Read Fulfulded 2 Samuyila 13 Bible Online

2 Samuyila 13 - Fulfulded bible

2 Samuyila 13

¹Ɓaawoɗon ndaa ko waɗi: Absalom ɓii Daawuda woodi deerɗiraawo debbo ŋarniiɗo, innde maako Tamar. Amnon ɓii Daawuda, mo daada mum feere, o yiɗi Tamar.

²Yiide maajum sakli mo, nyawni mo, ngam o paanyo mo meeɗaay gorko tawon. Amnon waawaay ɓaditaago mo bee koyɗum.

³Ammaa Amnon woodi soobaajo, ɗum Yonadabu ɓii Sime'a deerɗiraawo Daawuda. Yonadabu o ƴoyɗo masin.

⁴O wi'i Amnon: “Yerima, nde weeti fuu mi ɗon yi'a a ɗon ɓilli. Ko waɗ ma? Yeccam!” Amnon jaabi mo: “Mi yiɗi Tamar, minyiraawo Absalom deerɗam.”

⁵Yonadabu wi'i mo: “Waala dow be'itte ma bana a nyawɗo. To baaba ma wari laarugo ma, wi' mo: Accu deerɗam Tamar wara, waɗanammi nyaamdu. Sey o taaskitina ndu haa ɗo yeeso am, haa mi yi'a, mi nyaama ndu dow juŋngo maako.”

⁶Amnon waɗi hoore muuɗum bana o nyawɗo, o waali. Nde laamiiɗo wari laarugo mo, o wi'i laamiiɗo: “Accu deerɗam Tamar wara, tamsa tamseeje ɗiɗi, haa mi nyaama ɗe dow juŋngo muuɗum.”

⁷Daawuda neli haa Tamar, wi'i mo: “Yah haa suudu deerɗa Amnon, a waɗana mo nyaamdu.”

⁸Tamar yehi, nasti suudu deerɗum. O tawi mo o ɗon waali haa be'itte maako. Tamar hoo'i kuroori, jiiɓi ndi, tamsi tamseeje yeeso Amnon.

⁹Nden Tamar hoo'i feho, rufi tamseeje yeeso maako. Ammaa Amnon sali nyaamugo. O wi'i: “Sey yimɓe woɗɓe fuu ngurto tawon.” Ɓe ngurtini ɓe fuu.

¹⁰Nden o wi'i Tamar: “Waddanam tamseeje haa ɗo haa nder suudu, haa mi nyaama ɗe dow juŋngo ma.” Tamar hoo'i tamseeje, yahrani ɗe deerɗiiko haa nder suudu.

¹¹Nde o ɗon lii'ano mo ɗe, Amnon naŋngi mo, wi'i mo: “War, deerɗam, waaldu bee am.”

¹²Ammaa Tamar jaabi mo: “Naa non, deerɗam, taa toskam, halleende bana nde'e huuwataake nder Isra'iila, taa waɗ ɗum!

¹³Toy njahanmi to a toski yam? An boo a laatoto bana baɗɗo zunuuba nder Isra'iila. Wolwu bee laamiiɗo, naa o te'natam bee maaɗa na?”

¹⁴Ammaa Amnon sali nanango mo, o dooli mo waaldugo bee maako, o toskini mo.

¹⁵Nden Amnon wanyi mo, ɓernde maako heewi nganyŋgu caatuŋgu. Nganyŋgu maako ɓuri yiide maako naane saatugo. O wi'i Tamar: “Umma, dillu!”

¹⁶Tamar jaabi mo: “Naa non, deerɗam. To a riiwi yam jonta, ɗum ɓuran hallugo dow ko mbaɗɗa.” Ammaa Amnon sali nanango mo.

¹⁷O ewni suka maako, o umri mo: “Wurtin oo ɗo suudu am. Maɓɓu dammugal ɓaawo maako.”

¹⁸Suka waɗi ko o umri. Tamar ɗonno ɓorni irin suddaare nde juuɗe, bana nde faanyɓe nder ɓiɓɓe laamiiɗo rewɓe ɓornoto.

¹⁹O seeki nde, o waɗi ndoondi dow hoore maako, o roondi juŋngo maako dow maare, o yaawɗi haa suudu maako, o ɗon wooka.

²⁰Nde Absalom, deerɗiiko yi'i mo, o ƴami: “Amnon naawni ma na? Taa ɗum ɓilla ɓernde ma, deerɗam. Taa waŋgin haala ka'a, ngam o deerɗa.” Tamar jooɗi nder saare deerɗiiko Absalom, o cuniiɗo.

²¹Nde Daawuda nani haala maajum, o tikki masin.

²²Ammaa Absalom wanyi Amnon ngam o toski deerɗiiko debbo. O sali koo wolwididgo bee maako.

²³Duuɓi ɗiɗi ɓaawoɗon, Absalom ewni ɓiɓɓe laamiiɗo fuu haa Ba'al-Hacoor kommbi Efrayim. Ta'ooɓe gaasa baali maako ɗon ton.

²⁴Nden o yehi haa laamiiɗo, o wi'i: “Ndaa, ta'ooɓe gaasa baali ɗon kuuwanammi jonta, barkaama. A waran an e saraaki'en maaɗa, ngam nyaamdugo bee am na?”

²⁵Ammaa laamiiɗo jaabi mo: “Naa non, ɓiŋngel am, ngam taa min njowane doŋngal tedduŋgal.” Absalom tori mo nde ɗuuɗɗum, ammaa laamiiɗo sali yahugo. O jaɓɓiti mo.

²⁶Nden Absalom wi'i: “To an a warataa, accu deerɗam Amnon yahda bee amin.” Laamiiɗo ƴami: “Ngam daliila kaye o yahdata bee ma?”

²⁷Ammaa Absalom ɓilli mo haa laamiiɗo acci Amnon e ɓiɓɓe muuɗum woɗɓe fuu njahda bee maako.

²⁸Nden Absalom umri sukaaɓe muuɗum: “Kakkile, to Amnon yari inaboojam, ɓernde maako seyake, mi umran on mbarugo mo. Taa kule! Mbare mo. Tiɗɗine ɓerɗe mon, laate on semmbiɗɓe e suusɓe, min umri on ɗum.”

²⁹Sukaaɓe Absalom ɗowtani umroore man, mbari Amnon. Ɓiɓɓe laamiiɗo luttuɓe fuu ummi, mba'i alfadariije muuɗum'en, ndoggi.

³⁰Diga ɓe ɗon haa laawol tawon, Daawuda heɓi kubaruwol bi'anŋgol: “Absalom mbari ɓiɓɓe laamiiɗo fuu, walaa koo gooto lutti.”

³¹Laamiiɗo ummi, seeki limce muuɗum, waali haa lesdi. Huuwanooɓe mo wonɓe ton fuu boo ceeki limce muuɗum'en.

³²Ammaa Yonadabu ɓii Sime'a deerɗiraawo Daawuda wi'i: “Taa num ɓe mbari ɓiɓɓe ma fuu, barkaama. Amnon feere mum maayi. Diga o toski Tamar, deerɗiiko debbo, Absalom waɗi anniya waataago ɗum.

³³Taa jawmam laamiiɗo numa ɓiɓɓe muuɗum fuu maayi, ammaa Amnon feere maako tan.”

³⁴Nden Absalom doggi. Wakkati maajum aynoowo ɓaŋgti gite, o yi'i yimɓe ɗuuɗɓe ɗon ngara gal laawol gonŋgol ɓaawo maako, gal becce hooseere. Law o anndini laamiiɗo.

³⁵Yonadabu wi'i Daawuda: “Ɗum ɓiɓɓe ma, bana mi wi'i ma.”

³⁶Nde o timmini wolwugo ɗum, ɓiɓɓe laamiiɗo njotti. Ɓe ɓaŋgti sawtuuji maɓɓe, ɓe mboyi. Laamiiɗo e yimɓe muuɗum boo mboyi bojji ɗuuɗɗi masin.

³⁷Daawuda woyi ɓiyum Amnon nyalɗe ɗuuɗɗe. Ammaa Absalom doggi, yehi haa Talmay ɓii Ammihuuru, laamiiɗo Gesur. O faɓɓi ton duuɓi tati.

³⁹Nde ɓernde Daawuda de'iti dow maayde Amnon, o fuɗɗi yenwugo Absalom.