Read Fulfulded Laataanooji 47 Bible Online

Laataanooji 47 - Fulfulded bible

Laataanooji 47

¹Yusufu yehi, anndini Firawna, wi'i mo: “Baaba am e deerɗam'en bee dammooji muuɗum'en e na'i muuɗum'en e mardi muuɗum'en fuu ngari diga lesdi Kanaana. Ndaa, ɓe ɗon nder lesdi Goosan.”

²Nden o hoo'i njowo caka deerɗiiko'en, o holli ɓe haa Firawna.

³Firawna ƴami deerɗiraaɓe Yusufu: “Ɗume woni kuugal mooɗon?” Ɓe njaabani Firawna: “Maccuɓe ma ngoni waynaaɓe dammooji, bana kaakiraaɓe amin.”

⁴Ɓe mbi'i Firawna fahin: “Min ngari haa min koɗa nder lesdi maaɗa. Durduɗe ngoodaa ngam dammooji maccuɓe ma, ngam weelo saati nder lesdi Kanaana. Accu maccuɓe ma njooɗo jonta nder lesdi Goosan.”

⁵Firawna wi'i Yusufu: “Baaba ma e deerɗa'en ngari haa maaɗa. Lesdi Misra fuu ɗon yeeso ma. Jo'in ɓe haa nokkuure ɓurnde wooɗugo. Ɓe njooɗo nder lesdi Goosan. To a tawi caka maɓɓe worɓe hakkilɓe, halfin ɓe dabbaaji am.”

⁷Nden Yusufu waddi baaba muuɗum Yaakubu, holli mo Firawna. Yaakubu barkiɗini Firawna.

⁸Firawna ƴami Yaakubu: “Noy duuɓi ma?”

⁹Yaakubu jaabi: “Duuɓi ngeendam koɗamku am haa duniyaaru ngaɗi teemerre e cappanɗe tati (130). Duuɓi ngeendam am ɗi caɗɗi, ɗi ɗuuɗaay. Ɗi njottaaki duuɓi ngeendam kaakiraaɓe am nder koɗamku maɓɓe.”

¹⁰Yaakubu barkiɗini Firawna, nden o wurti diga laamorde.

¹¹Yusufu jo'ini baaba mum e deerɗum'en haa nokkuure ɓurnde wooɗugo haa Misra, lesdi Ra'meses, bana Firawna umruno.

¹²Yusufu hokki baaba mum e deerɗum'en e saare baaba mum fuu nguure fodde limgal ɓikkoy.

¹³Nyaamdu woodaa nder duniyaaru fuu, ngam weelo saati masin. Yimɓe lesdi Misra e lesdi Kanaana ɗonno tampa ngam weelo.

¹⁴Yusufu mooɓti ceede gonɗe haa Misra e Kanaana fuu, ngam alkamaari ndi yimɓe coodi. O waddi ceede man nder saare Firawna.

¹⁵Ceede timmi nder lesdi Misra e lesdi Kanaana. Misra'en fuu ngari haa Yusufu, mbi'i: “Hokku min ko min nyaama. Min maaya yeeso ma ngam ceede timmi na?”

¹⁶Yusufu wi'i ɓe: “Ngadde dabbaaji mooɗon. Mi hokkan on nyaamdu mbattudi dabbaaji mon, ngam ceede mooɗon timmi.”

¹⁷Ɓe ngaddani Yusufu dabbaaji maɓɓe. Yusufu hokki ɓe nyaamdu mbattudi pucci e dammooji e na'i e bamɗe maɓɓe. Nder hitaande nde'e o nyaamni ɓe mbattudi dabbaaji maɓɓe fuu.

¹⁸Mawri maajum ɓe ngari fahin haa maako, ɓe mbi'i: Min mbaawataa suuɗugo ɗum yeeso jaagorɗo amin. “Ceede njinni, min ngaddani ma dabbaaji amin boo, walaa ko luttani min sey ɓalli amin e gese amin.

¹⁹Min maaya yeeso ma kadi na? Soodu min e gese amin mbattudi nyaamdu. Minin min laato maccuɓe Firawna bee gese amin. Hokku min aawdi, haa min ngeeɗa, taa min maaya, taa gese amin boo laato duumtuɗe!”

²⁰Yusufu soodani Firawna lesdi Misra fuu. Koo moy Misraajo soorri ngesa mum, ngam weelo ɓilli ɓe. Bana non lesdi fuu laatorani Firawna.

²¹Yusufu macciɗini yimɓe Misra, o dahi ɓe diga berniiji, diga keerol gootol haa keerol ngola.

²²Sey gese liman'en tan o soodaay, ngam woodino umroore Firawna mo'ani ɓe. Ɓe nguurdi bee ko Firawna hokkata ɓe. Ngam maajum ɓe coorraay gese maɓɓe.

²³Yusufu wi'i yimɓe: “Ndaa, jonta kam mi soodi on, onon e gese mooɗon ngam Firawna. Ndaa aawdi mooɗon, aawe gese.

²⁴Wakkati codol fuu, on ndokkan Firawna yeɓre woore nder jowi. Geɓe nayi laatanto on ngam aawdi e ngam nyaamdu mooɗon, onon e wonɓe nder ci'e mooɗon e ɓikkoy mooɗon.”

²⁵Ɓe njaabi: “A hisni yoŋkiiji amin! Min keɓi mo'ere yeeso jaagorɗo amin, min laatoto maccuɓe Firawna.”

²⁶Non Yusufu waari umroore nder lesdi Misra haa wargo hannde: Yeɓre woore nder jowi Firawna jeyi. Sey gese liman'en tan laatanaaki Firawna.

²⁷Yimɓe Isra'iila njooɗi nder lesdi Misra, nder lesdi Goosan. Ɓe keɓi maral maɓɓe, ɓe ndanyndanytiri, ɓe ɗuuɗi masin.

²⁸Yaakubu jooɗi nder Misra duuɓi sappo e joweeɗiɗi (17). Duuɓi Yaakubu ngaɗi teemerre e cappanɗe nayi e joweeɗiɗi (147).

²⁹Nde saa'i maayugo Isra'iila ɓaditi, o ewni ɓiyiiko Yusufu, o wi'i mo: “To a yiɗi hinnugo yam, useni wallin juŋngo ma caka dawɗe am, waɗanam mbooɗeeŋga e gooŋgaaku: Taa uwam haa Misra!

³⁰Mi hawtoyan bee kaakiraaɓe am. A wurtintam Misra, a uwammi nder yenaande maɓɓe.” Yusufu jaabi: “Mi waɗan fodde koŋngol ma.”

³¹Yaakubu wi'i: “Hunanam!” Yusufu hunani mo. Nden Isra'iila turi haa hoore leeso muuɗum.