Read Fulfulded 1 Laamiiɓe 3 Bible Online

1 Laamiiɓe 3 - Fulfulded bible

1 Laamiiɓe 3

¹Suleymaanu esiri bee Firawna, laamiiɗo Misra. O ɓaŋgi ɓiyiiko, o yahri mo nder Berniwol Daawuda haa Urusaliima, haa o timmini nyiɓugo saare maako e suudu Jawmiraawo e mahol taariiŋgol Urusaliima fuu.

²Ammaa yimɓe ɗonno lii'o kirseteeɗi haa towndiije cenaaɗe, ngam nder nyalɗe maajum ɓe ciwaa nyiɓango Jawmiraawo haykaliiru.

³Laamiiɗo Suleymaanu yiɗi Jawmiraawo, o ɗon tokki umrooje Daawuda, baaba maako, ammaa boo o ɗon lii'o kirseteeɗi e uurle haa towndiije cenaaɗe tawon.

⁴Nyannde feere, laamiiɗo yehi Gibiyon ngam lii'anaago Jawmiraawo kirseteeɗi, ngam kanjum wonno towndiire senaande mawnde. Dow hirsirde towndiire nde'e, Suleymaanu lii'i guleteeɗi ujineere.

⁵Jawmiraawo waŋgani Suleymaanu haa Gibiyon jemma nder koyɗol. Allah wi'i mo: “Tora ko ngiɗɗa fuu, mi hokkete.”

⁶Suleymaanu wi'i: “A woonani jagganiiɗo ma, baaba am Daawuda bee mbooɗeeŋga ɗuuɗŋga, ngam o tokki ma bee hoolaare e ɓernde woore e adilaaku. A tokkitini woonango mo bee mbooɗeeŋga ɗuuɗŋga, a hokki mo ɓiɗɗo jooɗiiɗo dow leeso laamu maako, bana ko waɗi hannde.

⁷Yaa Allah Jawmiraawo am, a laamini yam, min jaggiiɗo ma haa pellel baaba am Daawuda, ammaa mi derkeejo tawon, mi anndaa no mi waɗata.

⁸Ndaa mi ɗon yeeso ummaatoore ma nde cuɓɗa, ummaatoore ɗuuɗnde nde goɗɗo waawataa limugo yimɓe maare.

⁹Yaa Jawmiraawo, yerda hokkugo yam ɓernde hakkilnde ngam laamanaago ummaatoore ma e ngam senndindirgo booɗɗum e kalluɗum. Ngam moy foti laamanaago ummaatoore ma mawnde nde'e?”

¹⁰Tornde Suleymaanu nde'e fottani Jawmiraawo.

¹¹Allah wi'i mo: “Nde a tori ɗu'um, a toraaki juutal balɗe, a toraaki risku boo koo mbaraneego wanyɓe ma, ammaa a torake hakkiilo ngam laamaago bee gooŋgaaku,

¹²ndaa, mi waɗani ma fodde ko ngiɗɗa, mi hokki ma ɓernde marnde hikma e hakkiilo. Goɗɗo bana maaɗa meeɗaay, ɓaawo maaɗa boo, meetataa bana maaɗa.

¹³Ammaa ɗum ko a toraaki boo, mi hokki ma ɗum, waato risku e tedduŋgal fuu, bana maaɗa laatataako caka laamiiɓe nder balɗe ma fuu.

¹⁴To a tokkake laabi am, to a hakkilani farillaaji am e umrooje am, bana baaba ma Daawuda waɗi boo, nden kam mi juttinan balɗe ma.”

¹⁵Suleymaanu fini, tawi ɗum koyɗol. O wari haa Urusaliima, o dari yeeso sundukru alkawal Jawmiraawo, o lii'i guleteeɗi e kirseteeɗi ngam kawtal yimɓe bee Allah, o waɗi nyaamduuji ngam jaggiiɓe maako fuu.

¹⁶Nyannde feere, rewɓe ɗiɗo daakaare'en ngari haa laamiiɗo Suleymaanu.

¹⁷Arano wi'i: “Useni, barkaama, min e debbo oo, min njooɗodi saare woore. Mi danyi haa saare maajum saa'i o ɗonno ton.

¹⁸Nyalɗe tati ɓaawo man, kaŋko boo o danyi. Min ɗon ngondi, walaa goɗɗo hawti bee amin nder saare, sey minin ɗiɗo tan ngoni nder saare man.

¹⁹Nden debbo oo, ɓiŋngel mum maayi bee jemma, ngam o waali dow maagel.

²⁰Caka jemma o ummi, o hooci ɓiŋngel am haa wuttudu am, saa'i mi ɗon ɗaani, o wallini ngel haa enɗi maako. Ammaa ɓiŋngel maako maayŋgel, o wallini ngel haa enɗi am.

²¹Nde mi ummi fajiri ngam mi musinina ɓiŋngel am, ndaa, ngel maayŋgel. Mi tiimi ngel fajiri, mi tawi, naa ɗum ɓiŋngel ngel ndanymi.”

²²Ammaa debbo oya wi'i: “Naa non! Ɓiŋngel am woni geetel, maayŋgel woni ɓiŋngel maaɗa.” Arano boo wi'i: “Naa non! Ɓiŋngel maaɗa maayi, geetel woni ɓiŋngel am.” Bana nii ɓe ngaabotiri yeeso laamiiɗo.

²³Laamiiɗo wi'i: “Oo ɗon wi'a: Ɓiŋngel geetel woni ngel am, maayŋgel woni ngel maaɗa. Oya boo, ɗon wi'a: Naa non! Maayŋgel woni ɓiŋngel maaɗa, geetel woni ngel am.”

²⁴Laamiiɗo wi'i: “Ngaddaneeɗam kaafahi.” Ɓe ngaddani mo ki.

²⁵Laamiiɗo wi'i: “Ta'e ɓiŋngel geetel geɓe ɗiɗi! Ndokke gooto reeta maagel, oya boo reeta.”

²⁶Nden daada ɓiŋngel geetel, tori laamiiɗo, ngam ɓernde maako yurmini ɓiyiiko. O wi'i: “Useni, barkaama, ndokke mo ɓiŋngel geetel, taata mbare ngel!” Ammaa oya wi'i: “Koo min koo an, walaa koo gooto heɓata ngel, cennde ngel.”

²⁷Nden laamiiɗo wi'i: “Ndokke arano ɓiŋngel geetel, taata mbare ngel. Kaŋko woni daada maagel.”

²⁸Isra'iila fuu nani haala kiita ka laamiiɗo ta'i. Ɓe kuli laamiiɗo, ngam ɓe ngi'i hikma Allah ɗon nder maako haa o waɗa kiita ngooŋɗuka.