Read Fulfulded 1 Habaruuji Nyalaaɗe 16 Bible Online

1 Habaruuji Nyalaaɗe 16 - Fulfulded bible

1 Habaruuji Nyalaaɗe 16

¹Ɓaawo man, ɓe nastini sundukru nder suudu laymaaru ndu Daawuda darnino ngam maaru. Nden ɓe lii'ani Allah guleteeɗi e kirseteeɗi ngam kawtal maɓɓe bee Allah.

²Nde Daawuda timmini lii'aago guleteeɗi e kirseteeɗi man, o barkiɗini ummaatoore bee innde Jawmiraawo.

³Nden o yeɗi Isra'iila'en, worɓe e rewɓe fuu, koo moy maɓɓe tamseere e dibinooje joorɗe tamaaɗe e inabooje joorɗe tamaaɗe.

⁴Daawuda darni Lewi'en woɗɓe yeeso sundukru Jawmiraawo ngam teddingo e yettugo e maŋgtugo Allah Isra'iila.

⁵Ndaa inɗe maɓɓe: Asaf woni hooreejo e Zekariya, o ɗiɗaɓo, nden Ye'iyel e Semiramot e Yehiyel e Matitiya e Eliyabu e Benaya e Obet-Edoom e Ye'iyel, ɓe fuu ɓe fiyooɓe garayaaji e moolooji, Asaf boo o piyoowo koŋsiije iidooje.

⁶Benaya e Yahajiyel, liman'en, ngoni fuufooɓe. Foroy ɓe ɗon puufa algaytaaji yeeso sundukru alkawal Allah.

⁷Nyalaade man Daawuda fuɗɗi darnugo Asaf bee Lewi'en woɗɓe ngam yettugo Jawmiraawo:

⁸Ngette Jawmiraawo, maŋgte innde maako, anndine kuuɗe maako nder ummaatooje.

⁹Ngime, ngimane mo maŋgtoore, ngeyne kaayeefiiji ɗi o waɗi fuu.

¹⁰Ceyore innde maako seniinde, ceye, onon ɗowtaniiɓe Jawmiraawo.

¹¹Ngaylite heedi Jawmiraawo, tore baawɗe maako, ɗakkotire bee maako koo ndey fuu.

¹²Ciftore kuuɗe maako kayniiɗe e kiitaaji maako,

¹³onon asŋgol Isra'iila jaggiiɗo maako, onon danygol Yaakubu, cuɓaaɗo maako.

¹⁴Kaŋko woni Jawmiraawo Allah men, o kiitoowo duniyaaru fuu.

¹⁵Ciftore alkawal maako foroy e ko o umri haa gide ujineere.

¹⁶Ɗum alkawal maako bee Ibrahiima e hunayeere maako haa Isiyaaku.

¹⁷Jawmiraawo haɓɓi alkawal duumiiŋgal bee Isra'iila, ngal tabitinaama bana umroore ngam Yaakubu.

¹⁸O wi'i: “Mi hokkete lesdi Kanaana, ndi laatoto maral ma.”

¹⁹Saa'i man on ɗuuɗaayno tawon, on jananɓe nder lesdi.

²⁰Kaakiraaɓe mooɗon ngiili diga lesdi haa lesdi, diga laamu haa laamu.

²¹Allah accaay koo moy torra ɓe, o feli laamiiɓe ngam daliila maɓɓe.

²²O wi'i: “Taa meeme moytaaɓe am, taa naawne annabi'en am.”

²³Ngimane Jawmiraawo, onon yimɓe duniyaaru fuu, ngaazine habaru kisndam maako foroy.

²⁴Anndine tedduŋgal maako caka ummaatooje, ngecce jama'aaje fuu kaayeefiiji maako.

²⁵Ngam Jawmiraawo o mawɗo, o maŋgteteeɗo masin, o kulniiɗo ɓurɗo ɗowanteeɓe fuu.

²⁶Ngam ɗowanteeɓe jama'aaje fuu ɗum labbi meere, ammaa Jawmiraawo tagi asamanji.

²⁷Yeeso maako ɗon waŋgina maŋngu e daraja, baawɗe e seyo ɗon haa o woni.

²⁸Onon ummaatooje duniyaaru, maŋgte Jawmiraawo, maŋgte tedduŋgal maako e baawɗe maako.

²⁹Teddine innde maako, ngaddane mo dokke, ngare yeeso maako, cujidane mo saa'i o waŋginta senaare maako.

³⁰Ndiwne yeeso maako, onon yimɓe duniyaaru fuu. Kaŋko o tabitini duniyaaru, ndu dimmbataako.

³¹Asama seyo, lesdi boo welwelta! Maatine ummaatooje fuu: “Jawmiraawo woni laamiiɗo.”

³²Mbeela e ko woni nder maaga fuu koola. Gese e ko woni dow maaje fuu ceyo.

³³Koo leɗɗe nder laynde boo ngimana Jawmiraawo bee seyo. O ɗon wara ngam hiitanaago yimɓe duniyaaru.

³⁴Ngette Jawmiraawo, ngam o booɗɗo, mbooɗeeŋga maako ɗon haa abada.

³⁵Mbi'e: “Hisnu min, yaa Jawmiraawo, kisnoowo min, wurtin min caka heefeerɓe, hooru min, ngam haa min maŋgta innde ma seniinde, min ceyoro yettugo ma.”

³⁶Maŋgtoore e yettoore laatano Jawmiraawo Allah Isra'iila foroy haa abada. Yimɓe fuu mbi'i: “Aamiina!” Ɓe maŋgti Jawmiraawo.

³⁷Daawuda acci Asaf e banndiraaɓe muuɗum ɓe njooɗo yeeso sundukru alkawal Jawmiraawo ngam huuwugo kuugal maɓɓe foroy, fodde umroore nyalaade fuu.

³⁸O acci boo Obet-Edoom e banndiraaɓe muuɗum cappanɗe njoweego e njoweetato. Non boo Obet-Edoom ɓii Yedutuun e Hosa ngam aynugo dammuɗe.

³⁹Ammaa Cadok limanjo e banndiraaɓe muuɗum liman'en, Daawuda acci ɓe yeeso jooɗorde Jawmiraawo haa nokkuure townde haa Gibiyon,

⁴⁰ngam lii'anaago Jawmiraawo guleteeɗi dow hirsirde, fajiri e kiikiiɗe fuu, fodde ko Jawmiraawo umri Isra'iila nder tawreeta fuu.

⁴¹Heman e Yedutuun e suɓaaɓe woɗɓe, ewnaaɓe innde innde, ngondi bee maɓɓe haa ɓe ngetta Jawmiraawo ngam mbooɗeeŋga muuɗum ɗon haa abada.

⁴²Heman e Yedutuun ngoodi boo algaytaaji e koŋsiije iidooje e kuuje gimruɗe feere ngam yimango Allah. Ɓiɓɓe Yedutuun ɗon ton ngam aynugo dammugal.

⁴³Nden yimɓe kooti, koo moy haa saare mum. Daawuda boo hooti ngam barkiɗingo saare muuɗum.