Read Fulfulded 2 Samuyila 18 Bible Online

2 Samuyila 18 - Fulfulded bible

2 Samuyila 18

¹Daawuda limti jama'aare mum fuu, o darni ardiiɓe e hoore'en dow geɓe honooɓe ujineere ujineere e geɓe honooɓe teemerre teemerre fuu.

²Nden o hawti ɓe fuu nder geɓe mawɗe tati, o neli ɓe haa konu: Yo'ab, Abisay ɓii Seruyatu deerɗiraawo Yo'ab e Ittay Gaatiijo, ardini koo moy yeɓre woore. Laamiiɗo wi'i ɓe: “Min boo, fakat mi yahdan bee mooɗon.”

³Ammaa ɓe mbi'i mo: “Aa'a, taa a nasta haɓre. To minin fuu min ndoggi, konne'en kakkilantaa ɗum. Koo to reeta amin maayi boo, ɓe ndaarataa ɗum bana mawɗum. Ammaa an feere ma a laati bana ujine sappo nder amin. Ndikka a jooɗo nder berniwol, a nelana min ballal nder wakkati haaje.”

⁴Laamiiɗo wi'i: “Booɗɗum, mi waɗan ko fottani on.” Nden o dari haa dammugal berniwol, saa'i yimɓe ɗon ngurto fodde teemeɗɗe muuɗum'en e ujineeje muuɗum'en.

⁵O umri Yo'ab e Abisay e Ittay: “Ngam daliila am kakkilane Absalom sukaajo oo.” Yimɓe fuu nani ko Daawuda umri ardiiɓe ɓe'e.

⁶Yimɓe Daawuda ngurti yaasi. Ɓe kaɓi bee Isra'iila'en nder laynde Efrayim.

⁷Ɓe njaali ɓe jaalorgal maŋngal, Isra'iila'en ujine noogas mbaraama.

⁸Haɓre saŋkiti nder lesdi man fuu. Laynde mbari yimɓe ɗuuɗɓe, ɓuri kaafahi.

⁹Absalom fototiri bee yimɓe Daawuda, o ɗonno wa'i alfadariire. Nde o ɗon saalo les lekki feere makki, lice maaki naŋngi gaasa hoore maako. Alfadariire maako doggi, kaŋko o ɗon ɓili dow. Yimɓe Daawuda woɗɓe ngi'i ɗum.

¹⁰Gooto nder yiiɓe ɗum, yehi, yecci ɗum Yo'ab. O wi'i: “Ndaa, Absalom ɗon ɓili haa lekki makki to.”

¹¹Yo'ab wi'i mo: “Asee, a yi'i mo na? Koni a mbaraay mo ton ton? Mi hokkanno ma ceede cardi sappo e taadorgol booɗŋgol.”

¹²Ammaa gorko oo jaabi Yo'ab: “Koo to a limani yam ceede cardi ujineere haa newre am, juŋngo am meemataa ɓii laamiiɗo. Minin fuu min nani ko laamiiɗo umri ma, an e Abisay e Ittay, o bi'ɗo: Kakkilane Absalom sukaajo oo.

¹³Fakat to mi ɗowtanaakino umroore laamiiɗo, o anndanno ɗum, ngam o heɓtan koo ɗume fuu, an boo a accanno yam feere am.”

¹⁴Yo'ab wi'i: “Kayya, mi yiɗaa majjingo wakkati am haa maaɗa bana nii.” O hoo'i jaare tati, o ɗisi ɗe nder ɓernde Absalom ɓilaaɗo nder lice lekki go, o ɗonno foofa tawon.

¹⁵Sukaaɓe Yo'ab sappo, roondooɓe balmi maako taari Absalom, ɓe timmini mo.

¹⁶Ɓaawo maajum Yo'ab fuufi luwal ngam haa o naŋgta yimɓe maako. Ɓe acci taasnugo Isra'iila'en.

¹⁷Ɓe koo'i ɓanndu Absalom, ɓe ngubi ndu nder ngaska lugguka haa laynde maajum. Ɓe mbaagi waagaare kaa'e townde dow maaka. Ammaa Isra'iila'en fuu ndoggi, koo moy haa saare mum.

¹⁸Saa'i Absalom ɗonno yeeɗi tawon, o darnino hayre maandorde ngam hoore maako nder waadiwol laamiiɓe. O wi'no: “Mi walaa ɓiɗɗo tabitinanɗo innde am.” Ngam maajum o inndi hayre man bee innde maako. Haa wargo hannde nde ɗon wi'e Maandorde-Absalom.

¹⁹Ahimaas wi'i Yo'ab: “Accu mi yaawɗo, mi yahrana laamiiɗo kubar jaalorgal ngal Jawmiraawo hokki mo dow konne'en maako.”

²⁰Ammaa Yo'ab jaabi mo: “An a yahrantaa mo kubar hannde. Sey a yahra ngol nyannde feere, ammaa naa hannde, ngam ɓii laamiiɗo maayi. Kubaruwol ngo'ol wooɗaay.”

²¹Yo'ab umri Kusiijo, suka Daawuda: “Yah, yeccu laamiiɗo ko ngi'ɗa.” Suka turi yeeso Yo'ab, nden dilli.

²²Ahimaas fuɗɗiti, wi'i Yo'ab: “Ko waɗata fuu waɗa. Accu mi yaawɗo ɓaawo Kusiijo.” Yo'ab wi'i mo: “Ngam ɗume a ɗaɓɓata yahugo, ɓiyam? Kubar maajum heɓnataa ma ngeenaari.”

²³Ahimaas jaabi: “Bee non fuu mi yahan.” Yo'ab wi'i mo: “Yah.” Ahimaas dilli, tokki laawol waadiwol Urdun. O yaawɗi haa o saali Kusiijo.

²⁴Daawuda ɗon jooɗi haa nastirde berniwol Goɗɗo aynoowo wa'i dow soorowol dammugal haa dow mahol taariiŋgol berniwol. Nde o ɗon laara, o eewi goɗɗo ɗon wara feere muuɗum bee pargal.

²⁵O anndini ɗum laamiiɗo. Laamiiɗo wi'i: “To ɗum gooto tan, nden kam o waddan kubaruwol booɗŋgol.” Saa'i gorko man ɗon ɓadito,

²⁶aynoowo yi'i goɗɗo feere boo ɗon wara bee pargal. O yecci ɗum doogariijo haa dammugal. Laamiiɗo wi'i: “Kaŋko boo o ɗon wadda kubaruwol booɗŋgol.”

²⁷Aynoowo wi'i: “Mi ɗon yi'a arano ɗon yaawɗo bana Ahimaas.” Laamiiɗo wi'i: “Kaŋko woni goɗɗo booɗɗo. O ɗon warda bee kubaruwol ceynoowol.”

²⁸Ahimaas wookani laamiiɗo: “Jam koo ɗume!” Nden o tuggi koppi, waali, hippi yeeso maako, o wi'i: “Yettoore laatano Allah Jawmiraawo maaɗa mo hokki ma tuurtanɓe ma haa juŋngo ma, barkaama.”

²⁹Laamiiɗo ƴami mo: “E Absalom sukaajo oo, o jamo na?” Ahimaas jaabi: “Wakkati Yo'ab neli suka ma e min fuu, mi yi'i laanyotiral maŋngal. Ammaa mi anndaa ɗum ɗume.”

³⁰Laamiiɗo wi'i mo: “Dara ɗo kommbi am.” O waɗi non.

³¹Kusiijo boo wari wi'i: “Mi waddi kubaruwol ceynoowol, barkaama. Jawmiraawo hokki ma jaalorgal dow tuurtanɓe ma fuu.”

³²Laamiiɗo ƴami mo: “E noy Absalom sukaajo oo? O jamo na?” Kusiijo jaabi: “Konne'en ma e tuurtanɓe ma fuu, barkaama, sey ɓe laato bana maako.”