Read Fulfulded Laataanooji 7 Bible Online

Laataanooji 7 - Fulfulded bible

Laataanooji 7

¹Jawmiraawo wi'i Nuuhu: “Nastu koommbowal[10], an bee yimɓe saare maaɗa fuu. Ngam mi yi'i a adiliijo haa yeeso am nder zamanuuru ndu'u.

²Haa dabbaaji dagiiɗi fuu hoo'u gorɗi joweeɗiɗi e debbi joweeɗiɗi. Diga dabbaaji ɗi dagaaki boo, hoo'u ɗiɗi ɗiɗi, gorɗum e debbum.

³Diga colli boo, hoo'u gorɗi joweeɗiɗi e debbi joweeɗiɗi, ngam haa asli maaji lutta dow lesdi.

⁴Ngam lutti nyalɗe joweeɗiɗi, mi toɓnan iyeende dow lesdi, nyalawmaaje e jemmaaje cappanɗe nayi. Mi nattinan tagle am fuu dow lesdi.”

⁵Nuuhu waɗi ko Jawmiraawo umruno mo fuu.

⁶Haa ilam tuufaana waɗa dow lesdi, Nuuhu marino duuɓi teemeɗɗe joweego (600).

⁷Nuuhu nasti koommbowal bee ɓiyum'en e debbo muuɗum e rewɓe ɓiyum'en, ngam hisugo ndiyamji tuufaana.

⁸Diga dabbaaji dagiiɗi e ɗi ndagaaki, diga colli e ko wuurata dow lesdi fuu,

⁹gorɗum e debbum, ɗiɗi ɗiɗi, ngari haa Nuuhu nder koommbowal bana Allah umruno mo.

¹⁰Nde nyalɗe joweeɗiɗi mbaɗi, ndiyam tuufaana moɗi lesdi.

¹¹Nder nduuɓu Nuuhu teemeɗɗe joweego'oowu (600), lewru ɗiɗaɓru, nyalaade sappo e joweeɗiɗawre maaru, ɓulduɗe ndiyamji lugguɗi les lesdi fuu cukkiti, burɗe asama boo maɓɓiti.

¹²Iyeende toɓi dow lesdi nyalawmaaje cappanɗe nayi e jemmaaje cappanɗe nayi.

¹³Nyalaade maajum nden Nuuhu e ɓiyum'en: Sem e Haamu e Yafet, non boo debbo maako e rewɓe ɓiɓɓe maako nasti koommbowal,

¹⁴bee dabbaaji ladde fodde asli maaji e dabbaaji saare fodde asli maaji fuu e ladooji duɓanɗi dow lesdi fodde asli maaji e colli fodde asli maaji bee fiiroojum koo ɗume marɗum bileeji fuu.

¹⁵Ɗi ngari haa Nuuhu nder koommbowal, gorɗum e debbum fuu, ɗiɗi ɗiɗi diga ko mari poofɗe ngeendam fuu.

¹⁶Gorɗum e debbum nder tagle fuu nasti, bana Allah umruno mo. Nden Jawmiraawo maɓɓi dammugal.

¹⁷Ilam tuufaana waɗi dow lesdi nyalɗe cappanɗe nayi. Ndiyamji ɓesdi, efti koommbowal, ngal ɓaŋgti dow.

¹⁸Ndiyamji ɓurti ɓesdaago masin dow lesdi, koommbowal weeyi dow ndiyam.

¹⁹Ndiyamji tokki ɗuuɗugo masin. Ɗi moɗi kooseeje towɗe les asama fuu,

²⁰ɗi towti dow maaje waɗi meetir joweeɗiɗi (7).

²¹Marɗum ɓanndu ko waancata dow lesdi fuu waati: Colli e dabbaaji e ko duɓata dow lesdi mbaatidi, non boo yimɓe fuu maaydi.

²²Ko mari poofɗe ngeendam nder kine fuu, ko woni dow lesdi njoorndi fuu, waati.

²³Bana nii Allah nattiniri ko wonno dow lesdi fuu: Yimɓe e dabbaaji e ladooji e colli. Sey Nuuhu luttidi bee ko wondi bee maako nder koommbowal.

²⁴Ndiyamji ɓesdi nyalɗe teemerre e cappanɗe jowi (150).