Read Fulfulded Laataanooji 49 Bible Online

Laataanooji 49 - Fulfulded bible

Laataanooji 49

¹Yaakubu ewni ɓiɓɓe muuɗum, wi'i: “Mooɓe haa am haa mi anndina on ko laatanta on nder nyalɗe garanɗe.

²Kawte, nane, onon ɓiɓɓe Yaakubu, nane ko baaba mooɗon Isra'iila wi'ata on!

³Ruben, an woni afo am, a baawɗe am e aranum semmbe am, a ɓurduɗo maŋngu e baawɗe caka ɓiyam'en.

⁴A ƴuufi bana ƴuuge ndiyam cemmbiɗɗe, ammaa a heɓataa ɓural. Ngam a wa'i dow be'itte baaba maaɗa, a soɓni be'itte am bee wa'aago ma.

⁵Simeyon e Lewi ɓe deerɗiraaɓe. Ɓe narri ngam toonyaago yimɓe.

⁶Taa yoŋki am nasta dawral maɓɓe. Taa ɓernde am hawtana mooɓtorde maɓɓe. Ngam nder tikkere maɓɓe ɓe mbari worɓe, nder welwelo maɓɓe ɓe coppi korle ga'i kalhali.

⁷Naaloore laatano tikkere maɓɓe, ngam nde heewi toonyaaŋge, non boo ɓernuki maɓɓe boo, ngam ki walaa enɗam. Mi senndan ɓe nder lesdi Yaakubu, mi saŋkitan ɓe caka Isra'iila'en.

⁸An, Yahuuda, deerɗiraaɓe maaɗa maŋgtete. Juŋngo ma wonan dow koɓɓuli konne'en maaɗa. Ɓiɓɓe baaba ma cujidante.

⁹Yahuuda, ɓiɗɗo am. A nanndi bana ɓii mbarooga, paɗɗuŋga kusel, ɗappini. A roŋgini bana mbarooga, bana mbarooga ndewa, moy waawata haftingo mo?

¹⁰Sawru laamu daayataako Yahuuda. Ndu wonoto tum caka danygol maako. O maran baawɗe haa yotto mo sawru man laatanto ɗum wara[76], mo ummaatooje ɗowtanto ɗum.

¹¹O haɓɓan wamnde maako haa inabohi, molde boo haa lisal ɓurŋgal wooɗugo. O lootan limce maako bee inaboojam, ngapaleewol maako boo bee ndiyam inabooje.

¹²Gite maako mbooji daliila inaboojam, nyii'e maako ndanwi ɓuri kosam.

¹³Zabulon jooɗoto haa fomoonde mbeela, haa jipporde koommbooje[77]. Keeri maako njottoto berniwol Sidon.

¹⁴Issakar woni wamnde semmbiɗnde, waalotoonde caka kowaaɗe tekkuɗe[78].

¹⁵Nde o yi'i siwtaare weli, lesdi boo wooɗi, o turi balawal maako ngam roondaago, o nastini hoore maako haa kuugal maccuɗo.

¹⁶Dan hiitoto lenyol mum bana le'i Isra'iila goɗɗi.

¹⁷Dan laatoto bana mboodi dow buuwol, foosokre dow laawol. O ŋatan teppe puccu, nden ba'iiɗo ngu do'oto haa lesdi.

¹⁸Mi ɗon tammoro kisndam ma, yaa Jawmiraawo!

¹⁹Gada, mooɓre ukkanto mo, ammaa o dartanto nde, o fartan nde.

²⁰Aser, nyaamdu mum ɗuuɗndu, o waɗan nyaamduuji belɗi, ɗi laamiiɓe.

²¹Neftali woni lelwa njooftaaŋga, ndimanŋga ɓikkoy mbooɗkoy.

²²Yusufu woni wilirre lekki dimoohi, wilirre lekki dimoohi kommbi seeɓoore ndiyam, ki lice mum towti dow mahol.

²³Fiɗooɓe kuri tikkini mo, piɗi mo, koni mo.

²⁴Ammaa lagaawal maako tabiti, juuɗe maako caati ngam ballal Allah Baawɗo mo Yaakubu, ngam man o laati Gaynaako e tapaare Isra'iila[79].

²⁵Allah mo baaba maaɗa wallete. Allah Baawɗo barkiɗinte bee barkaaji iyeele diga dow, bee barkaaji ilamji baaliiɗi les lesdi, bee barkaaji enɗi e danyrugol.

²⁶Barkaaji baaba maaɗa ɓuri mawnugo dow nafuuda kooseeje ɓooymaaje e risku towndiije duumiiɗe. Ɗi ngara dow hoore Yusufu, dow hoore cuɓaaɗo caka deerɗiiko'en.

²⁷Benyamin woni saafaandu faɗɗooru. Fajiri o nyaaman paɗɗaaɗum, kiikiiɗe o senndan keɓal.”

²⁸Kamɓe ngoni le'i Isra'iila sappo e ɗiɗi. Bana non baaba maɓɓe wolwani ɓe. O barkiɗini ɓe. Koo moy heɓi barka no haandani ɗum.

²⁹Nden Yaakubu umri ɓikkoy mum: “Mi hawtoyan bee kaakiraaɓe am. Uweeɗam haa kommbi maɓɓe, nder lowol ngesa Efruuna Hetiijo,

³⁰haa lowol Makpela, tiitotiri bee Mamre. Ɗum ngesa ka Ibrahiima soodi haa Efruuna, Hetiijo, ngam nokkuure yenaande.

³¹Ton ɓe uwi Ibrahiima e debbo maako Saraatu. Ton ɓe uwi Isiyaaku e debbo maako Rebekka. Ton mi uwi Leya boo.

³²Ngesa e lowol nder maaka coodaama haa Heti'en.”

³³Nde Yaakubu timmini umrugo ɓiɓɓe muuɗum, o hawti kosɗe maako dow be'itte, o yoofti yoŋki, o hawtoyi bee kaakiraaɓe maako.