Read Fulfulded 1 Habaruuji Nyalaaɗe 12 Bible Online

1 Habaruuji Nyalaaɗe 12 - Fulfulded bible

1 Habaruuji Nyalaaɗe 12

¹Saa'i Daawuda ɗonno suuɗo haa Cikilak ngam haa o daɗa Sawulu ɓii Kis, honooɓe semmbiɗɓe woɗɓe ngari haa maako, mballi mo nder konu.

²Ɓe ngoodi lagaaje e piwli, ɓe mbaawi fiɗugo kuri e kaa'e bee juŋngo nyaamo koo nano boo. Ɓe banndiraaɓe Sawulu mo Benyamin. Ndaa inɗe maɓɓe:

³Ahi'ezer, hooreejo maɓɓe e Yo'as ɓiɓɓe Sema'a mo Gibiya e Yesiyel e Pelet ɓiɓɓe Azmawet e Bereka e Yeehu mo Anatot

⁴e Yisma'ya mo Gibiyon, o gooto nder suusɓe cappanɗe tato go, ɓurɗo ɓe fuu

⁵e Yeremiya e Yahajiyel e Yohanan e Yozabat mo Gedera

⁶e Ele'ujay e Yerimot e Be'aliya e Semariya e Sefatiya mo Haruf

⁷e Elkaana e Yissiya e Azareyel e Yo'ejer e Yasobo'am, ɓe Koora'en

⁸e Yo'ela e Zebadiya, ɓiɓɓe Yeroham mo Gedor.

⁹Yimɓe Gada woɗɓe ndilli, kawti bee Daawuda haa hisrude muuɗum nder ladde. Ɓe honooɓe semmbiɗɓe nder jama'aare konu. Ɓe mari baawal huuwtinirgo bawarɗe[12] mawɗe e labbe, geese maɓɓe nanndi bee geese barooɗe, ɓe mbaawi doggugo bana lelji. Ndaa inɗe maɓɓe:

¹⁰Ezer, o hooreejo maɓɓe, Obadiya ɗiɗaɓo, Eliyabu tataɓo,

¹¹Mismana nayaɓo, Yeremiya njowaɓo,

¹²Attay njoweegoojo, Eliyel njoweeɗiɗaɓo,

¹³Yohanan njoweetataɓo, Elzabat njoweenayaɓo,

¹⁴Yeremiya sappoojo, Makabanay sappo e ngo'oojo.

¹⁵Yimɓe Gada ɓe'e ngoni mawɓe konu, pamaro maɓɓe ɓuri yimɓe teemerre, mawɗo boo ɓuri yimɓe ujineere.

¹⁶Kamɓe ɓe eeri maayo Urdun nder lewru aranndu, saa'i ngo teelata[13] dow pomoole maago. Ɓe ndiiwi jooɗiiɓe waadiiji fuu haa fuunaaŋge e hiirnaaŋge.

¹⁷Yimɓe Benyamin e yimɓe Yahuuda woɗɓe ngari haa hisrude Daawuda.

¹⁸Daawuda wurti, fotti bee maɓɓe, wi'i ɓe: “To jam waddi on haa ɗo haa on mballammi kam, mi jaɓan on bee ɓernde woore, ammaa to on ngari ngam zammbaago yam e wallugo konne'en am, koo to mi waɗaay aybe sam, nden kam sey Allah kaakiraaɓe meeɗen laara ɗum, hiito on!”

¹⁹Nden Ruuhu Allah naŋngi Amasay, hooreejo suusɓe cappanɗe tato go, o wi'i: “Min yimɓe ma Daawuda! Min ngondan bee ma, ɓii Yeesa! Jam, jam laatano ma! Jam laatano wallooɓe ma, ngam Allah maaɗa ɗon walle!” Nden Daawuda jaɓɓi ɓe, darni ɓe ɓe mawɓe dow mooɓre hippooɓe muuɗum.

²⁰Yimɓe Manassa woɗɓe boo ndilli, kawti bee Daawuda, wakkati o wardi bee Filisti'en ngam haɓugo bee Sawulu. Ammaa ɓe mballaay Filisti'en, ngam laamiiɓe Filisti'en carwootiri, mbi'i: “O tammi lortaago haa jawmiiko Sawulu, o mbara yimɓe meeɗen, o ta'a ko'e maɓɓe.” Ngam maajum ɓe njaɓɓiti mo.

²¹Nde o lorti haa Cikilak, Manassa'en ɓe'e kawti bee maako: Adanaha e Yozabat e Yedi'ayel e Mika'iilu e Yozabat e Elihu e Cillitay, ɓe ardiiɓe dow honooɓe ujineere nder lenyol Manassa.

²²Ɓe mballi Daawuda haɓugo bee mooɓre hippooɓe, ngam ɓe fuu ɓe honooɓe semmbiɗɓe, ɓe laati mawɓe nder jama'aare konu.

²³Nyalɗe fuu yimɓe ngari ngam wallugo Daawuda, haa jama'aare konu maako laati mawnde masin.

²⁴Ndaa limgal geɓe taaskaniiɓe konu, warɓe haa Daawuda haa Heburuun, ngam heɓango mo laamu Sawulu, bana Jawmiraawo umruno:

²⁵Nder yimɓe Yahuuda, marɓe bawarɗe e labbe, taaskaniiɓe konu ujine njoweego e teemeɗɗe njoweetato (6.800).

²⁶Nder yimɓe Simeyon, honooɓe semmbiɗɓe ujine njoweeɗiɗo e teemerre (7.100).

²⁷Nder yimɓe Lewi, ujine nayo e teemeɗɗe njoweego (4.600).

²⁸Yoyada woni ardiiɗo nder danygol Haruna e ujine tato e teemeɗɗe njooweeɗiɗo (3.700) ngondi bee maako

²⁹e Cadok, konoowo cemmbiɗɗo, suka bee worɓe nder saare muuɗum, mawɓe noogas e ɗiɗo.

³⁰Nder yimɓe Benyamin, banndiraaɓe Sawulu, ujine tato. Haa wargo saa'i maajum, ɓurna yimɓe ɓe'e ngonno kaliifa'en kuuɗe nder saare Sawulu.

³¹Nder yimɓe Efrayim, honooɓe semmbiɗɓe marɓe inɗe nder ci'e muuɗum'en ujine noogas e teemeɗɗe njoweetato (20.800).

³²Nder yimɓe reeta lenyol Manassa, ujine sappo e njoweetato (18.000), ewnaaɓe innde innde haa ɓe njaha laamingo Daawuda.

³³Nder yimɓe Issakar, hakkilɓe ngam anndugo no Isra'iila huuwrata wakkatiiji fuu, mawɓe maɓɓe teemeɗɗe ɗiɗo, bee banndiraaɓe maɓɓe tokkiiɓe umrooje maɓɓe.

³⁴Nder yimɓe Zabulon, taaskaniiɓe konu bee balmi muuɗum'en feere feere fuu, ujine cappanɗe njowo (50.000) ngam wallugo Daawuda bee ɓernde woore.

³⁵Nder yimɓe Neftali, mawɓe ujineere e wonduɓe bee maɓɓe, marɓe bawarɗe mawɗe e labbe ujine cappanɗe tato e njoweeɗiɗo (37.000).

³⁶Nder yimɓe Dan, taaskaniiɓe konu ujine noogas e njoweetato (28.000).

³⁷Nder yimɓe Aser, honooɓe waawɓe konu taaskiiɓe ujine cappanɗe nayo (40.000).

³⁸Haa gaɗa Urdun boo, nder yimɓe Ruben e Gada e reeta lenyol Manassa, marɓe balmi konu fuu, ujine teemerre e noogas (120.000).

³⁹Honooɓe ɓe'e fuu, ɓe taaskaniiɓe darnugo caffuuji[14]. Ɓe ngari haa Heburuun bee ɓernde woore ngam haa ɓe laamina Daawuda dow Isra'iila fuu. Bana non boo luttuɓe Isra'iila, ɓe narri ɓernde woore ngam haa ɓe laamina Daawuda.

⁴⁰Honooɓe go ngondi ton bee Daawuda nyalɗe tati, ɓe nyaami, ɓe njari, ngam banndiraaɓe maɓɓe taaskitinino ɗum.

⁴¹Heeddiɗɗiraaɓe maɓɓe haa yotti lesɗe Issakar e Zabulon e Neftali ngaddi nyaamdu dow bamɗe e geelooɗi e alfadariije e ga'i. Ɓe ngaddi kuroori e ibbe joorɗe tamaaɗe e inabooje joorɗe tamaaɗe e inaboojam e nebbam e ga'i e dammooji ɗuuɗɗi, Isra'iila fuu ɗon seyo.