Read Fulfulded 2 Laamiiɓe 16 Bible Online

2 Laamiiɓe 16 - Fulfulded bible

2 Laamiiɓe 16

¹Nder nduuɓu laamu Peka ɓii Remaliya sappo e njoweeɗiɗaɓu haa Isra'iila, Akas ɓii Yotam laami haa Yahuuda.

²O fuɗɗi laamaago saa'i o woodi duuɓi noogas. O laami haa Urusaliima duuɓi sappo e joweego. O waɗaay ko fottani Allah Jawmiraawo maako, bana kaaka maako Daawuda waɗno.

³O tokki laawol laamiiɓe Isra'iila. O lii'i koo ɓiyiiko gorko, o wulani labbi fodde al'aadaaji nyidduɗi nder ummaatooje ɗe Jawmiraawo riiwno yeeso Isra'iila'en.

⁴O wuli kirsaaɗi e uureteeɗum haa nokkuuje towɗe e kooseehon e haa les leɗɗe bilititɗe fuu.

⁵Saa'i maajum Recin laamiiɗo Siriya'en e Peka ɓii Remaliya, laamiiɗo Isra'iila, ngari haɓugo bee Urusaliima. Ɓe kippi ngol, ammaa ɓe keɓaay jaalaago Akas.

⁶Saa'i maajum boo, Recin laamiiɗo Siriya'en wartiri Elat nder maral muuɗum. O riiwi Yahuudu'en wonɓe haa Elat fuu. Edoomi'en ngari Elat, njooɗi ton haa wargo hannde.

⁷Akas neli nelaaɓe haa Tigilat-Pileser laamiiɗo Assuura, ɓe mbi'i mo: “Mi jaggiiɗo ma, mi ɓiɗɗo ma. War hisnam juŋngo laamiiɗo Siriya'en e juŋngo laamiiɗo Isra'iila, ummaniiɓe yam.”

⁸Wakkati man nden Akas hooci kaŋŋeeri e cardi gonɗi nder haykaliiru Jawmiraawo e nder ndesaaje saare laamu, o neldi ɗum laamiiɗo Assuura caahu.

⁹Laamiiɗo Assuura nanani mo, yehi haɓugo bee Damas. O nyaami ngol, o dahi yimɓe maagol haa Kiir, o mbari laamiiɗo Recin boo.

¹⁰Laamiiɗo Akas yehi Damas ngam fottugo bee Tigilat-Pileser laamiiɗo Assuura. O yi'i hirsirde wonnde haa Damas, o neldi suura hirsirde e misaalu taaskara kuugal maare fuu haa Uriya limanjo.

¹¹Uriya limanjo nyiɓi hirsirde fodde tinndinooje ɗe Akas nelduno diga Damas, bana non Uriya limanjo waɗi nde, haa laamiiɗo Akas warti diga Damas.

¹²Nde laamiiɗo warti, o yi'i hirsirde. Nden o ɓaditi nde, o lii'i kirsaaɗi dow maare.

¹³O wuli nguleteeŋga maako e dokkal nyaamdu maako, o rufi dokkal maako dufeteeŋgal, o wicci ƴiiƴam kirsaaɗi maako ɗi o hirsi ngam kawtal haa hirsirde.

¹⁴Ammaa hirsirde nde njamndi mboɗeeri, dariinde yeeso Jawmiraawo, o sottini nde diga wakeere haykaliiru yeeso, waato diga nokkuure hakkunde hirsirde hesre e haykaliiru Jawmiraawo, o jo'ini nde haa wakeere hirsirde hesre gal woyla[15].

¹⁵Laamiiɗo Akas umri Uriya limanjo: “Dow hirsirde mawnde ngulata nguleteeŋga fajiri e dokkal nyaamdu kiikiiɗe e nguleteeŋga laamiiɗo bee dokkal nyaamdu muuɗum e nguleteeŋga yimɓe lesdi fuu e dokke nyaamdu maɓɓe e dokke maɓɓe dufeteeɗe. Sey a wicca ƴiiƴam guleteeɗi e ƴiiƴam kirseteeɗi fuu haa maare. Ammaa haala hirsirde njamndi mboɗeeri kam, min suklanto ɗum.”

¹⁶Uriya, limanjo waɗi fodde ko laamiiɗo Akas umri mo fuu.

¹⁷Laamiiɗo Akas sampiti ɓaŋgeeje haa jo'inirɗe, o itti daarooje dow maaje. O jippini loonde njamndi mboɗeeri dow ga'i njamndi mboɗeeri gonɗi les maare, o jo'ini nde dow caɓɓol kaa'e.

¹⁸Laawol Birniiŋgol ngam Nyannde Siwtorde, nyiɓaaŋgol haa haykaliiru e Nastirde Laamiiɗo haa yaasi haykaliiru Jawmiraawo, o wayliti ɗum ngam daliila laamiiɗo Assuura.

¹⁹Luttuɗum haala Akas e kuuɗe mum, ɗum winndaama nder Deftere Habaruuji Nyalaaɗe nde Laamiiɓe Yahuuda.

²⁰Nde Akas maayi, ɓe uwi ɗum baŋnge genaale kaakiraaɓe muuɗum nder Berniwol Daawuda. Ɓiyiiko Hezekiya laami haa pellel maako.