Read Fulfulded 2 Laamiiɓe 3 Bible Online

2 Laamiiɓe 3 - Fulfulded bible

2 Laamiiɓe 3

¹Yoram ɓii Akab laami haa Isra'iila nder nduuɓu laamu Yusafat, laamiiɗo Yahuuda sappo e njoweetataɓu. O laami haa Samariya duuɓi sappo e ɗiɗi.

²O waɗi kalluɗum yeeso Jawmiraawo, ammaa naa bana baaba e daada maako. O itti daŋraŋgal Ba'al ngal baaba maako tiggino.

³Ammaa Yoram tokki hakkeeji ɗi Yerobo'am ɓii Nebat nastini Isra'iila'en nder maaji, o accaay ɗi.

⁴Meesa, laamiiɗo Mo'ab, mari tokke baali. Doole hitaande fuu o yahrana laamiiɗo Isra'iila jomorgol, ɓiɓɓe baali ujine teemerre e baali marɗi gaasaaji juuɗɗi ujine teemerre.

⁵Nde Akab maayi, laamiiɗo Mo'ab tuurtani Yoram laamiiɗo Isra'iila.

⁶Saa'i maajum laamiiɗo Yoram wurti Samariya, ɗon lima honooɓe Isra'iila fuu.

⁷Nden o neli haa Yusafat laamiiɗo Yahuuda, ɓe mbi'a mo: “Laamiiɗo Mo'ab tuurtani yam. A yahdan bee am haɓugo bee Mo'ab na?” Laamiiɗo Yahuuda jaabi: “Min bee ma en ɗon bana goɗɗo gooto, non boo yimɓe am e yimɓe maaɗa, pucci am e pucci maaɗa.”

⁸Nden o ƴami: “Laawol ngole en tokkoto?” Laamiiɗo Isra'iila wi'i: “Laawol ladde Edoom.”

⁹Laamiiɗo Isra'iila e laamiiɗo Yahuuda e laamiiɗo Edoom ndillidi. Ɓe njehi nyalɗe joweeɗiɗi. Ɓe keɓaay ndiyam ngam jama'aare konu e dabbaaji tokkiiɗi ɓe.

¹⁰Nden laamiiɗo Isra'iila wi'i: “Bone woodani en! Jawmiraawo mooɓti en, enen laamiiɓe tato fuu haa ɗo ngam hokkugo en haa juuɗe Mo'abi'en.”

¹¹Ammaa Yusafat ƴami: “Walaa annabiijo haa ɗo haa o ƴamana en Jawmiraawo na?” Gooto nder sukaaɓe laamiiɗo Isra'iila jaabi: “Elisa ɓii Safat kuuwanoowo Eliya ɓurɗo ɓadaago mo ɗon ɗo.”

¹²Yusafat wi'i: “Fakat goɗɗo oo wolwanan en wolde Jawmiraawo.” Nden laamiiɓe tato fuu njehi haa maako.

¹³Ammaa Elisa wi'i laamiiɗo Isra'iila: “Ko yaali yam bee maaɗa? Yah haa annabi'en baaba ma e annabi'en daada ma.” Laamiiɗo Isra'iila wi'i mo: “Naa non, ngam Jawmiraawo mooɓti laamiiɓe tato ɓe'e, o hokka ɓe haa Mo'ab.”

¹⁴Elisa wi'i: “Fakat bana Jawmiraawo honooɓe asama mo mi jagganto o geeto, mi jaabete ngam mi ɗon semta Yusafat, laamiiɗo Yahuuda, to naa non mi faalataano ma, mi laarataano ma sam.

¹⁵Jonta kam, ngaddaneeɗam piyoowo moolooru.” Nde piyoowo moolooru ɗon yima, baawɗe Jawmiraawo ngari dow Elisa.

¹⁶O wi'i: “Ndaa nii Jawmiraawo wi'i: Ngase gasɗe ɗuuɗɗe nder waadiwol ngo'ol.

¹⁷Ngam Jawmiraawo wi'i: On ngi'ataa henndu, on ngi'ataa iyeende boo. Ammaa bee non fuu, waadiwol ngo'ol heewan ndiyam, haa on njara, onon e tokke mon e dabbaaji mon fuu.

¹⁸Kanjum ɗum peetum haa Jawmiraawo, o hokkan on Mo'abi'en boo.

¹⁹On nyaaman berniiji cemmbiɗɗi e mawɗi fuu. On pe'an leɗɗe booɗɗe koo ɗeye, on cukkan ceeɓooje ndiyam koo ɗeye, on mbonnan gese booɗɗe koo ɗeye bee kaa'e.”

²⁰Fajiri, wakkati lii'aago dokkal nyaamdu, ndaa ndiyam wari dow laawol diga Edoom, lesdi heewi ndiyam.

²¹Nde Mo'abi'en fuu nani laamiiɓe ngari haɓugo bee maɓɓe, ɓe mooɓti waawɓe konu diga pamaro haa mawɗo. Ɓe ngari, ɓe ndari haa keerol lesdi maɓɓe.

²²Nde ɓe ndawi cub, naaŋge fuɗi, wooji dow ndiyam, Mo'abi'en ngi'i ndiyam man, ɗam wooji bana ƴiiƴam.

²³Ɓe mbi'i: “Ɗum ƴiiƴam! Jama'aaje laamiiɓe mbaɗi haɓre, mbarmbartiri. Hey! Mo'abi'en, ndillen en kooca jawdi maɓɓe!”

²⁴Ammaa nde ɓe nasti saŋngeere Isra'iila, Isra'iila'en ummi, njaali Mo'abi'en haa ɓe ndoggi yeeso maɓɓe. Nden ɓe nasti lesdi Mo'ab, ɓe tokki jaalaago ɓe,

²⁵ɓe ngibbini berniiji. Nde ɓe ɗon caalo kommbi ngesa mbooɗka, koo moy maɓɓe ɗon sakkina hayre dow maaka, haa gese fuu keewi kaa'e. Ɓe cukki ceeɓooje ndiyam fuu, ɓe pe'i leɗɗe booɗɗe fuu. Sey kaa'e berniwol Kir-Hareseet tan lutti. Fiɗooɓe kaa'e bee piwli taari ngol, piɗi dow maagol.

²⁶Nde laamiiɗo Mo'ab yi'i haɓre ɓuri mo semmbe, o hoo'i wakkiiɓe kaafaaje teemeɗɗe njoweeɗiɗo, ngam haa o seeka taarde konne'en, o yotto haa wakeere laamiiɗo Edoom. Ammaa ɓe mbaawaay.

²⁷Nden o hoo'i afo maako tammiiɗo laamaago haa pellel maako, o lii'i mo o guleteeɗo dow mahol berniwol. Tikkere saatunde wari dow Isra'iila'en, ɓe acci mo, ɓe kooti lesdi maɓɓe.