Read Fulfulded Laataanooji 40 Bible Online

Laataanooji 40 - Fulfulded bible

Laataanooji 40

¹Ɓaawo kuuje ɗe'e, dokkoowo laamiiɗo njaramji e hooreejo tamsanooɓe ɗum tamseeje mbaɗi aybe dow jaagorɗo muuɗum'en.

²Firawna tikkani saraaki'en muuɗum ɗiɗo ɓe'e masin: Dokkoowo laamiiɗo njaramji e hooreejo tamsanooɓe ɗum tamseeje.

³O maɓɓi ɓe nder suudu mawɗo aynooɓe, nder fursina haa Yusufu woni.

⁴Mawɗo aynooɓe halfini ɓe haa juŋngo Yusufu haa o huuwana ɓe. Ɓe paɓɓi nder fursina balɗe seɗɗa.

⁵Jemmaare woɗnde, dokkoowo laamiiɗo njaramji e hooreejo tamsanooɓe tamseeje laamiiɗo Misra, haɓɓaaɓeno nder fursina, ɓe ɗiɗo fuu ɓe koyɗi. Koo moy maɓɓe hoyɗi. Koyɗi ɗi'i peerotiri, non maana maaji boo.

⁶Fajiri nde Yusufu wari haa maɓɓe, o laari ɓe pertaaki.

⁷O ƴami saraaki'en Firawna, haɓɓidaaɓe bee maako nder saare jaagorɗo maako: “Ngam ɗume on ɗon mbonti hannde?”

⁸Ɓe njaabi mo: “Koo moy amin hoyɗi, ammaa walaa goɗɗo haa ɗo haa fassitirana min.” Yusufu wi'i ɓe: “Allah waawan faasitirango on. Ngecceeɗam!”

⁹Dokkoowo laamiiɗo njaramji yecci Yusufu koyɗol mum, wi'i: “Nder koyɗol am, woodino inabohi yeeso am.

¹⁰Ki ɗon bee lice tati. Nde ki wiliti, ki waɗi pinndi, bukki maaki mbaɗi inabooje ɓennduɗe.

¹¹Jardugel Firawna ɗonno haa juŋngo am. Mi itti inabooje, mi ɓiɗɗi ɗe nder maagel, mi hokki mo ngel haa juŋngo”.

¹²Yusufu wi'i mo: “Ndaa fassaruuye maagol: Lice tati ngoni nyalɗe tati.

¹³Lutti nyalɗe tati, Firawna ɓaŋgtete, lornete haa joonde maaɗa. A hokkan Firawna jardugel mum haa juŋngo, bana ko woowa, yaake a ɗonno dokkoowo laamiiɗo njaramji.

¹⁴Ammaa siftoram to a heɓti hayru ma. Useni, woonanam! Wolwan Firawna haala am, wurtinam diga suudu ndu'u!

¹⁵Ngam ɓe naŋngoyi yam diga lesdi Ibraniŋke'en. Haa ɗo boo mi waɗaay koo ɗume ngam haa ɓe nastinammi fursina.”

¹⁶Hooreejo tamsanooɓe laamiiɗo tamseeje yi'i no fassaruuye Yusufu waŋgini ko wooɗi, o wi'i mo: “Min boo mi hoyɗi. Mi ɗonno roondi cilaaje tati bee tamseeje daneeje.

¹⁷Nder silaawo wonŋgo dow, tamseeje feere feere ɗe Firawna nyaamata fuu ɗon nder maago. Colli ɗonno nyaama ɗum dow hoore am.”

¹⁸Yusufu jaabi: “Ndaa fassaruuye maagol: Cilaaje tati ngoni nyalɗe tati.

¹⁹Lutti nyalɗe tati, Firawna ta'ete hoore, o ɓilete haa leggal, colli nyaaman kusel maaɗa.”

²⁰Nyalaade tataɓre, nde laati juulde siftinorki danyeeki Firawna, o waɗani saraaki'en maako fuu nyaamduuji. O ɓaŋgti dokkoowo laamiiɗo njaramji e hooreejo tamsanooɓe mo tamseeje yeeso saraaki'en maako.

²¹O lorni dokkoowo laamiiɗo njaramji nder kuugal mum, kaŋko boo o hokki Firawna jardugel haa juŋngo.

²²Ammaa o ɓili hooreejo tamsanooɓe mo tamseeje bana no Yusufu fassitiri.

²³Ammaa dokkoowo laamiiɗo njaramji siftoraay Yusufu, o yejjiti mo.