Read Fulfulded 2 Laamiiɓe 24 Bible Online

2 Laamiiɓe 24 - Fulfulded bible

2 Laamiiɓe 24

¹Nder zamanu maako, Nabukodonosor laamiiɗo Baabila wari hippi lesdi Yahuuda. Yooyakim leestani mo duuɓi tati. Ɓaawo maajum, o tuurtani mo.

²Nden Jawmiraawo neli mooɓe hippooɓe: Kaldiya'en e Siriya'en e Mo'abi'en e Ammooni'en dow Yooyakim, ngam halkugo laamu Yahuuda fodde wolde nde o wi'no bee kunnduɗe annabi'en maako.

³Ɗum laati fodde wolde Jawmiraawo dow yimɓe Yahuuda ngam wudingo ɓe daayiiɗum bee maako, daliila hakkeeji ɗi laamiiɗo Manassa waɗi fuu,

⁴o mbari yimɓe ɗuuɗɓe ɓe ngoodaa aybe, o hebbini berniwol Urusaliima bee ƴiiƴam maɓɓe haa Jawmiraawo yiɗaa yaafaago fahin.

⁵Luttuɗum haala Yooyakim e kuuɗe mum fuu, ɗum winndaama nder Deftere Habaruuji Nyalaaɗe nde Laamiiɓe Yahuuda.

⁶Nde Yooyakim maayi, ɓiyiiko, Yooyakin laami haa pellel maako.

⁷Ammaa laamiiɗo Misra meetaay wurtaago lesdi muuɗum, ngam laamiiɗo Baabila nyaamno maral laamiiɗo Misra diga maayel Misra haa maayo Efratis.

⁸Yooyakin woodi duuɓi sappo e joweetati, saa'i o laamo. O laami haa Urusaliima lebbi tati. Innde daada maako, Nehusta ɓii Elnatan mo Urusaliima.

⁹O waɗi kalluɗum yeeso Jawmiraawo, kal-kal bee ko kaakiraaɓe maako mbaɗno.

¹⁰Saa'i maajum honooɓe Nabukodonosor laamiiɗo Baabila ngari haa Urusaliima, ɓe maɓɓi berniwol.

¹¹Nabukodonosor laamiiɗo Baabila bee hoore mum wari hippi berniwol, saa'i honooɓe ɗonno taari ngol.

¹²Nden Yooyakin laamiiɗo Yahuuda, wurti berniwol, yehi haa laamiiɗo Baabila, kaŋko e daada maako e jaggiiɓe maako e mawɓe e saraaki'en maako. Laamiiɗo Baabila naŋngi ɓe. Ɗum laati nder nduuɓu laamu Nabukodonosor joweetataɓu.

¹³Nabukodonosor hooci ndesaaje haykaliiru Jawmiraawo e ndesaaje saare laamu fuu. O sampiti kuuje kaŋŋeeri ɗe Suleymaanu laamiiɗo Isra'iila waɗno nder haykaliiru Jawmiraawo ngam dewal, bana Jawmiraawo wi'no.

¹⁴O dahi yimɓe ummaatoore Urusaliima, mawɓe e honooɓe semmbiɗɓe fuu, limgal maɓɓe waɗi ujine sappo. O dahi boo marɓe sanaa'aaji e kila'en fuu. Walaa mo lutti sonaa laafuɓe nder yimɓe lesdi man.

¹⁵O dahi laamiiɗo Yooyakin e daada muuɗum e rewɓe muuɗum e saraaki'en muuɗum e semmbiɗɓe muuɗum diga Urusaliima e mawɓe Yahuuda e

¹⁶mawɓe ujine njoweeɗiɗo e marɓe sanaa'aaji e kila'en ujineere, bee suusɓe, waawɓe konu fuu, laamiiɗo Baabila yahri ɓe haa Baabila.

¹⁷O laamini Mattaniya, bappa Yooyakin, haa pellel Yooyakin. O sannji innde maako, o inndi mo Sedekiya.

¹⁸Sedekiya woodi duuɓi noogas e go'o, saa'i o laamo. O laami haa Urusaliima duuɓi sappo e go'o. Innde daada maako, Hamutal ɓii Yeremiya mo Libna.

¹⁹O waɗi kalluɗum yeeso Jawmiraawo, kal-kal bana Yooyakim waɗno.

²⁰Ɗum waɗi non ngam Jawmiraawo tikkani Urusaliima e Yahuuda haa o riiwi ɓe daayiiɗum bee maako. Sedekiya boo tuurtani laamiiɗo Baabila.