Read Fulfulded 2 Laamiiɓe 19 Bible Online

2 Laamiiɓe 19 - Fulfulded bible

2 Laamiiɓe 19

¹Nde laamiiɗo Hezekiya nani ɗum, o seeki limce maako. O ɓorni buhuuje, o nasti haykaliiru Jawmiraawo.

²O neli Eliyakim, kaliifaajo laamorde e Sebna, binndoowo e liman'en ndotti'en haa annabi Esaaya ɓii Amoosa, ɓe ɓorniiɓe limce buhuuje.

³Ɓe mbi'i mo: “Ndaa ko Hezekiya wi'i: Nyalaade nde'e ɗum nyalaade ɓillaare e feloore e toskaare ngam amin, bana to nyalaade danyugo yotti, ammaa semmbe danyugo walaa.

⁴Teema Allah Jawmiraawo maaɗa nanan bolle mawɗo yarnooɓe, mo jawmum laamiiɗo Assuura neli ɗum, haa o janca Allah geeto. Teema Allah Jawmiraawo maaɗa hiitoto bolle ɗe o nani. Kadi, waɗ do'aare ngam luttuɓe wonɓe ɗo.”

⁵Jaggiiɓe laamiiɗo Hezekiya ngari haa Esaaya.

⁶Esaaya wi'i ɓe: “Nii mbi'oton jaagorɗo mooɗon: Ndaa nii Jawmiraawo wi'i: Taa hul bolle ɗe nanɗa, ɗe jaggiiɓe laamiiɗo Assuura mbolwi kalluka dow am.

⁷Ndaa, mi nastinan ruuhuwol nder maako, haa o nana habaru, o loro haa lesdi maako. Ton mi do'an mo bee kaafahi.”

⁸Mawɗo yarnooɓe go lori, tawi laamiiɗo Assuura ɗon haɓa bee berniwol Libna, ngam o nani laamiiɗo ummi Lakis, dilli.

⁹Laamiiɗo nani habaru Tirhaka, laamiiɗo Etiyopiya[20]. Ɓe mbi'no mo: “Ndaa, o ɗon wara haɓugo bee maaɗa.” Fahin o neli nelaaɓe haa Hezekiya, o wi'i:

¹⁰“Ndaa nii mbi'oton Hezekiya laamiiɗo Yahuuda: Taa Allah maaɗa mo koolotoɗa sakle, wi'e: Urusaliima hokkataake haa juŋngo laamiiɗo Assuura.

¹¹Ndaa, a nani ko laamiiɓe Assuura mbaɗi lesɗe fuu, no ɓe nattiniri ɗe. Kadi, an a hisan na?

¹²Nde kaakiraaɓe am nattini Goojan e Haran e Resef e ɓiɓɓe Eden wonɓe haa Telassar, ɗowanteeɓe maɓɓe kisni ɓe na?

¹³Toy laamiiɗo Hamat e laamiiɗo Arpad e laamiiɗo berniwol Sefarwayim e Hena e Iwwa?”

¹⁴Hezekiya jaɓi bataakewol ngol nelaaɓe ngaddi, o jaŋngi ngol. Nden o nasti haykaliiru, o we'iti ngol yeeso Jawmiraawo.

¹⁵Nden o tori Jawmiraawo, o wi'i: “Yaa Jawmiraawo, Allah Isra'iila, jooɗiiɗo haa leeso laamu dow keruba'en, an feere ma woni Allah dow laamuuji duniyaaru fuu. An waɗi asama e lesdi.

¹⁶Yaa Jawmiraawo, nan, laar. Yaa Jawmiraawo, nan bolle ɗe Sanherib neldi ngam jancugo ma, yaa Allah geeto.

¹⁷Gooŋga, yaa Jawmiraawo, laamiiɓe Assuura mbirgi ummaatooje e lesɗe maaje.

¹⁸Ɓe cakkini ɗowanteeɓe maaje nder yiite — gooŋga kam naa ɓe ɗowanteeɓe — ngam ɗum yimɓe mbaɗi ɗum bee leɗɗe e kaa'e. Ɓe mbirgi ɗum.

¹⁹Ammaa jonta, yaa Allah Jawmiraawo amin, hisnu min juŋngo maako, ngam haa laamuuji duniyaaru fuu annda, an feere ma, yaa Jawmiraawo, an woni Allah!”

²⁰Esaaya ɓii Amoosa neli haa Hezekiya, ɓe mbi'i mo: “Ndaa nii Allah Jawmiraawo Isra'iila wi'i: Tornde nde toriiɗa mi ngam daliila Sanherib laamiiɗo Assuura, mi nani nde.”

²¹Ndaa koŋngol ngol Jawmiraawo wi'i dow maako: “Berniwol Urusaliima nannduŋgol bee paanyo debbo ɗon yawe, ɗon jance. Siyona ɗon dimmbina hoore ɓaawo maaɗa.

²²Moy njancuɗa? Moy mbolwanɗa kalluka, dow moy ɓaŋgtuɗa sawtu? A ɓaŋgti gite ma dow Ceniiɗo Isra'iila.

²³Bee kunnduɗe nelaaɓe ma njancuɗa Jawmiraawo, mbi'ɗa: Min mi wa'i towɗe kooseeje bee mooɓre mootaaji pucci am, haa nokkuuje Libanon ɓurɗe daayaago. Mi fe'i leɗɗe maare mawɗe cemmbiɗɗe e leɗɗe maare cuɓaaɗe booɗɗe. Mi yotti hoore Libanon e laynde maare ɓurnde sukkugo.

²⁴Mi wasi, mi yari ndiyam haa lesɗe jananne. Bee jaaɓruɗe kosɗe am njoornirmi maaje Misra fuu.

²⁵A nanaay no duuri mi taaskitini ɗum na? Mi nufi ɗum diga wakkati ɓooyma. Jonta timminmi ɗum, haa ngartira berniiji cemmbiɗɗi towndiije bille.

²⁶Jooɗiiɓe ton ngalaa baawɗe, ɓe cakli, ɓe cemti. Ɓe laati bana huɗo ngesa e haako hecco, bana huɗo dow soorowol, ko yoori diga ko mawnaay.

²⁷Mi anndi yaake njooɗotooɗa, yaake ngurtotooɗa e nastata e yaake tikkanta yam.

²⁸A tikkani yam, elewre ma eeŋgi haa noppi am. Ngam maajum mbaɗanmi halagaare am nder kine ma, labaŋgal am boo haa hunnduko ma. Mi lortinte dow laawol ngol ngardunooɗa.”

²⁹Nden Esaaya wi'i laamiiɗo Hezekiya: “Ndaa ko laatanto ma alaama: Hikka on nyaaman gabbe gariije, mawri boo ko fuɗi ɓaawo. Ammaa hitaande tataɓre aawe, code, njube gese inabooje, nyaame ɓiɓɓe maaje.

³⁰Daɗɓe nder yimɓe lenyol Yahuuda, luttuɓe maɓɓe mbaɗan ɗaɗi haa les, ndiman haa dow.

³¹Ngam daɗɓe, woɗɓe luttan haa Urusaliima e dow hooseere Siyona. Jawmiraawo timminan ɗum nder yiide mum semmbiɗnde.

³²Ngam maajum, ndaa nii Jawmiraawo wi'i dow laamiiɗo Assuura: O nastataa berniwol ngo'ol, o fiɗataa kurol nder maagol, o ɓadintaa wawarde[21] haa maagol, o waagataa lesdi ɗakki mahol maagol.

³³O loroto dow laawol ngol o wardi, o nastataa berniwol ngo'ol. Min Jawmiraawo wi'i ɗum.

³⁴Ngam min mi aynan berniwol ngo'ol haa mi hisna ngol ngam hoore am e ngam daliila jaggiiɗo am Daawuda boo.”

³⁵Jemma maajum malaa'ikaajo Jawmiraawo yehi nder saŋngeere Assuura'en, mbari worɓe ujine teemerre e cappanɗe njoweetato e njowo (185.000). Nde weeti, luttuɓe, yeeɗɓe tawi ɓalli maayɗi.

³⁶Sanherib laamiiɗo Assuura ummi, lori haa Niniwe, jooɗi ton.

³⁷Nyannde go'o, nde o ɗon sujida nder suudu lawru maako Nisrok, ɓiɓɓe maako Adirammelek e Sareser mbari mo bee kaafahi. Ammaa ɓe ndoggi, ɓe ndaɗi haa lesdi Araraada. Ɓiyiiko Esarhaddon laami haa pellel maako.