Read Fulfulded 2 Samuyila 16 Bible Online

2 Samuyila 16 - Fulfulded bible

2 Samuyila 16

¹Nde Daawuda saali yeereere hooseere, Siba, suka Mefiboset fotti bee maako. O woodi bamɗe ɗiɗi daɗɗaaɗe, dimndanaaɗe tamseeje teemeɗɗe ɗiɗi e tame inabooje joorɗe teemerre e ɓiɓɓe leɗɗe belɗe teemerre e kanyakanyaawu[19] inaboojam.

²Laamiiɗo ƴami Siba: “Ko mbaɗata bee kuuje ɗe'e?” Siba jaabi: “Ndaa, bamɗe ngam wa'aago yimɓe saare laamiiɗo, tamseeje e ɓiɓɓe leɗɗe ngam sukaaɓe ma, barkaama, inaboojam boo ngam haa tampuɓe nder ladde njara.”

³Laamiiɗo ƴami: “Toy Mefiboset, taaniraawo jaagorɗo ma Sawulu?” Siba jaabi: “Kaŋko o lutti ɓaawo nder Urusaliima, ngam o tammi ɓe ndokkitan mo laamu maama maako hannde.”

⁴Laamiiɗo wi'i Siba: “To non kam, an jeyi ko Mefiboset mari fuu.” Siba jaabi: “Mi maccuɗo ma, ɗum laato a yerdo yam foroy bana nii barkaama.”

⁵Nde Daawuda yotti Bahuriima, Sim'i ɓii Gera, goɗɗo saare Sawulu wurti wuro man, o ɗon naala laamiiɗo,

⁶o ɗon fiɗa mo bee kaa'e, kaŋko e yimɓe maako koo nde yimɓe fuu e honooɓe suusɓe ɗon haa nyaamo e nano laamiiɗo.

⁷Ndaa nii o hooldi: “Dillu ɗo, dillu, an mbaroowo, meereejo!

⁸Jonta Jawmiraawo hiitoto aybe ma dow saare Sawulu. Ƴiiƴam mbaraaɓe fuu waran dow hoore ma. Laamu ngu njaɓtuɗa haa juŋngo Sawulu, Jawmiraawo hokki ngu ɓiya Absalom. Jonta kam a nasti bone, an mbaroowo.”

⁹Abisay ɓii Seruyatu wi'i laamiiɗo: “Koni rawaandu waatndu ndu'u huɗete, barkaama? Accu mi yaha, mi ta'a hoore maako.”

¹⁰Ammaa laamiiɗo wi'i: “Kadi ɗum haala mooɗon na, onon ɓiɓɓe Seruyatu? To o huɗi yam ngam Jawmiraawo umri mo ɗum, moy foti wi'go: Ngam ɗume mbaɗɗa ɗum?”

¹¹Nden o wi'i Abisay e sukaaɓe maako fuu: “On anndi ɓiɗɗo am mo ndanymi ɗum, kaŋko o ɗon ɗaɓɓa mbarugo yam. Nden on ɗon kayɗina goɗɗo mo lenyol Benyamin kuɗanɗo yam na? Acce mo o huɗa, Jawmiraawo umri mo ɗum.

¹²Sey mi munyana kuudi maako jonta. Teema Jawmiraawo laaran ɓillaare am, o wartira ndi barka.”

¹³Daawuda e yimɓe mum tokkitini jahaaŋgal muuɗum'en, Sim'i boo ɗon tokki ɓe haa wuttudu hooseere, o ɗon ɓadi bee Daawuda. O ɗon naala mo, o ɗon fiɗa mo bee kaa'e e o ɗon ukka mo mbulwuldi.

¹⁴Wakkati laamiiɗo e yimɓe mum fuu njotti waadiwol Urdun, ɓe comi masin. Ɓe ciwti ton.

¹⁵Absalom e Isra'iila'en tokkiiɓe mo fuu nasti Urusaliima. Ahitofel boo ɗon wondi bee maɓɓe.

¹⁶Husay Arkiijo, soobaajo Daawuda wari haa Absalom, wi'i: “Allah juttin balɗe laamiiɗo!”

¹⁷Absalom ƴami mo: “E noy amaana ma bee soobaajo ma Daawuda? Ko waɗi a yahdaay bee maako?”

¹⁸Husay jaabi: “Aa'a, ɗum waɗataako. Mi jeyaaɗo gorko mo Jawmiraawo e Isra'iila'en fuu cuɓi. Haa maako njooɗotoomi boo.

¹⁹Moy mi huuwanta kadi? Naa a ɓiɗɗo Daawuda na? Bana mi huuwrani baaba ma, bana non mi huuwrante an boo.”

²⁰Absalom wi'i Ahitofel: “Dawranam. Ko mbaɗeten jonta?”

²¹Ahitofel jaabi mo: “Baaba ma acci sulaaɓe mum ngam aynugo saare. Hoo'u ɓe, waaldu bee maɓɓe. Bana nii koo moy nder Isra'iila anndan a konneejo baaba ma haa foroy, tokkiiɓe ma fuu cemmbiɗan.”

²²Ɓe ndarni laymaaru ngam Absalom dow soorowol nder laamorde. Absalom waaldi bee sulaaɓe baaba muuɗum yeeso Isra'iila'en fuu.

²³Nder nyalɗe maajum, sawari Ahitofel laati bana koŋngol iwŋgol diga Allah. Sawariiji ɗi o sarwi Daawuda e Absalom fuu laati bana non.