Read Fulfulded 2 Samuyila 23 Bible Online

2 Samuyila 23 - Fulfulded bible

2 Samuyila 23

¹Ndaa bolle Daawuda ragareeje: Nane, Daawuda ɓii Yessa ɗon wolwa, goɗɗo mo Allah ɓaŋgti masin, mo Allah Yaakubu moyti, mo yimi gimi booɗɗi ngam Isra'iila.

²Ruuhu Jawmiraawo ɗon dow am, o ɗon wolwira bee hunnduko am.

³Allah aynoowo Isra'iila wi'i: “Laamaniiɗo yimɓe mum bee adilaaku, laamoriiɗo bee kulol Allah,

⁴o ɗon nanndi bee jayŋgol naaŋge fajiri, wakkati duule ngalaa, puɗnanŋgol huɗo hecco ɓaawo iyeende.”

⁵Allah woonani danygol am, o haɓɓi alkawal duumiiŋgal bee am, o tabitini ngal bee farillaaji laaɓɗi, o hokkatam jaalorgal, o hebbitinan anniyaaji am fuu.

⁶Ammaa halluɓe ɗon nanndi bee gi'e gudinaaɗe ɗe goɗɗo meemataa bee juŋngo mum.

⁷Bee njamndi malla kalasal labbo o eftata ɗe, ngam fakat o wula ɗe haa nokkuure maaje.

⁸Ndaa honooɓe Daawuda hoore'en suusɓe: Yoseb-ba-sebet Hakmoniijo woni hooreejo honooɓe tato. O bi'eteeɗo boo Adino Eskiijo. O dimmbi labbo maako dow konne'en teemeɗɗe njoweetato (800), o mbari ɓe nder haɓre woore.

⁹Ɓaawo maako Eli'azaaru ɓii Doodo Ahohiijo. O gooto nder suusɓe tato. Kaŋko o wonduno bee Daawuda nde ɓe ndarti Filisti'en mooɓtiiɓe ngam haɓre, yaake Isra'iila'en woɗɓe lorti, mba'i towndiije.

¹⁰Kaŋko o ɗon dari, o ɗon mbara Filisti'en haa juŋngo maako somi, takki kaafahi. Nyalaade maajum Jawmiraawo waɗi jaalorgal maŋngal. Nde jama'aare Isra'iila'en lori, walaa ko luttani ɓe waɗugo, sey ɓoftugo keɓal konu tan.

¹¹Tataɓo maɓɓe, Samma ɓii Aage mo Harar. Filisti'en mooɓi ngam haɓre bana goɗɗo gooto. Woodino ton tayre ngesa, ka heewi irin nyebbe feere. Isra'iila'en ndoggi Filisti'en,

¹²ammaa kaŋko o dari caka tayre ngesa man, o hisni nde, o jaali Filisti'en. Bana nii Jawmiraawo waari jaalorgal maŋngal.

¹³Wakkati feere saa'i codol, jama'aare Filisti'en ɗonno saŋngini nder waadiwol Refayim. Tato nder honooɓe Daawuda semmbiɗɓe cappanɗe tato ndiirti, ngari haa Daawuda nder lowol Adullam.

¹⁴Saa'i maajum Daawuda ɗonno haa hisrude, Filisti'en aynooɓe boo ɗonno haa Baytilaama.

¹⁵Daawuda yeli, wi'i: “Moy yarnatammi ndiyam ɓulndu wonndu haa dammugal Baytilaama?”

¹⁶Suusɓe tato man nasti caka saŋngeere Filisti'en, nyeɗi ndiyam ɓulndu haa dammugal Baytilaama, ngaddi ɗam haa Daawuda. Ammaa o sali yarugo ɗam. O rufi ɗam, ɗam laati dokkal ngam Jawmiraawo.

¹⁷O wi'i: “Jawmiraawo, mi waɗataa irin ɗu'um! Kadi mi yara ƴiiƴam worɓe ɓe'e na? Ngam ɓe kasdi koo maayugo ngam waddango yam ndiyam man.” Ngam maajum o sali yarugo ɗam. Bana nii kuuɗe suusɓe tato ɓe'e mba'i.

¹⁸Abisay deerɗiraawo Yo'ab woni hooreejo suusɓe tato man. O mbari konne'en teemeɗɗe tato (300) bee labbo maako. O heɓi innde caka suusɓe tato.

¹⁹O laati hooreejo suusɓe tato, ammaa o yottaaki darnde suusɓe.

²⁰Benaya ɓii Yoyada mo Kabseyel, o cemmbiɗɗo, o huuwi kuuɗe mawɗe ɗuuɗɗe. O mbari ɓiɓɓe Ariyel Mo'abiijo ɗiɗo. Nyannde feere nde mallimallooje toɓi, o jippi nder ɓulndu o mbari mbarooga ton.

²¹O mbari boo Misraajo cemmbiɗɗo, jogiiɗo labbo haa juŋngo mum. Benaya walaa balmi, sey sawru tan. Ammaa o taasni Misraajo go, o jaɓti labbo mum, o mbari mo bee maago.

²²Kanjum Benaya ɓii Yoyada waɗi. O heɓi innde bana suusɓe tato go.

²³O ɓurdi suusɓe cappanɗe tato go tedduŋgal, ammaa o yottaaki darnde suusɓe tato. Daawuda darni mo o hooreejo aynooɓe muuɗum.

²⁴Asa'el deerɗiraawo Yo'ab ɗon nder semmbiɗɓe cappanɗe tato go. Ndaa ɓe'e ngondi bee maako: Elhanan ɓii Doodo mo Baytilaama,

²⁵Samma mo Harood, Elika mo Harood,

²⁶Heeles mo Palet, Iira ɓii Ikkes mo Teko'a,

²⁷Abi'ezer mo Anatot, Mebunay mo Husa,

²⁸Calmon mo Ahoh'a, Maharay mo Netofa,

²⁹Heeleb ɓii Ba'ana mo Netofa, Ittay ɓii Ribay mo Gibiya nder lesdi Benyamin,

³⁰Benaya mo Piraton, Hidday iwɗo waadiiji Ga'as,

³¹Abi-Albon mo Arba, Azmawet mo Baharuuma,

³²Eliyaba mo Sa'albon, ɓiɓɓe Yasen, Yonatan, Samma mo Harar, Ahiyam ɓii Sarar mo Harar,

³⁴Elifelet ɓii Ahasbay mo Ma'aka, Eliyam ɓii Ahitofel mo Gilon,

³⁵Hesray mo Karmel, Pa'aray mo Araba,

³⁶Yigal ɓii Natan mo Soba, Baani ɓii Gad,

³⁷Selek Ammooniijo, Naharay mo Beerot, doondoowo balmi Yo'ab ɓii Seruyatu,

³⁸Iira mo Yatir, Gareb mo Yatir,

³⁹Uriya Hetiijo. Limgal honooɓe Daawuda semmbiɗɓe fuu, cappanɗe tato e njoweeɗiɗo.