Read Fulfulded Laataanooji 8 Bible Online

Laataanooji 8 - Fulfulded bible

Laataanooji 8

¹Allah numi dow Nuuhu e dabbaaji ladde fuu e dabbaaji saare fuu ngonduɗi bee maako nder koommbowal[11]. Allah wifni henndu dow lesdi, ndiyamji puɗɗi ustugo.

²Ɓulduɗe ndiyamji lugguɗi les lesdi e burɗe asama maɓɓi. Iyeende helti.

³Ɓaawo nyalɗe teemerre e cappanɗe jowi (150), ndiyamji puɗɗi ustugo seɗɗa seɗɗa dow lesdi.

⁴Nder lewru joweeɗiɗaɓru, nyalaade sappo e joweeɗiɗawre maaru, koommbowal jooɗi dow hooseere Araraada.

⁵Ndiyamji tokkiti ustugo haa wargo lewru sappooru. Nyalaade aranndeere nder lewru maajum, geereeje kooseeje mbaŋgi.

⁶Nde nyalɗe cappanɗe nayi mbaɗi (40), Nuuhu maɓɓiti wurdere koommbowal nde o waɗno go.

⁷O yoofi leekuwal gootal. Ngal fiiri. Ngal yehi e ngal lori nde ɗuuɗɗum, haa nde ndiyam ɓeeɓi e lesdi.

⁸Nden o yoofi poola, haa o laara to ndiyam ustake dow lesdi.

⁹Ammaa poola tawaay nokkuure ngam hoɗaago, ngam ndiyamji ɗonno cuddi lesdi tawon. Nga warti haa koommbowal. Nuuhu forti juŋngo muuɗum, hooci nga, nastini nga nder koommbowal.

¹⁰O munyi nyalɗe joweeɗiɗi fahin, nden o yoofi nga kadiboo.

¹¹Haa kiikiiɗe, poola wartidi bee haako jaytunhi haa hunnduko maaga. Bana nii Nuuhu annditi ndiyam usti dow lesdi.

¹²Kadiboo o munyi nyalɗe joweeɗiɗi fahin, nden o yoofi poola. Ammaa nga meetaay wartugo haa maako.

¹³Nder nduuɓu Nuuhu teemeɗɗe joweego e go'oowu (601), lewru aranndu, nyalaade go'oore maaru, ndiyamji cotti e lesdi. Nuuhu omti maɓɓorde koommbowal, o yurni gal yaasi. Ndaa, lesdi yoori.

¹⁴Nder lewru ɗiɗaɓru, nyalaade noogas e joweeɗiɗawre maaru, lesdi yoori.

¹⁵Nden Allah wi'i Nuuhu:

¹⁶“Wurta koommbowal bee debbo maaɗa, ɓikkoy maaɗa e rewɓe maɓɓe.

¹⁷Wurtin boo asli dabbaaji gonduɗi bee maaɗa fuu, marɗum ɓanndu fuu, colli e dabbaaji e ladooji duɓanɗi dow lesdi fuu, haa ɗi caŋkito dow lesdi, ɗi ndima, ɗi ɗuuɗa dow lesdi.”

¹⁸Nden Nuuhu wurti bee ɓiyum'en e debbo mum e rewɓe ɓiyum'en.

¹⁹Dabbaaji fuu e ladooji fuu e colli fuu, ko waancata dow lesdi fuu, ngurti koommbowal fodde asli maaji.

²⁰Nuuhu mahani Jawmiraawo hirsirde. Nden o hoo'i ndabbaawa ngoota ngoota nder dabbaaji dagiiɗi e sonndu wooru wooru nder colli dagiiɗi fuu. O lii'ani ɗi Allah guleteeɗi dow hirsirde.

²¹Nde Jawmiraawo maati uureeŋgol belŋgol, o wi'i nder ɓernde maako: “Mi meetataa naalugo lesdi fahin ngam daliila neɗɗo. Ngam anniyaaji ɓernde neɗɗo halli diga nderkaaku maako. Mi meetataa mbarugo marɗum yoŋki fuu bana mbaɗmi.

²²No lesdi tammiri duurugo fuu, aawugo e sodugo, jaaŋgol e gulɗum, nduŋngu e ceeɗu, non boo jemma e nyalawma timmataa sam.”