, o nastini mo nder fursina[72] haa nokkuure nde ɓe maɓɓata haɓɓaaɓe laamiiɗo. Yusufu jooɗi ton.

²¹Ammaa Jawmiraawo ɗon wondi bee Yusufu, o waŋginani mo mbooɗeeŋga maako, heɓni mo'ere haa mawɗo fursina.

²²O halfini haɓɓaaɓe nder suudu fuu haa juŋngo Yusufu. Kuugal kuuweteeŋgal ton fuu, kaŋko ardani ɗum.

²³Mawɗo fursina hakkilanaay koo ɗume ko woni haa juŋngo Yusufu, ngam Jawmiraawo ɗon wondi bee maako. Ko o waɗi fuu, Jawmiraawo humtani mo ɗum.