Read Fulfulded 1 Habaruuji Nyalaaɗe 15 Bible Online

1 Habaruuji Nyalaaɗe 15 - Fulfulded bible

1 Habaruuji Nyalaaɗe 15

¹Daawuda nyiɓani hoore mum cuuɗi nder berniwol muuɗum. O taaskitini boo nokkuure ngam sundukru Allah, o darni suudu laymaaru ngam maaru.

²Daawuda wi'i: “Sey Lewi'en tan ndoondoto sundukru Allah, ngam kamɓe Jawmiraawo suɓi ngam roondaago sundukru muuɗum, ɓe cuklano kuugal maajum foroy.”

³Nden Daawuda mooɓti Isra'iila fuu haa Urusaliima, ngam haa ɓe ngartira sundukru Jawmiraawo haa nokkuure nde o taaskitinani ndu.

⁴Daawuda mooɓti yimɓe Haruna e Lewi'en.

⁵Nder danygol Kahat: Uriyel, ardiiɗo maɓɓe e banndiraaɓe muuɗum, ɓe teemerre e noogas (120).

⁶Nder danygol Meraari boo: Asaya, ardiiɗo maɓɓe e banndiraaɓe muuɗum, ɓe teemeɗɗe ɗiɗo e noogas (220).

⁷Nder danygol Gersom boo: Yo'el, ardiiɗo maɓɓe e banndiraaɓe muuɗum, ɓe teemerre e cappanɗe tato (130).

⁸Nder danygol Elicafan boo: Sema'ya, ardiiɗo maɓɓe e banndiraaɓe muuɗum, ɓe teemeɗɗe ɗiɗo (200).

⁹Nder danygol Heburuun boo: Eliyel, ardiiɗo maɓɓe e banndiraaɓe muuɗum, ɓe cappanɗe njoweetato (80).

¹⁰Nder danygol Uzziyel boo: Amminadabu, ardiiɗo maɓɓe e banndiraaɓe muuɗum, ɓe teemerre e sappo e ɗiɗo (112).

¹¹Daawuda ewni Cadok e Abiyatar, liman'en e Lewi'en Uriyel e Asaya e Yo'el e Sema'ya e Eliyel e Amminadabu.

¹²O wi'i ɓe: “Onon on baaba-ci'e'en Lewi'en. Cene ko'e mooɗon, onon e banndiraaɓe mooɗon. Nden ngartire sundukru Jawmiraawo Allah Isra'iila haa nokkuure nde mi taaskitinani ndu.

¹³Naane, on ngondaayno bee amin. Jawmiraawo tikkani min, ukkani min sarru, ngam min kakkilanaay ko o umruno min.”

¹⁴Liman'en e Lewi'en ceni ko'e muuɗum'en ngam ɓe njaha hoo'oygo sundukru Jawmiraawo Allah Isra'iila.

¹⁵Nden Lewi'en woɗɓe efti sundukru Allah bee cabbi maaru dow balbe muuɗum'en, ndoondi ndu, bana Muusa umruno ɓe fodde koŋngol Jawmiraawo.

¹⁶Daawuda umri ardiiɓe Lewi'en, ɓe ndarna banndiraaɓe maɓɓe yimooɓe bee kuuje gimruɗe: Moolooji e garayaaji e koŋsiije iidooje, haa ɓe ngima bee sawtu e bee seyo.

¹⁷Lewi'en go ndarni Heman ɓii Yo'el e Asaf ɓii Berekiya banndiiko. Nder banndiraaɓe maɓɓe yimɓe Meraari, ɓe ndarni Etan ɓii Kusaya.

¹⁸Non boo banndiraaɓe maɓɓe daayiiɓe: Zekariya e Ben e Ya'ajiyel e Semiramot e Yehiyel e Unni e Eliyabu e Benaya e Ma'aseya e Matitiya e Elifelehu e Mikineya e Obet-Edoom e Ye'iyel, ɓe aynooɓe dammuɗe.

¹⁹Heman e Asaf e Etan, yimooɓe, piyi koŋsiije njamndi mboɗeeri iidooje.

²⁰Zekariya e Ajiyel e Semiramot e Yehiyel e Unni e Eliyabu e Ma'aseya e Benaya piyi moolooji fodde daande “alamot”[17].

²¹Matitiya e Elifelehu e Mikineya e Obet-Edoom e Ye'iyel e Azaziya piyi garayaaji bee laawol bi'eteeŋgol Seminit, ngam ɗowugo gimi.

²²Kenaniya, ardiiɗo Lewi'en, cuklaniiɗo gimi. O ekkitini ɓe yimugo, ngam o annduɗo gimi.

²³Berekiya e Elkaana ngoni aynooɓe dammugal suudu sundukru.

²⁴Sebaniya e Yosafat e Netaneyel e Amasay e Zekariya e Benaya e Eli'ezer, liman'en, kamɓe ɓe puufi algaytaaji yeeso sundukru Allah. Obet-Edoom e Yehiya, kamɓe boo ɓe aynooɓe dammugal suudu sundukru.

²⁵Daawuda e ndotti'en Isra'iila e ardiiɓe dow honooɓe ujineere njehi, ngam hoo'oygo sundukru alkawal Jawmiraawo bee seyo haa saare Obet-Edoom.

²⁶Bee ballal Allah, Lewi'en roondooɓe sundukru alkawal Jawmiraawo kirsani Allah ga'i kalhali joweeɗiɗi e jawɗi be'i joweeɗiɗi.

²⁷Daawuda ɗon ɓorni ngapaleewol ɗigguŋgol daneewol. Bana non boo Lewi'en roondooɓe sundukru fuu e yimooɓe e Kenaniya, ardiiɗo gimi. Daawuda ɗon ɓorni boo toggoore limanku.

²⁸Bana non, Isra'iila'en fuu ɗofti sundukru alkawal Jawmiraawo bee hoolo seyo e hoolo luwe e algaytaaji e koŋsiije iidooje, ɓe piyi moolooji e garayaaji bee semmbe.

²⁹Nde sundukru alkawal Jawmiraawo ɗon nasta Berniwol Daawuda, Mikal ɓii Sawulu debbo laari gal wurdere suudu. O yi'i laamiiɗo Daawuda ɗon wama, ɗon welwelta. Ngam man Mikal yawi mo.