Read Fulfulded 2 Samuyila 15 Bible Online

2 Samuyila 15 - Fulfulded bible

2 Samuyila 15

¹Ɓaawo man Absalom heɓani hoore mum moota pucci e yimɓe cappanɗe njowo doggooɓe yeeso maako bee kosɗe.

²Nde weeti fuu o ummo fajiri cub, o daro dow laawol kommbi dammugal yahugo saare laamiiɗo. Koo moy wari haa laamiiɗo ngam haala kiita, Absalom ƴama mo: “Toy iwɗaa?” To o nani garɗo oo iwi haa lenyol gootol nder Isra'iila,

³nden kam o wi'a mo: “Haala ma laaɓi, a gooŋɗuɗo. Ammaa walaa mo nanante nder yimɓe laamiiɗo.”

⁴Nden Absalom ɓesda wi'ugo: “Kay! To mi laatake kiitoowo nder lesdi ndi'i, mi gooŋɗinan koo moy garɗo haa am ngam daliila jokkirgol malla wullaandu.”

⁵To goɗɗo ɓaditake mo ngam tuggugo koppi yeeso maako, o forta juŋngo maako, harlo mo, hebbo mo.

⁶Bana nii o waarani Isra'iila'en warɓe haa laamiiɗo ngam waɗaneego kiita fuu. Fewjere nde'e waylitani mo ɓerɗe yimɓe.

⁷Ɓaawo duuɓi cappanɗe nayi Absalom wi'i laamiiɗo: “Accu mi yaha Heburuun, barkaama, mi hebbina togayeere nde toganiimi Jawmiraawo.

⁸Ngam saa'i mi ɗonno jooɗi haa Gesur nder lesdi Siriya, mbi'mi: To Jawmiraawo wartiri yam haa Urusaliima, nden kam mi jagganto mo.”

⁹Laamiiɗo wi'i mo: “Yah jam!” Nden Absalom yehi haa Heburuun.

¹⁰Ammaa o neli nelaaɓe haa le'i Isra'iila fuu, ɓe mbi'a koo toy: “To on nani hoolo luwal, mbi'e: Jonta Absalom laati laamiiɗo haa Heburuun.”

¹¹Worɓe Urusaliima ewnaaɓe teemeɗɗe ɗiɗo njahdi bee Absalom. Ammaa ɓe anndaano anniya maako sam.

¹²Nden Absalom neli haa Gilo ngam ewnoyaago Ahitofel, sawariijo Daawuda. Saa'i maajum o fuɗɗino lii'anaago Jawmiraawo kirsaaɗi. Tuurtol dow laamiiɗo ɓurti saatugo, ngam tokkiiɓe Absalom ɗonno ɓesdo boo.

¹³Goɗɗo wari haa Daawuda, wi'i mo: “Ɓerɗe Isra'iila'en ngaylitanake Absalom.”

¹⁴Daawuda wi'i saraaki'en wonduɓe bee muuɗum haa Urusaliima fuu: “Umme, en ndoggu! To en ndoggaay law, en ndaɗataa Absalom. Njaawɗe, ngam taa o jokko en, taa o sarra en, taa o mbara yimɓe ɗuuɗɓe haa Urusaliima.”

¹⁵Saraaki'en maako mbi'i mo: “Min taaskani waɗugo ko mbi'ɗa fuu, barkaama.”

¹⁶Laamiiɗo wurti berniwol, yimɓe saare muuɗum fuu ndillidi bee maako. Ammaa o acci sulaaɓe sappo ngam haa ɓe ayna saare maako.

¹⁷Nde laamiiɗo e yimɓe mum ngurti berniwol, ɓe ndari haa suudu ragareeru.

¹⁸Yimɓe Daawuda fuu ɗon caalo yeeso maako[17], non boo Kereti'en e Peleti'en e worɓe teemeɗɗe njoweego (600), tokkinooɓe mo diga Gaat.

¹⁹Laamiiɗo wi'i Ittay, Gaatiijo: “Ngam ɗume a yahdata bee amin? Ndikka a hawtana laamiiɗo keso. Naa a koɗo haa ɗo ngam a gurtinaaɗo lesdi ma na?

²⁰Neeɓaay a wari haa amin, jonta boo a dogga bee amin fahin? Min maa mi anndaa haa njahanmi! Lorta nder berniwol, an bee deerɗiraaɓe maaɗa. Jawmiraawo waɗane mbooɗeeŋga e gooŋgaaku.”

²¹Ammaa Ittay wi'i laamiiɗo: “Fakat bana Jawmiraawo o geeto, an boo a geeto barkaama, haa ngonɗa ton ngonanmi, koo to en ngeeɗan malla en maayan boo.”

²²Daawuda wi'i mo: “Booɗɗum, yahdu bee am.” Ittay e worɓe mum e ɓikkoy mum fuu caali yeeso laamiiɗo.

²³Yimɓe Urusaliima mboyi bee hoolo maŋngo, saa'i jama'aare Daawuda ɗon dilla. Laamiiɗo eeri maayel Kederon, kaŋko e yimɓe maako ngam haa ɓe tokko laawol ladde.

²⁴Cadok, limanjo boo warino, kaŋko e Lewi'en roondiiɓe sundukru alkawal Allah. Ɓe njippini ndu, Abiyatar lii'ani Jawmiraawo kirsaaɗi[18] haa wurtiiɓe berniwol fuu caali.

²⁵Laamiiɗo wi'i Cadok: “Lornu sundukru Allah nder berniwol. To Jawmiraawo yerdake yam, o wartirtam haa mi yi'a ndu nder jooɗorde maaru.

²⁶Ammaa to o yerdaaki yam, nden kam o waɗammi ko fottani mo.”

²⁷Laamiiɗo ɓesdi wi'ugo Cadok: “A faami na? Lorta nder berniwol bee jam, an e ɓiya Ahimaas, non boo Abiyatar e ɓiyum Yonatan.

²⁸Ndaa, mi reenan haa eerorde ladde haa to on neldi yam kubar.”

²⁹Cadok e Abiyatar lorni sundukru Allah haa Urusaliima, ɓe njooɗi ton.

³⁰Ammaa Daawuda wa'i dow Hooseere Jaytunje. O ɗon yaha bilaa paɗe, o suddi hoore maako, o ɗon woya. Yimɓe wonduɓe bee maako boo cuddi ko'e muuɗum'en, ɗon mboya.

³¹Goɗɗo wi'i Daawuda: “Ahitofel hawtani Absalom e waɗooɓe tuurtol.” Daawuda tori, wi'i: “Yaa Jawmiraawo, laatin sawari Ahitofel faataare meere!”

³²Nde Daawuda yotti dow hooseere haa yimɓe cujidanta Allah, soobaajo maako Husay Arkiijo fotti bee maako. O seekino limce maako, mbulwuldi ɗon dow hoore maako boo.

³³Daawuda wi'i mo: “To a yahdi bee am, a teddantam.

³⁴Ammaa to a jooɗake nder berniwol, nden kam a waawan wonnugo sawari Ahitofel. Yah haa Absalom, wi'i: Barkaama, mi maccuɗo ma. Ɓooyma, mi huuwani baaba ma, ammaa jonta mi yiɗi huuwango ma”, bana nii mballirta yam.

³⁵Cadok e Abiyatar, liman'en kamɓe boo ɓe ɗon nder berniwol. Koo ɗume nanɗa nder laamorde fuu, yeccu ɓe ɗum.

³⁶Ɓiɓɓe maɓɓe Ahimaas e Yonatan ɗon ngondi bee maɓɓe, kamɓe ɓe ngaddanammi kubaruwol ko nanɗon fuu.

³⁷Ngam maajum Husay, soobaajo Daawuda lori nder berniwol. Saa'i man Absalom nasti Urusaliima.