Read Fulfulded 2 Laamiiɓe 23 Bible Online

2 Laamiiɓe 23 - Fulfulded bible

2 Laamiiɓe 23

¹Laamiiɗo ewni ndotti'en Urusaliima e Yahuuda fuu haa muuɗum.

²Nden o yahdi bee ummaatoore Urusaliima e Yahuuda e liman'en e annabi'en e yimɓe fuu, diga mawɗo haa leesɗo fuu haa haykaliiru Jawmiraawo. Nden o jaŋngani ɓe deftere alkawal heɓtaande nder haykaliiru Jawmiraawo go fuu.

³Nden laamiiɗo dari haa daŋraŋgal haykaliiru, hesɗitini alkawal bee hoo'ugo anniya tokkaago Jawmiraawo e ɗowtanaago umrooje e seedamkuuji e farillaaji maako bee ɓernde e yoŋki maako fuu, o huuwa fodde bolle binndaaɗe nder deftere alkawal. Ummaatoore fuu nasti alkawal nga'al.

⁴Ɓaawo maajum laamiiɗo umri Hilkiyya hooreejo liman'en e liman'en woɗɓe e aynooɓe dammuɗe haykaliiru, ɓe ngurtina mooɓgal kuuje baɗaaɗe ngam dewal Ba'al e Asera e tagle asama fuu diga haykaliiru. O wuli ɗe yaasi Urusaliima haa babe waadiwol Kederon. Ɓe njahri doɗɗe maaje haa Baytila.

⁵O nattini liman'en labbi, ɓe laamiiɓe Yahuuda njo'inno ngam wulugo uurle haa nokkuuje towɗe nder berniiji Yahuuda e taarde Urusaliima. E boo, o nattini wulooɓe uurle ngam Ba'al e naaŋge e lewru e burjuuji e jama'aare konu asama fuu.

⁶O wurtini suura Asera diga haykaliiru Jawmiraawo, o yahri ka yaasi Urusaliima o wuli ka nder waadiwol Kederon, o nami ka haa ka laati doɗɗe. O rufi ɗe haa pellel ngel ɓe ngasata genaale koo moy fuu.

⁷O yibbini cuuɗi nder haykaliiru, haa ɓe mbaɗata daakaareeku ngam rewugo labbi e haa rewɓe cannyata limce ngam dewal Asera.

⁸Nden o umri liman'en wonɓe nder berniiji Yahuuda fuu, ɓe ngara. O soɓni nokkuuje towɗe haa liman'en ngulino uurle, diga Geba haa yotti Beersaba. O yibbini nokkuuje towɗe haa dammuɗe gonɗe haa nastirde dammugal Yosuwa, kaliifaajo berniwol. Dammuɗe ɗe'e ɗonno haa nano nastanɗo berniwol fuu.

⁹Liman'en nokkuuje towɗe man mba'aakino haa hirsirde Jawmiraawo haa Urusaliima, ammaa ɓe nyaamino tamseeje ɗe ufnaaka caka deerɗiraaɓe maɓɓe.

¹⁰E boo o soɓni nokkuure wi'eteende Tofet nder waadiwol Ɓii-Hinnom, ngam taa koo moy lii'o ɓiyum gorko malla debbo ngam wulango Molek.

¹¹O itti suuraaji pucci ɗi laamiiɓe Yahuuda ndarnino ngam rewugo naaŋge haa nastirde haykaliiru Jawmiraawo, baŋnge suudu Netan-Melek, saraakiijo. O wuli boo mootaaji pucci ngam dewal naaŋge.

¹²O yibbini kirsirɗe ɗe laamiiɓe Yahuuda mbaɗno dow soorowol Akas haa dow, non boo ɗe Manassa waɗno haa babe ɗiɗi nder haykaliiru Jawmiraawo. Laamiiɗo sampiti ɗe fuu, rufi keeɗe man haa waadiwol Kederon.

¹³O soɓni nokkuuje towɗe ɗe Suleymaanu waɗno haa fombina[22] hooseere halkere. Nokkuuje ɗe'e tiitotiri bee Urusaliima. Suleymaanu, laamiiɗo Isra'iila, nyiɓno ɗe ngam labbi nyidduɗi ɗi'i: Astarte, lawru Sidoni'en e Kemos, lawru Mo'abi'en e Milkom, lawru Ammooni'en.

¹⁴O fusi daŋraŋge labbi, o fe'i suuraaji cenaaɗe ngam Asera, o hebbini nokkuuje maaje bee i'e yimɓe.

¹⁵O yibbini boo hirsirde wonnde haa Baytila e nokkuure townde nde Yerobo'am ɓii Nebat, mo nastinno Isra'iila'en nder hakke nyiɓno. O yibbini ɗe, o wuli nokkuure townde bee yiite, o nami nde haa nde laati mbulwuldi, o wuli suura Asera boo.

¹⁶Nde Yusiya wayliti, o yi'i genaale gonɗe dow hooseere. O neli yimɓe ngam wurtingo i'e nder maaje, o wuli ɗe dow hirsirde ngam soɓnugo nde. Ɗum laati fodde wolde Jawmiraawo nde goɗɗo Allah wolwuno naane go.

¹⁷Nden laamiiɗo ƴami: “Maandorde ndeye ngi'anmi to?” Yimɓe berniwol njaabi mo: “Ɗum yenaande goɗɗo Allah, garnooɗo diga Yahuuda, kaŋko waɗi annabaaku dow kuuje ɗe mbaɗɗa dow hirsirde nde'e.”

¹⁸Yusiya wi'i: “Acce yenaande nde'e! Taa goɗɗo meema i'e maako!” Bana nii ɓe kisniri i'e maako bee i'e annabiijo garnooɗo diga Samariya.

¹⁹Yusiya yibbini boo cuuɗi nokkuuje towɗe, ɗi laamiiɓe Isra'iila nyiɓno nder berniiji nder lesdi Samariya ngam tikkingo Jawmiraawo. O waɗi ɓe ko o waɗno haa Baytila.

²⁰O hirsi liman'en wulooɓe kirseteeɗi dow kirsirɗe ɗe'e fuu, o wuli i'e yimɓe dow maaje. Nden o lorti haa Urusaliima.

²¹Laamiiɗo Yusiya umri yimɓe fuu: “Mbaɗane Allah Jawmiraawo mon juulde Paska, bana ko winnda nder deftere alkawal nde'e.”

²²Juulde Paska bana nde'e meeɗaay waɗeego, diga zamanu alkaali'en Isra'iila haa wargo zamanu laamiiɓe Isra'iila e laamiiɓe Yahuuda fuu.

²³Ammaa nder nduuɓu laamu laamiiɗo Yusiya sappo e njoweetataɓu ɓe mbaɗani Jawmiraawo juulde Paska haa Urusaliima.

²⁴Yusiya ɗowtani boo umrooje binndaaɗe nder Deftere Tawreeta nde Hilkiyya hooreejo liman'en heɓti nder haykaliiru Jawmiraawo. O riiwi sarwooɓe maayɓe e laarooɓe, o nattini labbi ci'e[23] e labbi goɗɗi e kuuje nyidduɗe gonɗe nder lesdi Yahuuda e haa Urusaliima fuu.

²⁵Walaa laamiiɗo bana maako aarti mo, mo lorti haa Jawmiraawo bee ɓernde e yoŋki e semmbe muuɗum fuu fodde tawreeta Muusa fuu. Bana maako meeɗaay koo ɓaawo maako boo.

²⁶Ammaa Jawmiraawo accaay tikkere muuɗum saatunde. Nde saati dow Yahuuda ngam ko Manassa waɗno fuu ngam tikkingo Jawmiraawo.

²⁷Jawmiraawo wi'i: “Mi riiwan Yahuuda yeeso am boo bana ndiiwrumi Isra'iila. Mi wudinan Urusaliima, berniwol ngol cuɓmi e haykaliiru ndu mbi'mi: Innde am wonan ton.”

²⁸Luttuɗum haala Yusiya e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Yahuuda.

²⁹Nder zamanu laamu maako, Firawna Neko, laamiiɗo Misra wari haa laamiiɗo Assuura haa maayo Efratis. Laamiiɗo Yusiya fotti bee maako ngam o haɗa mo. Ammaa nde Neko yi'i mo, o mbari mo haa Megiddo.

³⁰Nde o maayi, sukaaɓe maako koo'i ɓanndu maako diga Megiddo bee moota pucci, ɓe njahri ndu haa Urusaliima. Ton ɓe uwi ndu nder yenaande maako. Ɓaawo man yimɓe lesdi Yahuuda cuɓi Yo'ahas ɓii Yusiya, ɓe moyti mo, ɓe laamini mo haa pellel baaba maako.

³¹Yo'ahas woodi duuɓi noogas e tati, saa'i o laamo. O laami haa Urusaliima lebbi tati. Innde daada maako, Hamutal ɓii Yeremiya mo Libna.

³²O waɗi kalluɗum yeeso Jawmiraawo, kal-kal bana kaakiraaɓe maako.

³³Firawna Neko haɓɓi mo haa Ribla, nder lesdi Hamat, ngam taa o tokko laamaago haa Urusaliima. Bana nii o haɗiri mo laamaago. O yowani lesdi Yahuuda jomorgol cardi baakin kilo ujine tati e kaŋŋeeri baakin kilo cappanɗe tati.

³⁴O hokki Eliyakim ɓii Yusiya laamu haa pellel baaba maako. O sannji innde maako bee Yooyakim. Ammaa o hoo'i Yo'ahas, o yahri mo haa Misra. Ton o maayi.

³⁵Yooyakim dooli yimɓe lesdi yoɓugo ceede fodde umroore Firawna. O hoo'i cardi e kaŋŋeeri haa yimɓe lesdi, haa koo moy fodde mardi mum, o hokki ɗum Firawna Neko.

³⁶Yooyakim woodi duuɓi noogas e jowi saa'i o laamo. O laami haa Urusaliima duuɓi sappo e go'o. Innde daada maako, Jebuda ɓii Pedaya mo Ruma.

³⁷O waɗi kalluɗum yeeso Jawmiraawo, kal-kal bana kaakiraaɓe maako.