Read Fulfulded 1 Habaruuji Nyalaaɗe 17 Bible Online

1 Habaruuji Nyalaaɗe 17 - Fulfulded bible

1 Habaruuji Nyalaaɗe 17

¹Nyannde feere nde Daawuda ɗon jooɗi haa saare mum, o wi'i annabi Natan: “Ndaa, min mi ɗon jooɗi nder suudu leɗɗe cemmbiɗɗe, ammaa sundukru alkawal Jawmiraawo ɗon jooɗi les godooje.”

²Natan jaabi Daawuda: “Waɗ ko ɓernde ma numi fuu, ngam Allah ɗon wondi bee ma.”

³Ammaa jemmaare man Allah wolwani Natan, wi'i:

⁴“Yah, wi' jaggiiɗo am Daawuda, ndaa nii Jawmiraawo wi'i: An a nyiɓantaa yam suudu haa mi jooɗa ton.

⁵Mi meeɗaay jooɗaago nder suudu, diga nyannde nde ngurtinmi Isra'iila'en Misra haa hannde. Ammaa mi waanci diga laymaaru ndu'u haa nduya, diga jooɗorde nde'e haa ndeya.

⁶Koo toy njahmi caka Isra'iila'en fuu, kadi mi meeɗi siŋkango koo gooto nder alkaali'en ɓe umrumi ɗowugo yimɓe am Isra'iila'en bee wi'ugo: Koni on nyiɓanaay yam suudu leɗɗe cemmbiɗɗe na?

⁷Jonta sey a wi'a jaggiiɗo am Daawuda: Ndaa nii Jawmiraawo honooɓe asama wi'i: Mi hoo'i ma haa waalde, haa ɓaawo dammooji, ngam a laato ardiiɗo yimɓe am Isra'iila'en.

⁸Mi wondi bee ma koo toy njahɗaa fuu, mi halki konne'en ma. Mi waɗante innde bana inɗe mawɓe haa duniyaaru.

⁹Mi suɓani yimɓe am Isra'iila'en nokkuure joonde, mi hokkan ɓe lesdi ngam haa ɓe njooɗo nder maari bee jam. Halluɓe meetataa ɓillugo ɓe bana ɓooyma.

¹⁰Ɗum laati bana nii diga wakkati alkaali'en laamani yimɓe am Isra'iila'en. Mi toskinan konne'en ma fuu. Mi hokkete danygol boo.

¹¹To a maayi, a hawtoyi bee kaakiraaɓe ma, mi jo'inan gooto nder danygol ma, waato gooto nder ɓiɓɓe ma dow leeso laamu ma, mi tabitina laamu maako.

¹²Kaŋko o nyiɓantam suudu, min boo mi tabitinan leeso laamu maako haa foroy.

¹³Mi laatoto baaba maako, kaŋko boo o laatoto ɓiɗɗo am. Mi ittantaa mo mbooɗeeŋga am bana no ittumi nga aartuɗo ma.

¹⁴Mi tabitinan mo nder suudu am e nder laamu am haa foroy, leeso laamu maako tabitan haa foroy.”

¹⁵Natan yecci Daawuda bolle ɗe'e e wahayu oo fuu.

¹⁶Nden laamiiɗo Daawuda nasti suudu laymaaru, jooɗi yeeso Jawmiraawo, wi'i: “Yaa Jawmiraawo Allah, mi moy e ɗume woni saare am haa njottinɗa min haa ɗo?

¹⁷Kanjum ɗum pamarum haa yeeso ma, yaa Allah! A wolwi haala danygol maccuɗo ma nder zamanuuji garanɗi. Yaa Jawmiraawo Allah, a laari yam bana goɗɗo tedduɗo.

¹⁸Ɗume mbaawanmi wi'go dow tedduŋgal ngal ndokkuɗa maccuɗo ma? An a anndi maccuɗo ma.

¹⁹Yaa Jawmiraawo, a huuwani maccuɗo ma kuugal maŋngal nga'al fodde anniya ma ngam hollugo kuuɗe ma mawɗe fuu.

²⁰Yaa Jawmiraawo, walaa mo nanndi bee maaɗa, an feere ma woni Allah, fodde ko min nani bee noppi amin fuu.

²¹Walaa ummaatoore feere haa duniyaaru bana yimɓe ma Isra'iila'en. An sootti ɓe ngam haa ɓe laato yimɓe ma. A waɗani hoore ma innde bee huuwugo kuuje mawɗe, kulniiɗe. A rimɗini ɓe diga lesdi Misra, a riiwi ummaatooje yeeso maɓɓe.

²²A laatini yimɓe ma Isra'iila'en ummaatoore ma haa foroy, yaa Jawmiraawo, an boo, a laati Allah maɓɓe.

²³Ammaa jonta, yaa Jawmiraawo, tabitin wolde ma nde mbolwanɗa maccuɗo ma e danygol mum haa foroy.

²⁴Tabitin nde ngam haa innde ma ɓaŋgo haa abada, haa yimɓe mbi'a: Jawmiraawo honooɓe asama, kaŋko woni Allah Isra'iila. Tabitin danygol maccuɗo ma Daawuda boo.

²⁵Ngam an, yaa Allah am, mi hulaay toraago ma, ngam a anndini yam a hokkatam danygol.

²⁶Yaa Jawmiraawo, an woni Allah, an a iinani yam hayru man.

²⁷Jonta, a yerdi barkiɗingo danygol am, ngam haa ngol tabita haa yeeso maaɗa foroy. Ngam an, yaa Jawmiraawo, a barkiɗini ngol, non ngol heɓi barka haa foroy.”