Read Fulfulded 2 Laamiiɓe 20 Bible Online

2 Laamiiɓe 20 - Fulfulded bible

2 Laamiiɓe 20

¹Nder wakkati man Hezekiya nyawi haa o ɓadake maayugo. Annabi Esaaya ɓii Amoosa wari laarugo mo, wi'i mo: “Ndaa nii Jawmiraawo wi'i: Saa'i waɗi, umru saare ma alkawal ngam a yeeɗataa, a maayan.”

²Nden Hezekiya wayliti gal mahol, o tori Jawmiraawo, o wi'i:

³“Yaa Jawmiraawo siftor no njahrumi yeeso maaɗa bee gooŋga e ɓernde woore, no kuuwrumi ko fottani ma.” Hezekiya woyi masin.

⁴Diga Esaaya wurtaaki daldal cakaawal tawon, wolde Jawmiraawo warani mo, o wi'i:

⁵“Lorta, wi' Hezekiya, ardiiɗo yimɓe am: Ndaa nii Jawmiraawo Allah kaaka ma Daawuda wi'i: Mi nani tornde ma, mi yi'i gonɗi ma. Ndaa, mi hurgete, nyannde tataɓre njahata haa haykaliiru Jawmiraawo.

⁶Mi ɓesdante duuɓi sappo e jowi. Mi hisnete, an bee berniwol ngo'ol diga juŋngo laamiiɗo Assuura. Mi aynan berniwol ngo'ol ngam hoore am e ngam jaggiiɗo am Daawuda boo.”

⁷Esaaya wi'i: “Ngadde tamre ibbe joorɗe.” Ɓe ngaddi, ɓe takki nde dow ɓuudi laamiiɗo, bana nii balɗe maako njuutiri.

⁸Hezekiya ƴami annabi Esaaya: “Alaama kaye gooŋɗinta Jawmiraawo hurgatam e mi heɓan yahugo haykaliiru maako nyannde tataɓre?”

⁹Esaaya jaabi: “Jawmiraawo hokkete alaama ngam gooŋɗinango ma no o waɗan ko o iinani ma. Ɗowdi waɗa dow jaaɓruɗe. Ɗume ɓurɗa yiɗugo, ɗowdi yaha dow jaaɓruɗe sappo na malla ndi loro ɓaawo dow jaaɓruɗe sappo?”

¹⁰Hezekiya wi'i: “Koyɗum ɗowdi ardo jaaɓruɗe sappo. Ndikka ndi loro jaaɓruɗe sappo.”

¹¹Nden annabi Esaaya tori Jawmiraawo, o lortini ɗowdi jaaɓruɗe sappo haa jaaɓruɗe Akas.

¹²Saa'i maajum Berodak-Baladan ɓii Baladan, laamiiɗo Baabila neldi bataakewol e dokkal haa Hezekiya. Ngam o nani Hezekiya nyawino.

¹³Hezekiya jaɓɓi nelaaɓe, holli ɓe sigordu ndesaaje muuɗum, cardi e kaŋŋeeri e uurle e nebbam caɗɗam, non boo suudu balmi e ko woni nder ndesaaje muuɗum fuu. Walaa koo ɗume nder saare maako e nder maral maako ko Hezekiya hollaay ɓe.

¹⁴Nden annabi Esaaya wari haa laamiiɗo Hezekiya, ƴami mo: “Ɗume worɓe ɓe'e mbi'i? Diga toy ɓe ngari?” Hezekiya jaabi: “Diga lesdi ndaayiindi ɓe ngari, diga Baabila.”

¹⁵O ƴami: “Ɗume ɓe ngi'i nder saare ma?” Hezekiya jaabi: “Ɓe ngi'i koo ɗume ko woni nder saare am fuu. Walaa ko mi hollaay ɓe nder ndesaaje am.”

¹⁶Esaaya wi'i Hezekiya: “Nan koŋngol Jawmiraawo.

¹⁷Ndaa, nyalɗe ɗon ngara, ɓe njahran haa Baabila ko woni nder saare ma fuu, ɗum ko kaakiraaɓe ma mbaagi haa wargo hannde, walaa ko luttata sam. Non Jawmiraawo wi'i.

¹⁸Ɓe koo'an woɗɓe nder danygol maaɗa haa ɓe laato saraaki'en nder laamorde laamiiɗo Baabila.”

¹⁹Hezekiya wi'i Esaaya: “Koŋngol Jawmiraawo ngol mbolwuɗa, ngol wooɗi.” O wi'i: “Nder balɗe am kam, jam e salaaman ɗon!”

²⁰Luttuɗum haala Hezekiya e baawɗe mum fuu, no o nyiɓri laawol ndiyam, o yahri ɗam nder berniwol boo, ɗum winndaama nder Deftere Habaruuji Nyalaaɗe nde Laamiiɓe Yahuuda.

²¹Hezekiya maayi, ɓiyiiko Manassa laami haa pellel maako.