Read Fulfulded Laataanooji 45 Bible Online

Laataanooji 45 - Fulfulded bible

Laataanooji 45

¹Yusufu waawaay naŋgtaago yeeso taariiɓe mo fuu. O hooli: Ngurtine yimɓe fuu! Walaa goɗɗo lutti haa maako, nden o annditini hoore maako haa deerɗiraaɓe maako.

²O woyi bee sawtu haa Misra'en nani ɗum. Koo saare Firawna boo nani.

³Yusufu wi'i deerɗiraaɓe muuɗum: “Min woni Yusufu! Baaba am ɗon yeeɗa fahin na?” Deerɗiraaɓe maako mbaawaay jaabaago mo, ngam ɓe mbemmbi yeeso maako.

⁴O wi'i ɓe: “Ɓaditeeɗam!” Ɓe ɓaditi. O wi'i: “Min woni Yusufu, deerɗiraawo mooɗon mo coorruɗon haa Misra.

⁵Ammaa jonta kam taa cakle, taa tikkane ko'e mon ngam on coorri yam haa ɗo. Ngam ɗum Allah neli yam yeeso mooɗon haa mi hisna yoŋkiiji mon.

⁶Waɗi jonta duuɓi ɗiɗi, weelo ɗon nder lesdi. Lutti duuɓi jowi fahin walaa remugo malla sodugo.

⁷Allah neli yam haa yeeso mooɗon ngam haa on keɓa danygol nder lesdi ndi'i, o hisna ngeendam mooɗon bee kisndam mawɗam.

⁸Naa onon neli yam haa ɗo, ɗum Allah neli yam. O waɗi yam bana baaba Firawna, mi jaagorɗo saare maako fuu, mi ngomna dow lesdi Misra fuu boo.

⁹Njaawɗe, koote haa baaba am, mbi'e mo: Ndaa nii ɓiɗɗo ma Yusufu wi'i: Allah waɗi yam mi jaagorɗo Misra fuu, war haa am, taa neeɓ!

¹⁰A jooɗoto nder lesdi Goosan, a ɓado yam, an e ɓiɓɓe ma e taaniraaɓe ma e dammooji ma e na'i ma e ko marɗa fuu.

¹¹Mi wuurnete, non boo saare maaɗa e dammooji ma, ngam taa koo ɗume ŋakkana on, ngam luttani weelo duuɓi jowi.

¹²On ɗon ngi'a ɗum bee gite mooɗon e deerɗiraawo am Benyamin boo ɗon yi'a bee gite mum, ɗum min wolwani on bee hunnduko am.

¹³Anndine baaba am tedduŋgal am nder Misra, ngecce mo ko ngi'ɗon fuu. Njaawɗe waddugo baaba am haa ɗo.”

¹⁴Nden o harli deerɗiiko Benyamin, o woyi. Benyamin boo woyi.

¹⁵O hebbi deerɗiiko'en fuu bee bojji. Ɓaawoɗon deerɗiiko'en mbolidi bee maako.

¹⁶Habaru maajum yotti nder saare Firawna no deerɗiraaɓe Yusufu ngari. Ɗum fottani Firawna e saraaki'en muuɗum.

¹⁷Firawna wi'i Yusufu: “Wi' deerɗa'en ni'i: Ndimnde dabbaaji mon, ndille lesdi Kanaana.

¹⁸Koo'e baaba mooɗon e yimɓe ci'e mooɗon, nden ngare haa am. Mi hokkan on ɓurɗum wooɗugo lesdi Misra, on nyaaman nyaamdu ɓuranndu wooɗugo boo.

¹⁹An boo yeccu ɓe umroore am nde'e: Koo'e haa Misra mootaaji pucci ngam ɓikkoy mooɗon e rewɓe mooɗon. Kooce baaba mooɗon, ngare.

²⁰Taa on miijo kuuje mooɗon ɗe accuɗon, ngam ɓurɗum wooɗugo nder lesdi Misra fuu laatanto on.”

²¹Ɓiɓɓe Isra'iila mbaɗi bana non. Yusufu hokki ɓe mootaaji pucci fodde umroore Firawna, o hokki ɓe boo njooɓaari laawol.

²²O hokki koo moy maɓɓe ngapaleeji haa sannja limce mum. Ammaa Benyamin, o hokki mo ceede cardi teemeɗɗe tati e ngapaleeji jowi.

²³O neldani baaba maako bamɗe sappo dimndaaɗe bee kuuje Misra ɓurɗe wooɗugo, non boo bamɗe debbe sappo dimndaaɗe bee alkamaari e tamseeje e nyaamdu ngam jahaaŋgal baaba maako.

²⁴Nden o jaɓɓiti deerɗiiko'en, o wi'i ɓe: “Taa njokkire haa laawol.”

²⁵Ɓe ummi Misra, ɓe ngarti nder lesdi Kanaana haa baaba maɓɓe Yaakubu.

²⁶Ɓe anndini mo: “Yusufu o geeto, o ngomna dow lesdi Misra fuu!” Ammaa ɗum meemaay mo sam ngam o nuɗɗinaay ɓe.

²⁷Ɓe ngecci mo bolle ɗe Yusufu wolwani ɓe fuu. O yi'i mootaaji pucci ɗi Yusufu neldi ngam yahrugo mo. Nden baaba maɓɓe Yaakubu ferti.

²⁸Isra'iila wi'i: “Yowwa! Ɓiyam Yusufu o geeto! Sey mi yaha mi laara mo hiddeko mi maaya!”