Read Fulfulded 2 Samuyila 4 Bible Online

2 Samuyila 4 - Fulfulded bible

2 Samuyila 4

¹Nde Isboset ɓii Sawulu nani haala maayde Abineer haa Heburuun, o soofi, Isra'iila'en fuu cakli.

²Isboset woodino ardiiɓe wiftooɓe ɗiɗo, innde gooto Ba'ana, innde oya boo Rekab. Ɓe ɓiɓɓe Rimmon mo Beerot nder lenyol Benyamin, ngam Beerot limdaama bee lesdi Benyamin.

³Ɓooyma, yimɓe Beerot ndoggi haa Gittayim, ɓe ɗon njooɗi ton haa wargo hannde.

⁴Woodino taaniraawo Sawulu boo, Mefiboset ɓii Yonatan. O woodino duuɓi jowi nde kubar maayde Sawulu e Yonatan warino diga Yisre'el. Debbo mawninoowo mo jogi mo, doggi bee maako. Ammaa ngam daliila jaawal maako, o yoofti ɓiŋngel, ngel do'i, ngel jiiji haa kosɗe maagel ɗiɗi fuu.

⁵Rekab e Ba'ana go njehi haa saare Isboset. Ɓe njotti ton caka nyalawma, naaŋge wuli masin. Isboset ɗonno waali dow be'itte.

⁶Ɓe nasti saare ngam hoocugo alkamaari, ɓe tawi Isboset ɗon waali haa suudu muuɗum dow be'itte. Ɓe njuwi mo haa reedu, ɓe mbari mo, ɓe ta'i hoore maako, ɓe koo'i nde. Nden ɓe tokki laawol waadiwol Urdun jemmaare fuu, ɓe ndilli.

⁸Ɓe njahri hoore Isboset haa Heburuun haa Daawuda. Ɓe mbi'i laamiiɗo: “Ndaa hoore Isboset ɓii konneejo ma Sawulu, ɗaɓɓunooɗo mbarugo ma. Hannde Jawmiraawo waatani ma dow Sawulu e asŋgol mum, barkaama.”

⁹Daawuda jaabi ɓe: “Fakat mi ɗon wi'a bee innde Jawmiraawo geeto, kisnuɗo yam ɓillaare fuu!

¹⁰Naane goɗɗo wari haa am haa Cikilak, yecci yam Sawulu maayi. O tammi kubaruwol belŋgol ngo'ol seynatam. Ammaa mi umri ɓe naŋngi mo, ɓe mbari mo, kanjum woni ngeenaari kubar maako.

¹¹Kadi on tammi mi hiitataako worɓe halluɓe mbarɓe goɗɗo gooŋgaajo baaliiɗo nder suudu mum na? Fakat mi ƴaman ƴiiƴam maako haa mooɗon, mi nattina on haa lesdi!”

¹²Daawuda umri sukaaɓe mum, ɓe mbari Rekab e Ba'ana. Nden ɓe ta'i juuɗe maɓɓe e kosɗe maɓɓe, ɓe ɓili ɓalli maɓɓe kommbi weendu nder Heburuun. Ammaa hoore Isboset, ɓe koo'i nde, ɓe uwi nde nder yenaande Abineer haa Heburuun.