Read Fulfulded 1 Laamiiɓe 10 Bible Online

1 Laamiiɓe 10 - Fulfulded bible

1 Laamiiɓe 10

¹Laamiiɗo debbo mo laamani lesdi Saba nani habaru Suleymaanu e tedduŋgal innde Jawmiraawo. Nden o wari haa Suleymaanu, haa o gooŋɗina hikma Suleymaanu bee waɗango mo annditanamji.

²O wari haa Urusaliima, o wardi bee yimɓe maako ɗuuɗɓe, bee geelooɗi doondiiɗi kuuje uurɗe e kaŋŋeeri ɗuuɗndi masin e kaa'e ɗuuɗa-samanje. O yotti haa Suleymaanu, o ƴami mo ko o yiɗno ƴamugo fuu.

³Suleymaanu laɓɓinani mo ƴamɗe maako fuu, walaa ƴamol ngol salori mo.

⁴Laamiiɗo Saba debbo nani bolle Suleymaanu hikmaaje e o laari laamorde nde o mahi e

⁵nyaamdu saare maako e joonde saraaki'en maako e daraago huuwooɓe nder saare maako e limce maɓɓe e hokkooɓe mo njaramji, o laari boo guleteeɗi ɗi o lii'ani Jawmiraawo nder haykaliiru, nden o hayɗini masin.

⁶O wi'i Suleymaanu: “Ko nanmi haa lesdi am dow maaɗa e hikma maaɗa, fakat ɗum gooŋga.

⁷Mi nuɗɗinaayno haala maajum, sey nde ngarmi, gite am boo ngi'i ɗum. Ndaa, ɓe ngeccaay yam koo reeta maajum. An bee hikma ma e mardi ma, a ɓuri haala ka nanmi piw.

⁸Seyo laatani yimɓe ma, seyo laatani huuwanooɓe ma dariiɓe yeeso maaɗa foroy, nananɓe hikma maaɗa.

⁹Yettoore laatano Allah Jawmiraawo maaɗa mo seyori ma, jo'ini ma dow leeso laamu Isra'iila. Jawmiraawo yiɗi Isra'iila foroy, ngam maajum o waɗi ma laamiiɗo haa mbaɗa kiita ngooŋɗuka.”

¹⁰Nden o hokki laamiiɗo Suleymaanu kaŋŋeeri baakin kilo ujine tati e teemeɗɗe joweego e kuuje uurɗe ɗuuɗɗe masin, non boo kaa'e ɗuuɗa-samanje. Walaa kuuje uurɗe ɗuuɗɗe meeti nastugo lesdi Isra'iila bana ɗe laamiiɗo Saba debbo hokki laamiiɗo Suleymaanu.

¹¹Koommbooje[18] Hiram gadduɗe kaŋŋeeri diga Ofir, ngaddi boo kaŋŋeeri e leɗɗe sandalje ɗuuɗɗe masin e kaa'e ɗuuɗa-samanje.

¹²Bee leɗɗe sandalje, laamiiɗo waɗi tiigorɗe ngam haykaliiru Jawmiraawo e ngam saare laamu, non boo ngam moolooji e hooduuji ngam yimooɓe. Leɗɗe sandalje ɗuuɗɗe bana ɗe'e meetaay wargo haa lesdi Isra'iila haa wargo hannde.

¹³Laamiiɗo Suleymaanu boo hokki laamiiɗo Saba debbo ko o yiɗi e ko o ƴami mo fuu, o ɓesdani mo caahuuji bee caahaaki ɓernde laamiiɗo. Nden laamiiɗo Saba debbo e jaggiiɓe mum kooti lesdi muuɗum'en.

¹⁴Kala hitaande fuu, Suleymaanu heɓi kaŋŋeeri baakin kilo ujine noogas (20.000),

¹⁵accu jomorgol filooɓe e soorrooɓe e ko laamiiɓe Arabiya e ngomna'en lesdi ndokki mo.

¹⁶Laamiiɗo Suleymaanu waɗi bawarɗe[19] mawɗe teemeɗɗe ɗiɗi ɗe kaŋŋeeri tappaandi, baakin kilo joweeɗiɗi ngam waɗugo wawarde fuu.

¹⁷Non boo bawarɗe pamare ɗe kaŋŋeeri tappaandi, baakin kilo ɗiɗi ngam waɗugo wawarde fuu. Laamiiɗo nastini ɗe nder suudu Laynde Libanon.

¹⁸Laamiiɗo waɗi leeso laamu maŋngo bee nyii'e nyiibi, o suddi ngo bee kaŋŋeeri laaɓndi.

¹⁹Leeso laamu ngo'o woodi jaaɓruɗe joweego. Ɓaawo leeso laamu woodi hoore murlere. Ciwtinorɗe juuɗe ɗon haa bakeeje joonde ɗiɗi fuu. Suuraaji barooɗe ɗiɗi ndari baŋnge ciwtinorɗe juuɗe,

²⁰dow jaaɓruɗe boo, suuraaji barooɗe sappo e ɗiɗi, haa bakeeje ɗiɗi fuu. Irin maajum meeɗaay waɗeego nder laamu koo nguye.

²¹Jarduɗe laamiiɗo Suleymaanu fuu ɗe kaŋŋeeri. Kuuje nder suudu laynde Libanon ɗe kaŋŋeeri laaɓndi, walaa kuuwaaɗum bee cardi. Nder zamanu Suleymaanu ɓe ndaari cardi bana huunde meere,

²²ngam laamiiɗo woodi koommbooje[20] Tarsis. Ɗe ngondi bee koommbooje Hiram haa mbeela. Nde duuɓi tati mbaɗi fuu, koommbooje Tarsis ngaran, ɗe keewɗe kaŋŋeeri e cardi e nyii'e nyiibi e baaɗi e teekuuji[21].

²³Laamiiɗo Suleymaanu ɓurdi laamiiɓe duniyaaru fuu risku e hikma.

²⁴Duniyaaru fuu ɗaɓɓiti yi'ugo Suleymaanu haa nana hikma muuɗum ka Allah hokki ɗum.

²⁵Kala hitaande fuu, yimɓe waranɓe laarugo mo ɗon ngaddana mo caahuuji: Kuuje cardi e kuuje kaŋŋeeri e limce e balmi e kuuje uurɗe e pucci e alfadariije.

²⁶Suleymaanu mooɓti mootaaji pucci konu e pucci: Ɗum waɗi mootaaji pucci ujineere e teemeɗɗe nayi (1.400) e pucci ujine sappo e ɗiɗi (12.000). Nden o jo'ini goɗɗi haa kommbi maako haa Urusaliima, goɗɗi boo nder berniiji cigorɗi maaji.

²⁷Laamiiɗo Suleymaanu ɗuɗɗini cardi haa Urusaliima bana kaa'e, o ɗuɗɗini leɗɗe cemmbiɗɗe boo bana dundeeje haa lesdi towndiije.

²⁸Ɓe ngaddani Suleymaanu pucci diga Misra e Kuwe, filooɓe laamiiɗo keɓi ɗi haa Kuwe bee saman coggu.

²⁹Haa Misra, ɓe coodoyi mootaaji pucci, ngoota fuu baakin ceede cardi teemeɗɗe joweego (600), pucci boo, ngootu fuu ceede cardi teemerre e cappanɗe jowi (150). Ɓe coodani boo laamiiɓe Heti'en fuu e laamiiɓe Siriya boo.