Read Fulfulded 1 Laamiiɓe 20 Bible Online

1 Laamiiɓe 20 - Fulfulded bible

1 Laamiiɓe 20

¹Benhadat, laamiiɗo Siriya'en mooɓti yimɓe konu muuɗum fuu. Laamiiɓe cappanɗe tato e ɗiɗo ɗon ngondi bee maako e mootaaji pucci e pucci. O wari, o taari berniwol Samariya, o haɓi bee maagol.

²O neli nelaaɓe nder berniwol haa Akab, laamiiɗo Isra'iila,

³ɓe mbi'a mo: “Ndaa nii Benhadat wi'i: Cardi ma e kaŋŋeeri ma, ɗum min jeyi. Non boo rewɓe ma e ɓiɓɓe ma worɓe, ɓurɓe ŋarol, ɗum min jeyi.”

⁴Laamiiɗo Isra'iila jaabi: “Bana mbi'ɗa, barkaama. Min bee ko marmi fuu, an jeyi.”

⁵Nelaaɓe ngari fahin, ɓe mbi'i: “Ndaa nii Benhadat wi'i: Mi neli wi'ugo ma: Hokkam cardi ma e kaŋŋeeri ma e rewɓe ma e ɓiɓɓe ma worɓe.

⁶Ammaa jaŋngo bana wakkati jonta, mi nelan sukaaɓe am haa maaɗa. Ɓe mbiɗititto suudu ma e cuuɗi sukaaɓe ma. Juuɗe maɓɓe koocan ko ɓuri wooɗugo haa gite ma fuu, ɓe ngurtina ɗum.”

⁷Laamiiɗo Isra'iila umri ndotti'en lesdi fuu ngara. O wi'i: “Annde, ngi'e no gorko oo ɗaɓɓirta kalluɗum! O neli haa am ngam rewɓe am e ɓiɓɓe am worɓe e ngam cardi am e kaŋŋeeri am, mi salanaaki mo.”

⁸Ammaa ndotti'en e yimɓe fuu mbi'i mo: “Taa ɗowtan mo, taa jaɓ!”

⁹Nden o wi'i nelaaɓe Benhadat: “Mbi'e laamiiɗo: Ɗum ko a aarti ƴamugo yam, mi huuwan ɗum. Ammaa ɗum ko o umri jonta, mi waawataa mi huuwa ɗum.” Nelaaɓe ngartirani laamiiɗo jaawaabu.

¹⁰Nden Benhadat neli haa laamiiɗo Akab fahin, wi'i: “Ɗowanteeɓe mbaɗammi ko ɓuri naawugo, to mbulwuldi Samariya he'i ngam hebbingo newe honooɓe tokkiiɓe yam fuu.”

¹¹Laamiiɗo Isra'iila jaabi: “Mbi'e mo: Dillanɗo konu, taa o manto, sey to o jaalake, o warti.”

¹²Benhadat ɗonno yarda bee laamiiɓe woɗɓe les laymaaji, nde o nani bolle ɗe'e, o wi'i sukaaɓe maako: “Taaskite ngam haɓre.” Ɓe taaskani haɓre bee berniwol.

¹³Nden annabiijo feere wari haa Akab, laamiiɗo Isra'iila. O wi'i mo: “Ndaa nii Jawmiraawo wi'i: A yi'i mooɓre honooɓe ɗuuɗnde nde'e na? Mi hokkete nde hannde, ngam haa a faama min woni Jawmiraawo.”

¹⁴Akab ƴami: “Bee juŋngo moy?” annabiijo jaabi: “Ndaa nii Jawmiraawo wi'i: Bee juuɗe derke'en ɓe ngomna'en lesdi cuɓi.” Akab ƴami: “Moy fuɗɗata haɓre?” O jaabi: “An.”

¹⁵Laamiiɗo Akab limi derke'en man, limgal maɓɓe teemeɗɗe ɗiɗo e cappanɗe tato e ɗiɗo (232). Nden o limi Isra'iila'en suɓaaɓe fuu, ɓe ujine njoweeɗiɗo.

¹⁶Caka nyalawma ɓe puɗɗi haɓre. Wakkati man Benhadat e laamiiɓe cappanɗe tato e ɗiɗo, wallooɓe mo ɗonno nguyki nder laymaaji tawon.

¹⁷Derke'en go aarti fuɗɗugo konu. Benhadat neli yimɓe ngam heɓtugo ko waɗi. Ɓe anndini mo: “Worɓe woɗɓe ngurti Samariya.”

¹⁸O wi'i: “Koo to ɓe ngurtake ngam sulhu, koo to ɓe ngurtake ngam haɓre, naŋnge ɓe ɓe yeeɗɓe.”

¹⁹Ammaa derke'en go ngurti berniwol hawtaade bee jama'aare konu ɓaawo maɓɓe.

²⁰Koo moy maɓɓe mbari konneejo muuɗum. Siriya'en ndoggi, Isra'iila'en taasni ɓe. Benhadat, laamiiɗo Siriya'en daɗi bee puccu e wa'iiɓe woɗɓe.

²¹Laamiiɗo Isra'iila wurti, naŋngi pucci e mootaaji pucci, mbari Siriya'en ɗuuɗɓe.

²²Nden annabiijo go wari haa laamiiɗo Isra'iila. O wi'i mo: “Yah, suusɗin ɓernde ma, taasku booɗɗum. Ngam mawri laamiiɗo Siriya'en waran haɓugo bee ma.”

²³Jaggiiɓe laamiiɗo Siriya'en mbi'i mo: “Allah Isra'iila woni ɗowanteeɗo kooseeje, ngam maajum Isra'iila'en ɓuri en semmbe. Sey en kaɓa bee maɓɓe haa daldal, nden kam en ɓuran ɓe semmbe.

²⁴Ndaa ko a waɗata jonta: Riiw laamiiɓe haa nokkuuje maɓɓe, jo'in ngomna'en lesdi haa pelloy maɓɓe.

²⁵An boo, liman hoore ma jama'aare konu, bana jama'aare nde do'ino haa maaɗa e pucci e mootaaji bana limgal pucci e mootaaji naane. Sey en kaɓa bee maɓɓe haa daldal, nden kam en ɓuran ɓe semmbe.” O nani bolle maɓɓe, o waɗi non.

²⁶Nde mawri waɗi, Benhadat limi Siriya'en, o yehi haa Afek ngam haɓugo bee Isra'iila.

²⁷Isra'iila'en, kamɓe boo ɓe limaama, ɓe keɓi njooɓaari, nden ɓe njehi ngam haɓugo bee maɓɓe. Isra'iila'en caŋngini yeeso Siriya'en, bana tokke be'i pamare ɗiɗi. Ammaa Siriya'en keewi lesdi.

²⁸Fahin goɗɗo Allah go wari haa laamiiɗo Isra'iila, wi'i mo: “Ndaa nii Jawmiraawo wi'i: Siriya'en mbi'i Jawmiraawo o ɗowanteeɗo kooseeje, naa o ɗowanteeɗo waadiiji. Ngam maajum mi hokkete mooɓre mawnde nde'e fuu haa juŋngo ma. Bana nii on paaman min woni Jawmiraawo.”

²⁹Ɓe caŋngini, ɓe ɗon tiitotiri nyalɗe joweeɗiɗi. Nyannde joweeɗiɗawre haɓre ummi. Isra'iila'en mbari Siriya'en, yahooɓe bee kosɗe ujine teemerre, nder nyalaade woore.

³⁰Luttuɓe ndoggi haa Afek nder berniwol. Mahol maagol yibbi dow worɓe luttuɓe ujine noogas e njoweeɗiɗo (27.000). Benhadat doggi, o yehi berniwol, o nasti suudu suuɗiindu.

³¹Sukaaɓe maako mbi'i mo: “Min nani laamiiɓe Isra'iila ɓe laamiiɓe wooɗɓe. Accu min kaddo limce buhuuje, min taarna ko'e amin bee ɓoggi, min njaha haa laamiiɗo Isra'iila. Teema o accete bee yoŋki.”

³²Nden ɓe kaddi limce buhuuje, ɓe taarni ko'e maɓɓe bee ɓoggi. Ɓe ngari haa laamiiɗo Isra'iila, ɓe mbi'i: “Maccuɗo ma Benhadat wi'i: Useni accanam yoŋki am.” Laamiiɗo Akab wi'i: “O geeto na? Booɗɗum, o deerɗam!”

³³Nelaaɓe Benhadat ndaari ɗum bana alaama mbooɗka, ɓe njaawani gooŋɗingo ɗum. Ɓe mbi'i: “Nonnon, Benhadat o deerɗa.” Akab wi'i: “Njehe ngadde mo.” Benhadat wurti haa o suuɗino. Akab wa'ini mo dow moota pucci maako.

³⁴Benhadat wi'i Akab: “Berniiji ɗi baaba am hooci haa baaba ma, mi hokkititte ɗi. A waawan boo waɗugo filu haa Damas bana baaba am waɗi nder Samariya.” Akab wi'i: “Min mi haɓɓan alkawal bee ma, nden mi accete a dimo.” Ɓaawo haɓɓugo alkawal nga'al, o yoofti mo o dimo.

³⁵Goɗɗo caka pukara'en annabi'en wi'i gooto nder huuwdiɗɗiraaɓe muuɗum, fodde wolde nde Jawmiraawo wolwani mo: “Fiyam!” Ammaa oya sali fiyugo mo.

³⁶O wi'i mo: “A ɗowtanaaki sawtu Jawmiraawo. Ngam maajum, ndaa, saa'i to a ɗon dilla ɗo, mbarooga mbarete.” Nde o dilli o acci mo, mbarooga naŋngi mo, mbari mo.

³⁷O dilli o fotti bee goɗɗo feere, o wi'i mo: “Fiyam!” Goɗɗo go fiyi mo, o naawni mo.

³⁸Nden annabiijo yehi, dari haa laawol ngol laamiiɗo Akab saaloto. O haɓɓi gite maako bee leppol ngam taa ɓe anndita mo.

³⁹Nde laamiiɗo ɗon saalo, annabiijo wookani mo, o wi'i: “Barkaama, mi ɗonno nder haɓre, goɗɗo seli, waddani yam goɗɗo feere, wi'i: Aynu mo. To o daɗi, mi mbarete malla boo a yoɓan cardi kilo cappanɗe tati.

⁴⁰Nde mi ɗon sukli bee kuuje feere feere, o daɗi.” Laamiiɗo Isra'iila wi'i mo: “Nonnon kiita maaɗa. An bee hoore ma ta'i ka.”

⁴¹Law o fiisti leppol haa gite maako. Laamiiɗo Isra'iila annditi o annabiijo.

⁴²Nden annabiijo wi'i mo: “Ndaa nii Jawmiraawo wi'i: Nde a acci goɗɗo mo mi annini nattingo mo, a yoɓan ɗum bee yoŋki ma e ummaatoore ma maayan mbattudi ummaatoore maako.”

⁴³Laamiiɗo Isra'iila hooti haa Samariya, bee mettamɓeram e tikkere.