Read Fulfulded Laataanooji 50 Bible Online

Laataanooji 50 - Fulfulded bible

Laataanooji 50

¹Yusufu do'i dow baaba mum, woyi dow yeeso maako, hebbi ɗum.

²Nden o umri hurgooɓe huuwanooɓe mo, ɓe nguja ɓanndu baaba maako bee uurle. Hurgooɓe nguji ɓanndu Isra'iila.

³Ɓe kuuwi nyalɗe cappanɗe nayi (40), kanjum woni saa'iire gujol. Misra'en mboyi mo nyalɗe cappanɗe joweeɗiɗi (70).

⁴Nde nyalɗe boyki timmi, Yusufu wolwani saraaki'en Firawna, wi'i: “To on ngerdake yam, useni mbi'e Firawna ni'i:

⁵Nde baaba am ɓadino maayugo, o hunni yam bee wi'go: Ndaa, mi maayan! Nder yenaande nde mi wasi haa lesdi Kanaana ton uwata yam”. Jonta mi yiɗi mi yaha uwoygo baaba am nden mi loro.

⁶Firawna wi'i: “Yah, uw baaba ma bana no o hunniri ma.”

⁷Yusufu yehi uwugo baaba muuɗum. Saraaki'en Firawna fuu e ndotti'en saare maako e ndotti'en lesdi Misra fuu njahdi bee maako.

⁸Non boo saare Yusufu fuu e deerɗiraaɓe maako e saare baaba maako. Sey ɓikkoy maɓɓe e dammooji maɓɓe e na'i maɓɓe tan ɓe acci nder lesdi Goosan.

⁹Mootaaji pucci e wa'iiɓe pucci njahdi bee maako, ɗum waɗi mooɓre ɗuuɗnde masin.

¹⁰Nde ɓe njotti laarre Ataada haa gaɗa maayo Urdun, ɓe mboyi ton bojji ɗuuɗɗi caatuɗi masin. Yusufu woyi baaba muuɗum nyalɗe joweeɗiɗi.

¹¹Kanaani'en jooɗiiɓe nder lesdi ngi'i bojji maɓɓe haa laarre Ataada, ɓe mbi'i: “Misra'en cunnake masin.” Ngam maajum ɓe inndi nokkuure nde'e Abel-Misrayim[80], haa gaɗa Urdun.

¹²Ɓiɓɓe Yaakubu mbaɗi bana o umruno ɓe.

¹³Ɓe njahri ɓanndu maako nder lesdi Kanaana, ɓe uwi mo nder lowol haa ngesa Makpela, kommbi Mamre. Ɗum ngesa ka Ibrahiima sooduno haa Efruuna Hetiijo, ngam laatano mo pellel genaale[81].

¹⁴Ɓaawo o uwi baaba maako, Yusufu lorti haa Misra hawtaade bee deerɗiiko'en e yahduɓe bee maako fuu ngam uwugo baaba maako.

¹⁵Ɓaawo maayde baaba maɓɓe, deerɗiraaɓe Yusufu mbi'mbi'tiri: “Noy to Yusufu wanyi en, to o yiɗi waataago kalluɗum fuu ko en mbaɗno mo?”

¹⁶Ngam maajum ɓe neli haa Yusufu, ɓe mbi'a mo: “Baaba ma hiddeko maaya, o umri min, o wi'i:

¹⁷Ndaa nii mbolwanton Yusufu: Useni, yaafa zunuuba deerɗiraaɓe maaɗa e hakke maɓɓe, ngam ɓe mbaɗi ma kalluɗum. Min ɗon toro ma jonta, yaafa zunuuba jagganiiɓe Allah baaba maaɗa.” Nde ɓe mbolwani mo bana non, Yusufu woyi.

¹⁸Deerɗiraaɓe maako boo njehi haa maako. Ɓe cujidi yeeso maako, ɓe mbi'i: “Ndaa, min ɗon bana maccuɓe maaɗa.”

¹⁹Yusufu wi'i ɓe: “Taa kule! Min mi Allah na?

²⁰Halleende nde on nufanino yam Allah wartiri ɗum hayru ngam hisnugo ummaatoore ɗuuɗnde bana ko laati hannde.

²¹Jonta kam taa kule. Mi hokkan on, onon e ɓikkoy mooɗon nguure.” Bana non o de'itiniri ɓe, o welni ɓerɗe maɓɓe.

²²Yusufu jooɗi nder Misra, kaŋko e saare baaba maako fuu. O waɗi duuɓi teemerre e sappo (110).

²³O yi'i ɓiɓɓe Efrayim haa yidere tataɓre. Ɓiɓɓe Makir ɓii Manassa, kamɓe boo ɓe ndanyaama dow koppi Yusufu.

²⁴Yusufu wi'i deerɗum'en: “Mi maayan, ammaa fakat, Allah accataa on, o wurtinan on diga Misra, o yahran on lesdi ndi o hunani Ibrahiima e Isiyaaku e Yaakubu.”

²⁵Yusufu hunni ɓiɓɓe Isra'iila, wi'i: “Fakat Allah woonanan on. Njahride i'e am bee mooɗon.”

²⁶Yusufu maayi yaake o mari duuɓi teemerre e sappo. Ɓe nguji ɓanndu maako bee uurle, ɓe mballini ndu nder kes haa Misra.