Read Fulfulded 1 Habaruuji Nyalaaɗe 28 Bible Online

1 Habaruuji Nyalaaɗe 28 - Fulfulded bible

1 Habaruuji Nyalaaɗe 28

¹Daawuda mooɓti mawɓe Isra'iila fuu haa Urusaliima: Baaba-ci'e'en e hoore'en geɓe huuwanooɓe laamiiɗo e ardiiɓe dow honooɓe ujineere e ardiiɓe dow honooɓe teemerre e aynooɓe marle e dabbaaji e ɓikkoy laamiiɗo e saraaki'en e suusɓe e marɓe daraja fuu.

²Laamiiɗo Daawuda dari, wi'i: “Naneeɗam, onon deerɗiraaɓe am e ummaatoore am! Mi anniyino nyiɓugo suudu siwtordu ngam sundukru alkawal Jawmiraawo e ngam jooɗorde Allah meeɗen. Mi taaskani nyiɓugo.

³Ammaa Allah wi'i yam: An a nyiɓataa suudu ngam innde am, ngam a waɗi konuuji ɗuuɗɗi, a rufi ƴiiƴam.

⁴Jawmiraawo Allah Isra'iila suɓi yam nder saare baaba am haa mi laato laamiiɗo Isra'iila haa foroy, o suɓi Yahuuda ngam haa o laato ardiiɗo, nder danygol Yahuuda boo o suɓi saare baaba am. Caka ɓiɓɓe baaba am boo, ɗum fottani mo o waɗammi laamiiɗo dow Isra'iila fuu.

⁵Jawmiraawo hokki yam ɓiɓɓe ɗuuɗɓe. Caka maɓɓe o suɓi ɓiyam Suleymaanu haa o jooɗo dow leeso laamu Jawmiraawo, dow Isra'iila.

⁶Jawmiraawo wi'i yam: Ɓiya Suleymaanu nyiɓan suudu am e babe am. Ngam mi suɓi mo o laato ɓiɗɗo am, min boo mi laato baaba maako.

⁷Mi tabitinan laamu maako haa foroy, to o tiinake ɗowtanaago umrooje am e kiitaaji am bana hannde boo.

⁸Ngam maajum yeeso Isra'iila, jama'aare Jawmiraawo e yeeso Allah meeɗen, linye umrooje Jawmiraawo Allah mooɗon, ɗowtane ɗe haa on mara lesdi mboondi ndi'i, on marna ndi ɓiɓɓe mooɗon boo haa foroy.

⁹An boo, ɓiyam Suleymaanu, teddin Allah baaba maaɗa, jaggana mo bee ɓernde laaɓnde e nafsu ma fuu. Ngam Jawmiraawo ɗon linya ɓerɗe fuu o anndi anniyaaji e numooji. To a waylitake heedi maako, o waŋgante. Ammaa to a acci mo, o wudinte haa foroy.

¹⁰Hakkil jonta, ngam Jawmiraawo suɓi ma nyiɓana ɗum haykaliiru seniindu. Sey a semmbiɗa, a naŋnga kuugal.”

¹¹Nden Daawuda hokki Suleymaanu suura zawleeru haykaliiru e cuuɗi maaru e cigorɗi maaru e cuuɗi dowji e geɓe haa nder haykaliiru e suudu jooɗordu ngam kefergal.

¹²O tinndini mo boo kuuje ɗe numooji maako anndini mo fuu: Haala babe haa haykaliiru Jawmiraawo e cigorɗi taarotooɗi ndu e ndesaaje kuuje cenaaɗe

¹³e haala geɓe liman'en e Lewi'en e kuuɗe nder haykaliiru Jawmiraawo fuu e kuuje ngam kuugal nder maaru fuu

¹⁴e haala teddeeŋga kaŋŋeeri, ngam kuuje koo ɗeye nder kuugal koo ngale e haala teddeeŋga cardi ngam kuuje koo ɗeye nder kuugal koo ngale

¹⁵e teddeeŋga kaŋŋeeri ngam jo'inirɗe kaŋŋeeri e pittirlaaji maaji ɗum kaŋŋeeri, fodde teddeeŋga ngam jo'inirɗum fuu bee pittirlaaji muuɗum. Non boo teddeeŋga ngam jo'inirɗe cardi, fodde teddeeŋga ngam jo'inirɗum e pittirlaaji muuɗum, fodde kuuwtinirki jo'inirɗum pittirlaaji fuu nder kuugal.

¹⁶Non boo teddeeŋga kaŋŋeeri ngam taabe tamseeje jo'inteeɗe e teddeeŋga cardi ngam taabe cardi.

¹⁷Non boo haala tufirɗe e taasaaje e paalon kaŋŋeeri laaɓndi e njardukoy kaŋŋeeri e cardi, fodde teddeeŋga jardugel koo ngele fuu

¹⁸e haala gulduɗum uurle kaŋŋeeri laaɓndi bee teddeeŋga muuɗum e suura moota pucci bee nga keruba'en kaŋŋeeri weeɗanɓe bileeji muuɗum'en, suddanɓe sundukru alkawal Jawmiraawo.

¹⁹Nden Daawuda wi'i: “Haala ka'a winndaama dow ɗereewol ngol Jawmiraawo hokki yam. Ngol faamtini yam kuuɗe gonɗe haa suura man fuu.”

²⁰Nden Daawuda wi'i ɓiyum Suleymaanu: “Sey a semmbiɗa, a laato cuusɗo, a naŋnga kuugal. Taa hul, taa tampu sam, ngam Allah Jawmiraawo, Allah am wondan bee maaɗa. O accataa ma, o wudintaa ma, haa kuugal nder haykaliiru Jawmiraawo fuu timma.

²¹Ndaa geɓe liman'en e Lewi'en ngam kuugal nder haykaliiru Jawmiraawo fuu. Marɓe anniya mbooɗka fuu e marɓe anndal fuu ngam huuwugo kuugal koo ngale ɗon ngondi bee maaɗa, non boo mawɓe e yimɓe fuu, ɓe ɗowtanto umrooje ma.”