Read Fulfulded Laataanooji 46 Bible Online

Laataanooji 46 - Fulfulded bible

Laataanooji 46

¹Isra'iila ummi bee ko o mari fuu, o wari wuro Biirsaba. O lii'ani Allah mo baaba maako Isiyaaku kirsaaɗi.

²Allah wolwani Isra'iila bee wahayu jemma, wi'i mo: “Yaakubu! Yaakubu!” O jaabi: “Na'am, mi ɗon heɗito ma.”

³O wi'i: “Min Allah, Allah mo baaba maaɗa. Taa hul yahugo Misra, ngam haa ton laatinanmaami ummaatoore mawnde.

⁴Mi yahdan bee maaɗa haa Misra, kadiboo min wartirte haa ɗo. Saa'i maayata, Yusufu maɓɓata ma gite.”

⁵Yaakubu ummi diga Biirsaba. Ɓiɓɓe muuɗum mba'ini ɗum e ɓikkoy maɓɓe e rewɓe maɓɓe dow mootaaji pucci ɗi Firawna nelduno ngam yahrugo ɓe.

⁶Ɓe koo'i dabbaaji maɓɓe e mardi ndi ɓe keɓno nder lesdi Kanaana. Bana non Yaakubu e danygol mum fuu wardi haa Misra.

⁷O yahdi bee ɓiɓɓe maako worɓe e taaniraaɓe maako worɓe, non boo ɓiɓɓe maako rewɓe e taaniraaɓe rewɓe. O wardi bee danygol maako fuu haa Misra.

⁸Ndaa inɗe ɓiɓɓe Isra'iila warɓe haa Misra: Yaakubu e ɓiɓɓe mum: Afo Yaakubu, Ruben.

⁹Ɓiɓɓe Ruben ngoni: Hanok e Pallu e Hesruunu e Karmi.

¹⁰Ɓiɓɓe Simeyon ngoni: Yemuwel e Yamin e Ohada e Yakin e Cohar e Sawulu, ɓii debbo Kanaaniijo.

¹¹Ɓiɓɓe Lewi ngoni: Gerson e Kahat e Meraari.

¹²Ɓiɓɓe Yahuuda ngoni: Eer e Oonan e Sela e Peres e Zeraha. Ammaa Eer e Oonan maayi nder lesdi Kanaana. Ɓiɓɓe Peres ngoni: Hesruunu e Hamul.

¹³Ɓiɓɓe Issakar ngoni: Tola e Puwa e Yoba e Simron.

¹⁴Ɓiɓɓe Zabulon ngoni: Seret e Elon e Yahaleyel.

¹⁵Kamɓe ngoni ɓiɓɓe Leya ɓe o danyani Yaakubu haa Paddan-Aram, non boo Dina, ɓiyiiko debbo. Ɓiɓɓe maako worɓe e rewɓe ɓe o danydi bee Leya non boo taaniko'en ngaɗi fuu cappanɗe tato e tato (33).

¹⁶Ɓiɓɓe Gada ngoni: Cifiyon e Haggi e Suni e Esbon e Eri e Aroodi e Areeli.

¹⁷Ɓiɓɓe Aser ngoni: Yimna e Yisuwa e Yisuwi e Beri'a e deerɗiraawo maɓɓe debbo: Sera. Ɓiɓɓe Beri'a ngoni: Heber e Malkiyel.

¹⁸Kamɓe ngoni danygol Zilpa mo Laban hokkuno ɓiyum Leya. Ɓikkoy e taaniraaɓe fuu ngaɗi sappo e njoweego (16).

¹⁹Ɓiɓɓe Rahiilu, debbo Yaakubu, ngoni: Yusufu e Benyamin.

²⁰Yusufu danyanaama Manassa e Efrayim nder lesdi Misra. Asnat ɓii Poti-Fera, limanjo haa Oon, danyani mo ɓe.

²¹Ɓiɓɓe Benyamin: Bela e Beker e Asbeel e Geera e Na'aman e Ehi e Roos e Muppim e Huppim e Arda.

²²Kamɓe ngoni danygol Rahiilu, danyanaaɓe Yaakubu. Ɓikkoy e taaniraaɓe fuu ngaɗi ɓe sappo e nayo (14).

²³Ɓiɗɗo Dan: Husim.

²⁴Ɓiɓɓe Neftali ngoni: Yahaciyel e Guni e Yecer e Sillem.

²⁵Kamɓe ngoni ɓikkoy e taaniraaɓe Yaakubu ɓe danygol Bilha mo Laban hokkuno ɓiyum Rahiilu. Ɓe ngaɗi ɓe njoweeɗiɗo (7).

²⁶Danygol Yaakubu fuu, warɓe haa Misra, ɓikkoy e taaniraaɓe maako fuu ngaɗi cappanɗe njoweego e njoweego (66). Rewɓe ɓikkoy maako limaaka.

²⁷Bee ɓiɓɓe Yusufu, danyanaaɓe mo nder Misra, ɓe ɗiɗo. Bana non limgal saare Yaakubu haa Misra fuu waɗi cappanɗe njoweeɗiɗo (70).

²⁸Yaakubu neli Yahuuda yeeso muuɗum haa Yusufu, ngam Yusufu waŋga yeeso maako haa Goosan. Nde ɓe ngari nder lesdi Goosan,

²⁹Yusufu waɗi pucci haa moota muuɗum. O dilli fottoygo bee baaba maako haa Goosan. Nde o yi'i mo, o harli mo daande, o woyi haa neeɓi.

³⁰Nden Isra'iila wi'i Yusufu: “Jonta kam, nde mi laari yeeso ma, koo mi maayi boo, jam! Ngam a geeto.”

³¹Yusufu wi'i deerɗiraaɓe muuɗum e saare baaba muuɗum: “Mi yahan, mi maatina Firawna, mi wi'an mo: Deerɗam'en e saare baaba am, jooɗiiɓeno nder lesdi Kanaana, ngari haa am.

³²Yimɓe ɓe'e ɓe waynaaɓe, ɓe ɗon kuuwa kuugal ngaynaaka. Ɓe ngardidi bee dammooji maɓɓe e na'i maɓɓe e ko ɓe mari fuu.

³³To Firawna ewni on, ƴami on: Ɗume woni kuugal mooɗon? —

³⁴Mbi'e mo: Maccuɓe ma ɓe waynaaɓe diga nderkaaku amin haa wargo hannde bana kaakiraaɓe amin. Nden on keɓan joonde nder lesdi Goosan, ngam Misra'en ngerdaaki waynaaɓe dammooji.”