Read Fulfulded 2 Laamiiɓe 4 Bible Online

2 Laamiiɓe 4 - Fulfulded bible

2 Laamiiɓe 4

¹Nyannde feere, debbo annabiijo gooto caka pukara'en annabi'en wari haa Elisa, tori mo ballal, wi'i: “A anndi goram o kulɗono Jawmiraawo. Jonta o maayi, dokkuɗo min nyamaande waran hooca ɓikkoy am ngorkoy ɗiɗoy, ngam laatingo koy maccuɓe maako.”

²Elisa wi'i mo: “Ɗume ngiɗɗaa mi waɗane? Yeccam ko marɗa haa saare ma.” O jaabi: “Mi walaa koo ɗume, sey nebbam seɗɗa nder faandu.”

³Elisa wi'i mo: “Yah, ƴam haa heeddiɗɗiraaɓe ma ɓe ndokke paali cooki, waddu ɗi ɗuuɗɗi.

⁴Nden nastu suudu bee ɓikkoy ma, maɓɓu dammugal booɗɗum. Nden a loowa nebbam nder paali man fuu. Heewndu fuu a sottina ndu.”

⁵Nden debbo dilli. Nde o yotti saare, o maɓɓi dammugal, ɓikkoy maako ɗon ndokka mo paali, o ɗon loowa hebbina ɗi.

⁶Nde paali fuu keewi nebbam, o wi'i gooto nder ɓiɓɓe maako: “Hokkam faandu feere.” Ammaa o wi'i mo: “Walaa faandu lutti, paali fuu keewi.” Nden nebbam acci ilugo.

⁷O yehi, o anndini ɗum annabi Elisa. Kaŋko boo o wi'i mo: “Yah, soorru nebbam ɗa'am, yoɓru nyamaande wonnde dow ma. An e ɓiya'en, on nguurira ceede luttanɗe.”

⁸Nyannde feere Elisa yehi haa Sunem. Woodi debbo feere mawɗo ton, o tori mo ɗuuɗɗum ngam o yaha o nyaama haa maako. Ngam maajum, nde Elisa yaalti ton fuu, o ɗon yaha nyaama haa maako.

⁹Debbo oo wi'i gorum: “Mi anndi fakat gorko jaaltanɗo tum haa meeɗen oo, o goɗɗo Allah, o cenaaɗo.

¹⁰Sey en mahana mo suudu famardu dow soorowol, en njo'inana mo leeso e taabal e koromwal e pittirla nder maaru. To o wari haa meeɗen, o waawan weerugo ton.”

¹¹Nyannde feere Elisa wari fahin, o nasti suudu maajum, o waali ton.

¹²Nden o wi'i suka maako Geehazi: “Ewna debbo Sunemiijo oo.” Geehazi yehi ewni mo, debbo wari, dari yeeso maako.

¹³Elisa wi'i Geehazi: “Wi' mo: A sukli suklere nde'e fuu ngam amin. Ɗume min mbaɗante? Woodi haala ma ka min mbolwanta laamiiɗo malla mawɗo honooɓe na?” Debbo jaabi: “Aa'a, mi ɗon jooɗi jam caka yimɓe ummaatoore am.”

¹⁴Nden Elisa wi'i Geehazi: “Ɗume mbaɗanten mo?” Geehazi wi'i: “O woodaa ɓiŋngel, goriiko boo naywi.”

¹⁵Elisa wi'i: “Ewnita mo.” O ewniti mo, debbo wari dari haa dammugal.

¹⁶Elisa wi'i mo: “Mawri bana wakkatiire nde'e a jogoto ɓiɗɗo gorko.” Debbo wi'i: “Waɗataako! Goɗɗo Allah, taa fewam.”

¹⁷Ammaa debbo oo reedi, o danyi ɓiɗɗo gorko mawri maajum, bana Elisa wi'no mo.

¹⁸Ɓiŋngel mawni. Nyannde feere, ngel yehi haa baaba maagel mo ɗonno huuwda bee sodooɓe.

¹⁹Ngel wi'i: “Baaba! Hoore am ɗon naawa!” Baaba maagel wi'i suka muuɗum: “Eftu ngel, yahran daada maagel.”

²⁰Suka oo yahrani ngel daada maagel. Daada maagel jo'ini ngel dow koppi muuɗum haa caka nyalawma, nden ngel maayi.

²¹Daada maagel wa'i haa soorowol, wallini ngel dow be'itte Elisa. Nden o maɓɓi dammugal, o wurti yaasi.

²²O ewni goriiko, o wi'i mo: “Useni neldam gooto nder sukaaɓe ma bee wamnde rewre. Sey mi yaha law haa goɗɗo Allah, mi warta.”

²³Goriiko ƴami mo: “Ngam ɗume njahata haa maako hannde? Naa ɗum juulde lewru hesru, naa ɗum nyalaade siwtorde boo.” O jaabi: “Jam koo ɗume!”

²⁴O daɗɗi wamnde, o wi'i suka maako: “Ɗow wamnde ndillen, taa darnam, sonaa to mi wi'i ma.”

²⁵Nden o dilli gal laawol yahugo hooseere Karmel ngam tawoygo Elisa. Nde Elisa eewi mo daayiiɗum, wi'i suka muuɗum Geehazi: “Ndaa debbo Sunemiijo haa to.

²⁶Doggu, fottu bee maako, saanu mo: A jamo na? Gorko ma jamo na? Ɓiŋngel ma jamel na?” Geehazi yehi saani mo. Debbo jaabi: “Jam koo ɗume!”

²⁷Nde o yotti haa Elisa dow hooseere, o do'i, o naŋngi mo kosɗe. Geehazi yiɗi yerɓugo mo. Ammaa Elisa wi'i: “Accu mo. Ɓernde maako metti. Ammaa Jawmiraawo waŋginanaay yam daliila maajum.”

²⁸Debbo wi'i mo: “Barkaama, mi toriiɗo ma ɓiŋngel na? Mi wi'aay ma taa waɗam rikici!”

²⁹Elisa wi'i Geehazi: “Taada! Hoo'u sawru am, yaawɗa. To a fotti bee goɗɗo, taa hoofnu mo. To goɗɗo hoofni ma, taa jaaba. Wallin sawru am dow yeeso ɓiŋngel.”

³⁰Ammaa daada ɓiŋngel wi'i Elisa: “Fakat bana Jawmiraawo o geeto e an boo a geeto, mi accataa ma sam.” Nden Elisa dillidi bee maako.

³¹Ammaa Geehazi aarti ɓe. O wallini sawru dow yeeso ɓiŋngel. Ammaa walaa alaama poofɗe, walaa ko dimmbi. O lori, o fotti bee Elisa, o wi'i: “Ɓiŋngel finaay.”

³²Nde Elisa nasti suudu, o yi'i ɓiŋngel ɗon waali dow be'itte maako, ngel maayŋgel.

³³O maɓɓi dammugal, o tori Jawmiraawo.

³⁴Nden o waali dow ɓiŋngel, o waɗi hunnduko maako dow hunnduko maagel e gite maako dow gite maagel e juuɗe maako dow juuɗe maagel, o naaɗi dow maagel. Ɓanndu maagel wuli seɗɗa.

³⁵Elisa ummi, o taari nder suudu. Nden o naaɗi dow maagel fahin. Ɓiŋngel ɗisli nde joweeɗiɗi, nden ngel maɓɓiti gite.

³⁶Nden Elisa ewni Geehazi, wi'i mo: “Yah ewnoya daada ɓiŋngel.” Geehazi ewni mo. Nde o yotti, Elisa wi'i mo: “Hoo'u ɓiya.”

³⁷Debbo nasti suudu, turi, tuggi koppi haa yeeso maako, nden hoo'i ɓiyiiko, wurti.

³⁸Elisa lori haa Gilgal. Saa'i man weelo waɗi haa lesdi. Nde pukara'en annabi'en njooɗi yeeso maako, o wi'i suka maako: “Wa'in fayannde mawnde haa yiite, defan annabi'en nyaamdu.”

³⁹Gooto maɓɓe yehi ngesa ngam wa'oygo huɗo. O tawi layol goɗŋgol haa ladde, o teɓi ɓenndalooje nannduɗe bee paali ginnaaji haa maagol, o hebbini ngapaleewol maako bee maaje. O hooti o ta'i ɗe geɓe geɓe, o loowi ɗe nder fayannde, ɓe anndaa ɗum ɗume.

⁴⁰Ammaa nde ɓe njuppi ɗum, ɓe puɗɗi nyaamugo, ɓe ngooki ɓe mbi'i: “Goɗɗo Allah, nyaamdu man ɗon bee tooke!” Ɓe mbaawaay nyaamugo ɗum.

⁴¹Nden Elisa wi'i: “Ngaddaneeɗam kuroori.” O ukki ndi nder fayannde, o wi'i: “Njuppe ɗum, ngam haa en nyaama. Tooke walaa nder fayannde fahin.”

⁴²Nder zamanu maajum, goɗɗo wari diga Ba'al-Salisa, o waddani goɗɗo Allah ƴaamnde aartunde haa ngesa maako: Tamseeje sa'iiruuri noogas, bee buhuure kuroori alkamaari kesri. Elisa wi'i suka muuɗum: “Senndan ɗum yimɓe fuu.”

⁴³Ammaa suka oo wi'i: “Noy mi waawrata nyaamnugo yimɓe teemerre bee ɗu'um?” Elisa wi'i mo: “Senndan ɗum yimɓe fuu. Ngam ndaa ko Jawmiraawo wi'i: Ɗum he'an koo moy fuu haa lutta.”

⁴⁴Suka oo senndani yimɓe tamseeje man, koo moy maɓɓe nyaami haa ɗum lutti bana Jawmiraawo wi'no.