Read Fulfulded 2 Samuyila 22 Bible Online

2 Samuyila 22 - Fulfulded bible

2 Samuyila 22

¹Nyalaade nde Jawmiraawo hisni Daawuda diga juuɗe konne'en muuɗum e juuɗe Sawulu fuu, Daawuda yimani Jawmiraawo yimre nde'e:

²Yaa Jawmiraawo, an woni tapaare suuɗirde am, an woni suudu am semmbiɗndu, an woni kisnoowo yam boo.

³Yaa Allah, an woni tapaare hisrude am haa nyukkotoomi, an woni wawarde[28] am, an woni kisnoowo yam cemmbiɗɗo, hisrude am townde. Haa maaɗa tawmi hisrude, a hisni yam toonyaaŋge fuu.

⁴Mi tori Jawmiraawo, kaŋko o hisni yam. Yettoore laatano mo!

⁵Waade taari yam bee ƴuuge maare, maaje halkere kulni yam.

⁶Mi nasti tuuforli joonde maayɓe, waade taari yam bee kaɓɓorli maare.

⁷Nder ɓillaare am toriimi Jawmiraawo, mi wookani Allah am. Diga haykaliiru maako o nani sawtu am, gookaali am njotti noppi maako.

⁸Nden lesdi dimmbi, diwni. Caɓɓaaje asama ndiwni, ndimmbi ngam tikkere maako.

⁹Cuurɗe ngurti haa kine maako, yiite nyaamooye wurti haa hunnduko maako, jamni ƴulɓe.

¹⁰O wuuri asama, o jippi, duule ɓaleeje ɗon les kosɗe maako.

¹¹O wa'i dow keruba, o fiiri, o waŋgi dow henndu.

¹²O suuɗi nder nyiɓre, o moji duule ɓaleeje keewɗe ndiyam.

¹³Bana ƴulɓe yiite, non jayŋgol yeeso maako.

¹⁴Jawmiraawo telɓi haa asama bana felmaaŋgo, Allah Ɓaŋiiɗo towni sawtu mum.

¹⁵O fiɗi kuri maako, o saŋkiti konne'en maako. O sakkini ma'e, o hulni ɓe.

¹⁶Ndiyam mbeela seeki, les maaga waŋgi, caɓɓaaje duniyaaru cudditaama ngam daliila telɓuki Jawmiraawo, ngam poofɗe tikkere gurtiiɗe haa kine maako.

¹⁷Diga dow Jawmiraawo forti juŋngo mum, naŋngi yam, wurtini yam ndiyam lugguɗam.

¹⁸O hisni yam juuɗe konneejo am cemmbiɗɗo e juuɗe wanyɓe yam fuu, ɓurduɓe yam semmbe.

¹⁹Nyalaade sarru am ɓe ukkani yam, ammaa Jawmiraawo jogi yam ngam taa mi do'o.

²⁰O wurtini yam ɓillaare, o hisni yam ngam o yerdi yam.

²¹Jawmiraawo warji yam fodde adilaaku am, o woonani yam ngam o anndi kuuɗe am ɗe laaɓɗe.

²²Ngam mi tokki laabi Jawmiraawo, mi waɗaay aybe dow Allah am, mi waylitanaay mo ɓaawo.

²³Mi ɗowtani kiitaaji maako fuu, mi luutaay farillaaji maako.

²⁴Mi walaa aybe yeeso maako, mi reenti taa mi waɗa hakke.

²⁵Ngam maajum Jawmiraawo warji yam fodde adilaaku am, ngam o anndi mi laaɓɗo yeeso maako.

²⁶Yaa Jawmiraawo, a adiliijo haa adili'en, a booɗɗo haa wooɗɓe,

²⁷a laaɓɗo haa laaɓɓe, ammaa haa faasiki'en, a ɗon hollita ɓe hikma ma.

²⁸A hisnan ummaatoore toskaande. A ɗon laara mawnitiiɓe, a leesnan ɓe.

²⁹Jawmiraawo woni pittirla am, Jawmiraawo ɗon yayna nyiɓre haa ngonmi.

³⁰Bee ballal ma mi ukkanto mooɓre konne'en, bee Allah am ndiwanmi mahol boo.

³¹Laawol Allah, ngol timmuŋgol, wolde Jawmiraawo laaɓi tal. O wawarde suuɗotooɓe haa maako.

³²Jawmiraawo meeɗen feere muuɗum woni Allah, Allah meeɗen tan woni tapaare hisrude.

³³Allah woni hisrude am semmbiɗnde, o waɗani yam laawol darnuŋgol.

³⁴O laatini kosɗe am bana ɗe lelwa, o tabitini yam dow towndiije.

³⁵O ekkitini juuɗe am haɓre, haa mi tira koo lagaawal njamndi bee juuɗe am boo.

³⁶Yaa Jawmiraawo, kisndam ma ɗon aynammi bana wawarde, hinnuye ma mawnini yam.

³⁷A yaajini babal am, mi ɗon waanca nder feecaare, kolɓule am ndimmbataako.

³⁸Mi taasni konne'en am, mi halki ɓe, mi lorataako sey to mi nattini ɓe fuu.

³⁹Mi nattini ɓe, mi do'i ɓe, ɓe ummitittaako, ɓe mbaalake les kosɗe am.

⁴⁰A hokki yam semmbe ngam waɗugo haɓre, haa mi jaalo konne'en am.

⁴¹A lorni konne'en am ɓaawo, mi nattini wanyɓe yam.

⁴²Ɓe tefi ballal, ammaa walaa mo walli ɓe. Ɓe ewni Jawmiraawo, ammaa o jaabaaki ɓe.

⁴³Mi ɗiggini ɓe, haa ɓe laati bana collaaje. Mi nami ɓe, mi yaaɓi ɓe bana loope dow laawol.

⁴⁴A hisni yam jokkirli ummaatoore am. A waɗi yam laamiiɗo ummaatooje, jama'aare nde mi anndaano, huuwantam.

⁴⁵Jananɓe tefi fottango yam bee bolle belɗe, nde ɓe nani habaru am, ɓe ɗowtani yam.

⁴⁶Jananɓe tampi, ɓe ngurti kisruɗe maɓɓe bee diwŋgol.

⁴⁷Jawmiraawo o geeto! Yettoore laatano tapaare hisrude am! Maŋgtoore laatano Allah Kisnoowo yam cemmbiɗɗo!

⁴⁸Allah o baatoowo konne'en am, o ɗon leesnani yam ummaatooje,

⁴⁹o kisnoowo yam diga juuɗe wanywanyɓe yam. A dokkoowo yam jaalorgal dow konne'en am, a kisnoowo yam diga juuɗe fitinooɓe yam.

⁵⁰Ngam maajum, yaa Jawmiraawo, mi yettete caka ummaatooje, mi yiman maŋgtoore tedduŋgal innde ma.

⁵¹An, a hokki jaalorgal maŋngal haa laamiiɗo mo cuɓɗa, a ɗon waɗa mbooɗeeŋga haa moytaaɗo ma, Daawuda e danygol muuɗum haa foroy!