Read Fulfulded 1 Laamiiɓe 17 Bible Online

1 Laamiiɓe 17 - Fulfulded bible

1 Laamiiɓe 17

¹Eliya[26] goɗɗo iwɗo diga Tisbe nder Gile'at wi'i Akab: “Bana Jawmiraawo Allah Isra'iila mo mi jagganto o geeto, mi ɗon wi'e: Fakat nder duuɓi garanɗi ɗi'i iyeende toɓataa, koo saawawre waɗataa, sonaa to mi tori mo.”

²Nden wolde Jawmiraawo warani mo, o wi'i:

³“Yah fuunaaŋge, suuɗa haa maayel Kirit tiitotirŋgel bee Urdun.

⁴Njara haa maagel, mi umri leekuuje boo ɗe nyaamne ton.”

⁵O yehi, o waɗi fodde wolde Jawmiraawo. O yehi, o faɓɓi haa maayel Kirit tiitotirŋgel bee Urdun.

⁶Leekuuje ɗon ngaddana mo tamseere e kusel bee fajiri, non boo tamseere e kusel bee kiikiiɗe, o ɗon yara haa maayel.

⁷Yeeso seɗɗa, maayel ɓeeɓi ngam iyeende toɓaay dow lesdi.

⁸Nden wolde Jawmiraawo warani mo, o wi'i:

⁹“Umma, yah haa Sarafat nder maral Sidon, faɓɓu ton. Mi umri debbo jurumɗo ton, haa o nyaamne.”

¹⁰Eliya ummi, yehi Sarafat. Nde o nasti dammugal berniwol, ndaa debbo ɗon teena leɗɗe. Eliya ewni mo, wi'i: “Ɗaɓɓitanam ndiyam seɗɗa haa taasawo, haa mi yara.”

¹¹Nde debbo ɗon dilla ɗaɓɓitoygo ndiyam, Eliya ewni mo, wi'i mo: “Waddanam boo tamseere seɗɗa haa juŋngo ma.”

¹²Debbo wi'i: “Fakat bana Allah Jawmiraawo maaɗa o geeto! Mi walaa tamseere sam, sey kuroori seɗɗa haa fayannde, deydey ko hebbinta juŋngo, nebbam seɗɗa haa faandu. Ndaa, mi ɗon teena leɗɗe seɗɗa, nden mi nastan haa mi tamsa ɗum ngam am e ɓiyam gorko, min nyaama ɗum, nden min maaya.”

¹³Ammaa Eliya wi'i mo: “Taa hul! Nastu, huuw bana mbi'ɗa. Ammaa tamsanam tamseere famarde tawon, hokkam. Nden tamsu ngam maaɗa e ɓiya,

¹⁴ngam ndaa nii Jawmiraawo Allah Isra'iila wi'i: Kuroori haa fayannde jinnataa, nebbam haa faandu boo timmataa, haa nyalaade Jawmiraawo toɓnata iyeende dow lesdi.”

¹⁵Debbo yehi, waɗi fodde wolde Eliya. Ɓe nyaami nyalɗe ɗuuɗɗe, Eliya e yimɓe saare man.

¹⁶Kuroori haa fayannde jinnaay, nebbam haa faandu boo timmaay, fodde wolde nde Jawmiraawo wi'no bee hunnduko Eliya.

¹⁷Ɓaawo maajum, ɓii debbo jurumɗo go nyawi. Nyawu maako ɓesdi saatugo haa o maayi.

¹⁸Debbo jurumɗo go wi'i Eliya: “Annabiijo Allah, koni a waɗi yam huunde nde'e? A wari haa am ngam a siftinora Allah aybe am, a mbara ɓiyam na?”

¹⁹Eliya wi'i mo: “Hokkam ɓiya.” O hoosi ngel diga wiɓɓere daada maagel, o yahri ngel haa suudu dowru haa o woni, o wallini ngel dow be'itte maako.

²⁰Nden o tori Jawmiraawo, o wi'i: “Yaa Allah Jawmiraawo am, a yiɗi waɗugo kalluɗum koo haa beero am, haa debbo jurumɗo oo bee mbarugo ɓiyiiko na?”

²¹Nden o naaɗi dow ɓiŋngel nde tati. O tori Jawmiraawo, o wi'i: “Yaa Allah Jawmiraawo am, lornu yoŋki ɓiŋngel ngel nder maagel!”

²²Jawmiraawo nani tornde Eliya, yoŋki ɓiŋngel lorti nder maagel, ngel yeeɗiti.

²³Eliya hoo'i ngel, jippini ngel diga dow soorowol, hokkiti ngel daada maagel. Eliya wi'i: “Ndaa, ɓiya o geeto.”

²⁴Debbo wi'i Eliya: “Jonta anndumi a goɗɗo Allah, fakat wolde nde a wolwi, nde iwi haa Jawmiraawo bee gooŋga.”