Read Fulfulded 2 Samuyila 5 Bible Online

2 Samuyila 5 - Fulfulded bible

2 Samuyila 5

¹Le'i Isra'iila fuu ngari haa Daawuda haa Heburuun. Ɓe mbi'i mo: “Minin min banndiraaɓe ma nder ummaatoore woore.

²Koo naane, wakkati Sawulu laamani min boo, an ardi jama'aare konu Isra'iila. Jawmiraawo boo wi'i ma: An ɗowata Isra'iila'en ummaatoore am, a laatoto ardiiɗo maɓɓe.”

³Nden ndotti'en Isra'iila fuu ngari haa Heburuun. Laamiiɗo Daawuda haɓɓi alkawal bee maɓɓe yeeso Jawmiraawo. Ɓe moyti mo, bana nii ɓe mbaɗi mo laamiiɗo Isra'iila.

⁴Daawuda woodi duuɓi cappanɗe tati, saa'i o laamo. O laami duuɓi cappanɗe nayi.

⁵Haa Heburuun o laamani Yahuuda duuɓi joweeɗiɗi e lebbi joweego. Haa Urusaliima boo o laami duuɓi cappanɗe tati e tati dow Isra'iila e Yahuuda fuu.

⁶Nden laamiiɗo Daawuda yahdi bee honooɓe muuɗum haa Urusaliima ngam honugo Yebusi'en jooɗiiɓe ton. Ammaa ɓe mbi'i mo: “A waawataa nyaamugo berniwol amin, wumɓe e jiijiiɓe ke'i riiwugo ma” bana wi'go Daawuda nastataa haa ɗo.

⁷Daawuda nyaami berniwol cemmbiɗŋgol dow Siyona, ɓe inndi ngol Berniwol Daawuda.

⁸Nyalde maajum Daawuda wi'i: “Koo moy giɗɗo jaalaago Yebusi'en, sey tokkoro laawol gasaaŋgol dow hooseere. Daawuda wanyi wumɓe e jiijiiɓe go. Ngam maajum yimɓe umri: Wumɓe e jiijiiɓe nastataa suudu Jawmiraawo.”

⁹Daawuda yeni dow berniwol ngol, o inndi ngol Berniwol Daawuda. O ɓesdi nyiɓugo nder taarde maagol, o fuɗɗi diga Millo[8] haa yotti nder maagol.

¹⁰Baawɗe Daawuda ɓesdi yeeso yeeso, ngam Allah, Jawmiraawo honooɓe asama ɗon wondi bee maako.

¹¹Hiram, laamiiɗo Tirus neli nelaaɓe haa Daawuda. O neldi boo leɗɗe cemmbiɗɗe boo, bee sehooɓe e mahooɓe. Ɓe mahani mo laamorde.

¹²Daawuda annditi Jawmiraawo tabitini mo o laamiiɗo, Jawmiraawo samɗini laamu maako ngam o yiɗi yimɓe maako Isra'iila'en.

¹³Ɓaawo Daawuda ummi Heburuun, wari Urusaliima, o hoo'i rewɓe e sulaaɓe woɗɓe. Ɓe ndanyani mo ɓiɓɓe worɓe e rewɓe.

¹⁴Ndaa inɗe ɓiɓɓe worɓe danyanaaɓe mo haa Urusaliima: Sammu'a e Sobaba e Natan e Suleymaanu

¹⁵e Yibehar e Elisuwa e Nefek e Yafiya

¹⁶e Eliisama e Eliyada e Elifelet.

¹⁷Nde Filisti'en nani Isra'iila'en mbaɗi Daawuda laamiiɗo muuɗum'en, Filisti'en fuu ngari haa ɓe ɗaɓɓita mo. Nde Daawuda nani ɗum, o jippi nder hisrude.

¹⁸Filisti'en ngari, kippi waadiwol Refayim.

¹⁹Daawuda ƴami Jawmiraawo: “Mi haɓa bee Filisti'en na? A hokkatam jaalorgal dow maɓɓe na?” Jawmiraawo jaabi mo: “Yah, fakat mi hokkete.”

²⁰Daawuda yehi, jaali Filisti'en. O wi'i: “Jawmiraawo seeki caka konne'en am bana ildugol ndiyam.” Ngam maajum nokkuure nde'e wi'ete Ba'al-Perasiima[9].

²¹Filisti'en ndoggi, acci suuraaji labbi muuɗum'en ton, Daawuda e yimɓe mum kooci ɗi.

²²Fahin Filisti'en ngari, kippi waadiwol Refayim.

²³Daawuda ƴami Jawmiraawo kadiboo. Jawmiraawo jaabi mo: “Taa ukkana ɓe diga ɗo, ammaa sel ɓaawo maɓɓe, war dow maɓɓe diga wakeere leɗɗe balsani.

²⁴To a nani sonyo palanɗe kosɗe dow ko'e leɗɗe man, nden kam ukkana ɓe, ngam min mi ɗon aarta yeeso maaɗa, mi jaalo Filisti'en.”

²⁵Daawuda waɗi ko Jawmiraawo umri mo. O mbari Filisti'en diga Geba haa yotti Gezer.