Read Fulfulded 1 Laamiiɓe 1 Bible Online

1 Laamiiɓe 1 - Fulfulded bible

1 Laamiiɓe 1

¹Laamiiɗo Daawuda ndottidi masin, duuɓi maako ɗuuɗi. Ɓe cuddi mo bee limce, ammaa o maataay gulɗum.

²Nden jaggiiɓe maako mbi'i mo: “Barkaama min njahan min ɗaɓɓitane paanyo debbo mo meeɗaay anndugo gorko sam ngam o huuwane e o hakkilane, o waalo haa kommbi ma ngam a maata gulɗum.”

³Ɓe ɗaɓɓiti paanyo debbo ŋarniiɗo nder maral Isra'iila fuu. Ɓe tawi Abisag Sunemiijo, ɓe ngaddi mo haa laamiiɗo.

⁴Paanyo debbo oo, o ŋarniiɗo masin. O laati kakkilanoowo laamiiɗo, o ɗon huuwana mo. Ammaa laamiiɗo meeɗaay anndugo mo.

⁵Adoniya ɓii Daawuda mo Haggit danyani mo mawniti, wi'i: “Min mi laamoto.” Non o taaskani hoore maako mootaaji pucci e wa'iiɓe e worɓe cappanɗe njowo dogganɓe yeeso maako.

⁶Baaba maako meeɗaay felugo mo sam, ƴamaay mo: “Koni mbaɗata ɗum?” Adoniya o ŋarniiɗo, daada[1] maako danyno mo ɓaawo Absalom.

⁷Adoniya sarwotiri bee Yo'ab ɓii Seruyatu e Abiyatar limanjo. Ɓe mballi Adoniya, ɓe tokki mo.

⁸Ammaa Cadok limanjo e Benaya ɓii Yoyada e annabi Natan e Sim'i e Ree'i e yimɓe Daawuda suusɓe, ɓe fuu ɓe tokkaaki Adoniya.

⁹Nyannde feere Adoniya taaski juulde mawnde, o hirsi dammooji e ga'i e nyalbi payɗi haa hayre Sohelet baŋnge En-Rogel. O ewni deerɗiraaɓe maako, ɓiɓɓe laamiiɗo fuu e jagganiiɓe laamiiɗo Yahuudu'en fuu.

¹⁰Ammaa o ewnaaki annabi Natan e Benaya e aynooɓe e laamiiɗo Suleymaanu, deerɗiiko.

¹¹Nden Natan wi'i Bat-Seeba, daada Suleymaanu: “A nanaay habaru Adoniya ɓii Haggit laamake na? Jaagorɗo men Daawuda boo anndaa ɗum.

¹²Kadi nan ko mi sarwoto ma, ngam haa a hisna yoŋki ma e ki ɓiya Suleymaanu.

¹³Yah, nastu suudu laamiiɗo Daawuda. Wi' mo: Yaa jawmam laamiiɗo, an a hunani yam, min korɗo ma, a wi'i: Ɓiya Suleymaanu laamoto ɓaawo am, kaŋko o jooɗoto dow leeso laamu am. Kadi, ngam ɗume Adoniya laami jonta?”

¹⁴Natan ɓesdi wi'ugo: Diga a ɗon wolida bee laamiiɗo tawon, min boo mi waran, mi semmbiɗina bolle ma.

¹⁵Bat-Seeba yehi, nasti suudu laamiiɗo, laamiiɗo ndottidi masin. Abisag Sunemiijo boo ɗon huuwana mo.

¹⁶Bat-Seeba turi, tuggi koppi yeeso laamiiɗo. Laamiiɗo wi'i: Ko waddu ma?

¹⁷O jaabi mo: “Yaa jawmam, fakat a hunorani korɗo ma bee Allah Jawmiraawo maaɗa, a wi'i: Ɓiya Suleymaanu laamoto ɓaawo am, kaŋko o jooɗoto dow leeso laamu am.

¹⁸Ammaa ndaa jonta, Adoniya laamake, an boo, jawmam, a anndaa ɗum.

¹⁹O lii'i guleteeɗi ga'i e nyalbi payɗi e dammooji ɗuuɗɗi. O ewni ɓiɓɓe ma fuu e Abiyatar limanjo e Yo'ab mawɗo honooɓe, ammaa o ewnaaki suka ma Suleymaanu.

²⁰Ammaa an, yaa jawmam laamiiɗo, gite Isra'iila fuu ɗon ndaara gal maaɗa, haa a anndina ɓe mo jooɗoto dow leeso laamu ma ɓaawo maaɗa.

²¹To naa non, saa'i jawmam laamiiɗo maayi, min e ɓiyam Suleymaanu min laatoto bana tuurtuɓe.”

²²Saa'i o ɗon wolida bee laamiiɗo tawon, annabi Natan wari.

²³Ɓe anndini laamiiɗo: Annabi Natan ɗon ɗo. O nasti, o turi, hippi yeeso maako haa lesdi yeeso laamiiɗo.

²⁴Natan wi'i: “Barkaama, an wi'i Adoniya laamoto ɓaawo am, o jooɗoto dow leeso laamu am na?

²⁵Ngam o yehi hannde, o taaski juulde, o lii'i guleteeɗi ga'i e nyalbi payɗi e dammooji ɗuuɗɗi. O ewni ɓiɓɓe ma fuu e ardiiɓe honooɓe hoore'en sooje'en e Abiyatar limanjo. Ndaa, ɓe ɗon nyaama, ɓe ɗon njara yeeso maako, ɓe ɗon mbi'a: Laamiiɗo Adoniya yeeɗa haa foroy!

²⁶Ammaa min e Cadok limanjo e Benaya ɓii Yoyada e ɓiya Suleymaanu, Adoniya ewnaaki min.

²⁷Huunde nde'e iwi haa maaɗa na barkaama? A yeccaay min, minin jagganiiɓe ma moy jooɗoto dow leeso laamu ma ɓaawo maaɗa na?”

²⁸Nden laamiiɗo Daawuda wi'i: Ewnaneeɗam Bat-Seeba! Bat-Seeba wari, o dari yeeso laamiiɗo.

²⁹Laamiiɗo huni, wi'i: Fakat bana Jawmiraawo o geeto, mo hisni yoŋki am e ɓillaare fuu,

³⁰hannde mbaɗanmi ko mi huni yeeso ma bee Jawmiraawo, Allah Isra'iila: Ɓiya Suleymaanu laamoto ɓaawo am, kaŋko jooɗoto dow leeso laamu am haa pellel am!

³¹Bat-Seeba turi, hippi yeeso maako haa lesdi yeeso laamiiɗo, wi'i: Jawmam, laamiiɗo Daawuda yeeɗa haa foroy!

³²Nden laamiiɗo Daawuda wi'i: Ewnaneeɗam Cadok limanjo e annabi Natan e Benaya ɓii Yoyada. Ɓe nasti, ɓe ngari yeeso laamiiɗo.

³³Laamiiɗo wi'i ɓe: Koo'e saraaki'en am, njehe, mba'ine ɓiɗɗo am Suleymaanu dow alfadariire[2] am, njahre mo haa seeɓoore Gihon.

³⁴Ton Cadok limanjo e annabi Natan moyta mo haa o laato laamiiɗo Isra'iila. Nden on puufa luwal, on mbi'a: Laamiiɗo Suleymaanu yeeɗa haa foroy!

³⁵Nden tokke mo, ngarte haa ɗo. O wara, o jooɗo dow leeso laamu am. Kaŋko o laamoto haa pellel am, mi darni mo o ardiiɗo Isra'iila e Yahuuda.

³⁶Benaya ɓii Yoyada jaabi laamiiɗo: Aamiina! Ɗum Jawmiraawo, Allah maaɗa wolwinma ɗum barkaama.

³⁷Bana Jawmiraawo wonduno bee maaɗa barkaama, bana non o wondata bee Suleymaanu boo. O mawnina laamu maako ko ɓuri ngu maaɗa.

³⁸Cadok limanjo e annabi Natan e Benaya ɓii Yoyada e Kereti'en e Peleti'en[3] njehi, ɓe mba'ini Suleymaanu dow alfadariire laamiiɗo Daawuda, ɓe njahri mo haa Gihon.

³⁹Cadok hoo'i luwal bee nebbam haa laymaaru fottirde, o moyti Suleymaanu bee maajam. Ɓe puufi luwal, yimɓe wonɓe ton fuu mbi'i bee sawtu: “Laamiiɗo Suleymaanu yeeɗa haa foroy!”

⁴⁰Yimɓe fuu tokki mo wartugo Urusaliima, ɓe puufi ciide, ɓe ceyi bee seyo maŋngo haa lesdi ɓadake seekugo ngam hoolo maɓɓe.

⁴¹Nde Adoniya e ewnaaɓe wonduɓe bee maako timmini nyaamugo, ɓe nani hoolo, Yo'ab faami ɗum hoolo luwal, o ƴami: “Ngam ɗume haraka waɗi haa berniwol ngo'ol?”

⁴²Diga o ɗon wolwa tawon, Yonatan ɓii Abiyatar limanjo wari. Adoniya wi'i: War, an marɗo daraja, a ɗon waddana min kubaruwol booɗŋgol sike.

⁴³Yonatan jaabi Adoniya: Na non sam! Jaagorɗo men laamiiɗo Daawuda hokki Suleymaanu laamu.

⁴⁴Laamiiɗo neldi Cadok limanjo e annabi Natan e Benaya ɓii Yoyada e Kereti'en e Peleti'en bee maako, ɓe mba'ini mo dow alfadariire laamiiɗo.

⁴⁵Cadok limanjo e annabi Natan moyti mo haa Gihon, mbaɗi mo laamiiɗo. Nden ɓe lori bee seyo, berniwol fuu ɗon waɗa hoolo seyo. Kanjum ummini hoolo ngo nanɗon.

⁴⁶Suleymaanu boo, ɗon jooɗi dow leeso laamu.

⁴⁷Sukaaɓe laamiiɗo boo ngari waɗugo barka haa jaagorɗo men, laamiiɗo Daawuda. Ɓe mbi'i: Allah maaɗa ɓurna innde Suleymaanu dow innde maaɗa, o mawnina laamu maako ko ɓuri ngu maaɗa. Laamiiɗo boo, sujidi dow be'itte muuɗum,

⁴⁸nden o wi'i boo: “Yettoore laatano Jawmiraawo, Allah Isra'iila dokkuɗo yam hannde jooɗiiɗo dow leeso laamu am, diga mi geeto tawon haa gite am ngi'a ɗum.”

⁴⁹Ewnaaɓe Adoniya fuu kultori, ɗon ndiwna. Ɓe ummi, koo moy maɓɓe naŋngi laawol mum, dilli.

⁵⁰Adoniya boo huli Suleymaanu, o ummi, o yehi, o naŋngi luwe hirsirde.

⁵¹Suleymaanu anndinaama: Ndaa, Adoniya ɗon hula laamiiɗo Suleymaanu. O naŋngi luwe hirsirde, o wi'i: Laamiiɗo Suleymaanu hunanammi jonta, o mbarataa yam bee kaafahi.

⁵²Suleymaanu wi'i: To o waŋgi o gooŋgaajo nder yahdu maako, koo gaasaawol maako solataa sam. Ammaa to halleende tawaama haa maako, o maayan.

⁵³Nden laamiiɗo neli, ɓe ngaddi mo diga hirsirde. O wari, o turi yeeso laamiiɗo Suleymaanu, Suleymaanu wi'i mo: “Hootu.”