Read Fulfulded 2 Samuyila 12 Bible Online

2 Samuyila 12 - Fulfulded bible

2 Samuyila 12

¹Jawmiraawo neli annabi Natan haa Daawuda. Natan yehi haa laamiiɗo, wi'i mo: “Worɓe ɗiɗo ɗonno berniwol gootol, oo diskuɗo, oya boo talakaajo.

²Diskuɗo mari dammooji e na'i ɗuuɗɗi masin.

³Ammaa talakaajo walaa koo ɗume, sey baalel bortel gootel tan. O sooduno ngel, o nyaamni ngel, ngel mawnidi bee ɓikkoy maako. Ngel ɗon nyaama nyaamdu maako, ngel ɗon yara nder jardugel maako, ngel ɗon ɗaano dow wiɓɓere maako, fakat ngel laati bana ɓiŋngel maako deyel.

⁴Nyannde feere koɗo wari haa diskuɗo go. Kaŋko o yiɗaa hoo'ugo haa dammooji maako malla haa na'i maako, ngam haa koɗo maako nyaama. Ngam maajum o yehi, o jaɓti baalel talakaajo, o hirsi ngel ngam koɗo maako.”

⁵Tikkere Daawuda saati masin, o wi'i Natan: “Fakat bana Jawmiraawo o geeto, gorko oo o mbareteeɗo!

⁶Sey o hokkita talakaajo baalel man cowi nayi, ngam o waɗi halleende mawnde nde'e, o yurminaay mo sam.”

⁷Natan wi'i Daawuda: “An woni gorko man! Ndaa nii Jawmiraawo, Allah Isra'iila wi'i: Min waɗi ma a laamiiɗo Isra'iila. Min hisni ma juŋngo Sawulu.

⁸Mi hokki ma saare jaagorɗo ma e rewɓe maako fuu. Mi hokki ma laamu dow Isra'iila e Yahuuda. To ɗum he'aayno, mi ɓesdananno ma ko ɓuri ɗum.

⁹Koni a meerɗini umrooje am? Koni kuuwɗa kalluɗum ɗu'um? A mbari Uriya Hetiijo bee kaafahi Ammooni'en, a hooci debbo maako.

¹⁰Ngam a waɗi ɗum, a meerɗini yam, fakat kaafahi seedataa bee saare maaɗa haa foroy.

¹¹Ndaa nii Jawmiraawo wi'i: Mi umminan sarru dow maaɗa diga nder saare ma. Yeeso maaɗa koocanmi rewɓe ma, mi hokka ɓe goɗɗo feere, o waalda bee maɓɓe nyalawma.

¹²An kam a waɗi ɗum bee cuuɗiiɗum, ammaa min mi waɗan ɗum nyalawma yeeso Isra'iila'en fuu.”

¹³Daawuda wi'i Natan: “Mi waɗi aybe haa Jawmiraawo.” Natan jaabi mo: “Jawmiraawo yaafi aybe ma, a maayataa.

¹⁴Ammaa ngam a yawi Jawmiraawo masin bee aybe ma, ɓiŋngel danyaaŋgel maayan.”

¹⁵Nden Natan hooti saare mum. Jawmiraawo nyawni ɓiŋngel ngel debbo Uriya danyani Daawuda, haa ngel yotti daande maayde.

¹⁶Daawuda suumi, tori Allah ngam yoŋki maagel. Nde jemma waɗi fuu, o nasta suudu maako, o waalo haa lesdi.

¹⁷Saraaki'en maako ngari ngam haa ɓe ummina mo, ammaa o sali, o jaɓaay nyaamdugo bee maɓɓe boo.

¹⁸Ɓaawo nyalɗe joweeɗiɗi ɓiŋngel maayi. Ɓe kuli anndingo ɗum Daawuda, ngam ɓe mbi'i: “Wakkati ngel ɗonno yeeɗi tawon maa, o sali nanugo ko en mbi'i. To en ngecci mo ngel maayi, teema o naawnan hoore maako.”

¹⁹Nde Daawuda yi'i ɓe ɗon cofndotira, o faami ɓiŋngel maayi. O ƴami saraaki'en maako: “Ngel maayi na?” Ɓe mbi'i: “Ooho.”

²⁰Nden Daawuda ummi e lesdi, yiiwi, wuji nebbam, wattiti limce mum. O nasti suudu Jawmiraawo, o sujidi. Nde o warti haa suudu maako, o umri ɓe ngaddana mo nyaamdu, nden o nyaami.

²¹Saraaki'en maako mbi'i mo: “Min paamaay ko mbaɗɗa. Saa'i ɓiŋngel ɗonno yeeɗa tawon, a suumi ngam daliila maagel, a woyi. Nde ngel maayi jonta, a ummi, a nyaami.”

²²O wi'i ɓe: “Saa'i ngel ɗon yeeɗi tawon, mi suumi, mi woyi, ngam mi tammi teema Jawmiraawo enɗanno yam, hisnanno yoŋki maagel.

²³Ammaa jonta ngel maayi. Ngam ɗume cuumotoomi? Kadi mi waawan wartirgo ngel na? Ɗum min hawtoyta bee maagel, ammaa kaŋgel ngel lorataako haa am.”

²⁴Daawuda yehi haa Bat-Seeba debbo muuɗum, o de'itini mo, o hawti bee maako, kaŋko o danyi ɓiɗɗo gorko. Daawuda inndi mo Suleymaanu. Ɓiŋngel nge'el, Jawmiraawo yiɗi ngel.

²⁵O anndini ɗum Daawuda bee hunnduko annabi Natan. Natan inndi ngel Yedidiya[16], ngam daliila wolde Jawmiraawo dow maagel.

²⁶Yo'ab tokki haɓugo bee Rabba, berniwol Ammooni'en maŋngol go. Nde o nyaami laamorde maagol,

²⁷o neli nelaaɓe haa Daawuda, o wi'i mo: “Mi nasti Rabba, mi nyaami nokkuure Seeɓoore Ndiyam.

²⁸Jonta war bee Isra'iila'en luttuɓe fuu, a saŋngina kommbi maagol, a nyaama ngol. Min mi fotaay nyaamugo ngol, ngam taa ngol wi'e bee innde am.”

²⁹Daawuda mooɓti yimɓe fuu, yehi Rabba, ukkani berniwol, nyaami ngol.

³⁰O hooci woronnde wonnde dow hoore lawru Ammooni'en. Teddeeŋga maare waɗi baakin kilo cappanɗe tati (30). Hayre marnde saman ɗuuɗɗo ɗon haa maare. Daawuda waɗi nde dow hoore mum. O wurtini keɓal konu ɗuuɗŋgal masin diga berniwol man.

³¹O wurtini boo yimɓe wonɓe nder maagol. O dooli ɓe huuwugo bee ceekruɗe e tufirɗe njamndi e pe'irɗe njamndi, non boo haa kaatane birikje. Bana non Daawuda waari berniiji Ammooni'en fuu. Nden o hooti Urusaliima bee jama'aare konu maako fuu.