Read Fulfulded 2 Laamiiɓe 15 Bible Online

2 Laamiiɓe 15 - Fulfulded bible

2 Laamiiɓe 15

¹Nder nduuɓu laamu Yerobo'am laamiiɗo Isra'iila noogas e njoweeɗiɗaɓu, Azariya ɓii Amasiya laami haa Yahuuda.

²O woodi duuɓi sappo e joweego, saa'i o laamo. O laami haa Urusaliima duuɓi cappanɗe jowi e ɗiɗi. Innde daada maako, Yekolyahu mo Urusaliima.

³O waɗi ko fottani Jawmiraawo, bana ko baaba maako Amasiya waɗno fuu.

⁴Ammaa o nattinaay nokkuuje towɗe, yimɓe tokki yahugo lii'aago kirseteeɗi dabbaaji e wulugo uurle haa maaje.

⁵Jawmiraawo ukkani laamiiɗo saɗawre haa yotti nyalaade maayde maako. O jooɗi nder suudu yeewndu. Yotam, ɓii laamiiɗo woni kaliifaajo laamorde, kaŋko ta'anta yimɓe lesdi kiita.

⁶Luttuɗum haala Azariya e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Yahuuda.

⁷Nde Azariya maayi, ɓe uwi mo baŋnge genaale kaakiraaɓe maako nder Berniwol Daawuda. Ɓiyiiko Yotam laami haa pellel maako.

⁸Nder nduuɓu laamu Azariya, laamiiɗo Yahuuda cappanɗe tati e njoweetataɓu, Zekariya ɓii Yerobo'am laami haa Isra'iila. O laami haa Samariya lebbi joweego.

⁹O waɗi kalluɗum yeeso Jawmiraawo, bana kaakiraaɓe maako kal-kal. O accaay waɗugo hakkeeji ɗi Yerobo'am ɓii Nebat nastini Isra'iila'en nder maaji.

¹⁰Sallum ɓii Yaabes waɗi dabare, mbari mo yeeso ummaatoore. Nden o laami haa pellel maako.

¹¹Luttuɗum haala Zekariya winndaama nder Deftere Habaruuji Nyalaaɗe nde Laamiiɓe Isra'iila.

¹²Kanjum woni wolde nde Jawmiraawo wolwanino Yeehu: “Ɓiɓɓe ma njooɗoto dow leeso laamu Isra'iila haa yidere nayaɓre.” Non ɗum waari.

¹³Nder nduuɓu laamu Uzziya, waato Azariya laamiiɗo Yahuuda cappanɗe tati e njoweenayaɓu, Sallum ɓii Yaabes laami. O laami haa Samariya lewru tan.

¹⁴Menahem ɓii Gadi wa'i diga Tirsa, yehi haa Samariya, mbari Sallum. Nden o laami haa pellel baaba maako.

¹⁵Luttuɗum haala Sallum e tuurtol mum ngol o waɗi, ɗum winndaama nder Deftere Habaruuji Nyalaaɗe nde Laamiiɓe Isra'iila.

¹⁶Menahem nyaami berniwol Tifsa, o mbari yimɓe nder berniwol e nder lesdi maagol fuu, ngam ɓe maɓɓitanaay mo dammuɗe maagol. O seeki koo reedu'en nder maagol fuu.

¹⁷Nder nduuɓu laamu Azariya laamiiɗo Yahuuda cappanɗe tati e njoweenayaɓu, Menahem ɓii Gadi laami haa Isra'iila. O laami haa Samariya duuɓi sappo.

¹⁸O waɗi kalluɗum yeeso Jawmiraawo, balɗe maako fuu o accaay waɗugo hakkeeji ɗi Yerobo'am ɓii Nebat nastini Isra'iila'en nder maaji.

¹⁹Pul, laamiiɗo Assuura nasti lesdi Isra'iila, nden Menahem walli mo hokki mo cardi kilo ujine cappanɗe tati, haa laamu maako semmbiɗa.

²⁰Ngam heɓugo ceede ɗe'e, Menahem umri Isra'iila'en njoɓa jomorgol. Diskuɗo fuu yoɓan ceede cardi cappanɗe jowi. Nde ɓe ndokki ceede ɗe'e haa laamiiɗo lesdi Assuura, o acci lesdi Isra'iila, o hooti lesdi maako.

²¹Luttuɗum haala Menahem e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Isra'iila.

²²Nde Menahem maayi, ɓiyiiko Pekahaya laami haa pellel maako.

²³Nder nduuɓu laamu Azariya laamiiɗo Yahuuda cappanɗe njowaɓu, Pekahaya ɓii Menahem laami haa Isra'iila. O laami haa Samariya duuɓi ɗiɗi.

²⁴O waɗi kalluɗum yeeso Jawmiraawo, o accaay waɗugo hakkeeji ɗi Yerobo'am ɓii Nebat nastini Isra'iila'en nder maaji.

²⁵Peka ɓii Remaliya, ɗoftoowo mo tuurtani mo bee worɓe cappanɗe njowo nder yimɓe Gile'at. O mbari mo haa Samariya nder suudu semmbiɗndu haa laamorde, kaŋko e Argoba e Ariye. Nden o laami haa pellel maako.

²⁶Luttuɗum haala Pekahaya e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Isra'iila.

²⁷Nder nduuɓu laamu Ahaziya laamiiɗo Yahuuda cappanɗe jowi e ɗiɗaɓu, Peka ɓii Remaliya laami haa Isra'iila. O laami haa Samariya duuɓi noogas.

²⁸O waɗi kalluɗum yeeso Jawmiraawo, o accaay waɗugo hakkeeji ɗi Yerobo'am ɓii Nebat nastini Isra'iila'en nder maaji.

²⁹Nder zamanu Peka, Tigilat-Pileser laamiiɗo Assuura wari, nyaami Iyon e Abel-Bayti-Ma'aka e Yanuha e Keedes e Hacoor e Gile'at e Galiili, lesdi Neftali fuu. O dahi yimɓe haa Assuura.

³⁰Hose'a ɓii Ela tuurtani Peka ɓii Remaliya, mbari mo. Nden o laami haa pellel maako. Ɗum waɗi nder nduuɓu Yotam ɓii Uzziya noogaswu.

³¹Luttuɗum haala Peka e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Isra'iila.

³²Nder nduuɓu laamu Peka ɓii Remaliya, laamiiɗo Isra'iila ɗiɗaɓu, Yotam ɓii Azariya[14] laami haa Yahuuda.

³³O woodi duuɓi noogas e jowi, saa'i o laamo. O laami haa Urusaliima duuɓi sappo e joweego. Innde daada maako, Yeruusa ɓii Cadok.

³⁴O waɗi ko fottani Jawmiraawo, bana baaba maako Uzziya waɗno fuu.

³⁵Ammaa o nattinaay nokkuuje towɗe, yimɓe tokki yahugo ton ngam lii'aago kirseteeɗi dabbaaji e wulugo uurle. Kaŋko o mahi dammugal ɓaŋgiiŋgal haa haykaliiru Jawmiraawo.

³⁶Luttuɗum haala Yotam e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Yahuuda.

³⁷Nder zamanu Yotam Jawmiraawo fuɗɗi nelugo Recin laamiiɗo Siriya'en e Peka ɓii Remaliya dow Yahuuda.

³⁸Yotam maayi, ɓe uwi mo baŋnge genaale kaakiraaɓe maako nder Berniwol Daawuda. Ɓiyiiko Akas laami haa pellel maako.