Read Fulfulded 1 Habaruuji Nyalaaɗe 29 Bible Online

1 Habaruuji Nyalaaɗe 29 - Fulfulded bible

1 Habaruuji Nyalaaɗe 29

¹Fahin laamiiɗo Daawuda wolwani jama'aare fuu, wi'i: “Ɓiyam Suleymaanu mo Allah suɓi ɗum kanyum tan, o derkeejo mo walaa kirseeku tawon. Ammaa kuugal mawni masin, ngam laamorde nde laatataako ngam yimɓe, ammaa ngam Allah Jawmiraawo.

²Bee baawɗe am fuu taaskitinmi kuuje ngam haykaliiru Allah am: Kaŋŋeeri ngam kuuje kaŋŋeeri e cardi ngam kuuje cardi e njamndi mboɗeeri ngam kuuje njamndi mboɗeeri e njamndi ɓaleeri ngam kuuje njamndi ɓaleeri e leɗɗe ngam kuuje leɗɗe e kaa'e onikis e kaa'e ngam jaagnugo e kaa'e ɓaleeje e ɗe noone feere feere e kaa'e marɗe saman e kaa'e daneeje ɗuuɗɗe masin.

³Ko ɓuri ɗum, goɗɗum kaŋŋeeri e cardi ndi marmi, mi hokkan ndi ngam haykaliiru Allah am, ngam mi seyorake ndu. Mi ɓesdan ɗum haa ko taaskitinmi ngam haykaliiru seniindu:

⁴Kaŋŋeeri diga Ofir baakin kilo ujine cappanɗe joweenayi (90.000) e cardi laaɓndi baakin kilo ujine teemeɗɗe ɗiɗi e ujine sappo (210.000). Sey ɓe kuuwtinira ɗum ngam ɓasugo mahdi nder cuuɗi haykaliiru fuu,

⁵ngam huuwugo kuuje kaŋŋeeri e cardi e ngam kuuɗe fawne ɗe waɗooɓe sanaa'a mbaɗata. Kadi moy haa mooɗon yerdake hokkugo caahu ngam Jawmiraawo jonta bee anniya ɓernde mum?”

⁶Baaba-ci'e'en e ardiiɓe le'i e ardiiɓe dow honooɓe ujineere e ardiiɓe dow honooɓe teemerre e mawɓe dow kuuɗe laamiiɗo, ɓe fuu ɓe ngerdi hokkugo caahuuji.

⁷Ɓe ndokki ngam kuugal nder haykaliiru Allah kaŋŋeeri baakin kilo ujine teemerre e cappanɗe jowi (150.000) e ceede kaŋŋeeri ujine sappo (10.000) e cardi baakin kilo ujine teemeɗɗe tati (300.000) e njamndi mboɗeeri baakin kilo ujine teemeɗɗe jowi e cappanɗe nayi (540.000) e njamndi ɓaleeri baakin kilo miliyoŋje tati (3.000.000).

⁸Marɓe kaa'e ɗuuɗa-samanje boo, ndokki ɗe nder ndesaari haykaliiru Jawmiraawo haa juŋngo Yehiyel, goɗɗo lenyol Gersom.

⁹Yimɓe ceyori caahu mawɓe, ngam ɓe ndokki Jawmiraawo bee seyo e ɓernde woore. Laamiiɗo Daawuda boo seyi masin.

¹⁰Nden Daawuda yetti Jawmiraawo yeeso jama'aare fuu, wi'i: “Yaa Jawmiraawo, Allah kaaka amin Isra'iila, yettoore laatano ma foroy haa abada.

¹¹Yaa Jawmiraawo, an mari maŋngu e baawɗe e tedduŋgal e daraja e ɗelko, ngam an mari ko woni nder asama e lesdi fuu. Yaa Jawmiraawo, an mari laamu, a ɓaŋiiɗo dow koo ɗume fuu.

¹²Jeynitaare e tedduŋgal iwi haa maaɗa, an a ɗon laamano koo ɗume fuu. Haa maaɗa baawɗe e semmbe ngoni. Mawningo goɗɗo boo, haa maaɗa ɗum iwata.

¹³Jonta kam, yaa Allah amin, min ngetti ma, min ɗon maŋgta innde ma teddunde.

¹⁴Min mi moy, ɗume yimɓe am, haa min mbaawa hokkugo caahu bee seyo bana non? Kuuje fuu iwi haa maaɗa, ko min ndokki ma, kanjum boo wari diga juŋngo maaɗa.

¹⁵Ngam min yiilotooɓe yeeso maaɗa, min jananɓe nder lesdi, bana kaakiraaɓe amin fuu. Balɗe amin haa duniyaaru ɗon bana ɗowdi non, walaa tammunde juttingo ɗe.

¹⁶Yaa Allah Jawmiraawo amin, kuuje ɗuuɗɗe ɗe min taaskitini haa min nyiɓa suudu ngam innde ma seniinde, ɗe iwi haa maaɗa, ngam an mari koo ɗume fuu.

¹⁷Yaa Allah am, mi anndi a linyoowo ɓernde, a ɗon seyoro gooŋgaaku. Ndaa mi hokki caahuuji ɗi fuu bee gooŋgaaku ɓernde am. Jonta ngi'mi bee seyo no yimɓe am tawaaɓe ɗo ngerdi, ndokki ma dokke muuɗum'en.

¹⁸Yaa Allah Jawmiraawo kaakiraaɓe amin Ibrahiima e Isiyaaku e Isra'iila, tabitin anniyaaji e numooji bana ɗi'i nder ɓerɗe yimɓe ma haa foroy, huucitin ɓerɗe maɓɓe dow maaɗa.

¹⁹Ɓiyam Suleymaanu boo, hokku ɗum ɓernde laaɓnde haa o ɗowtano umrooje ma e seedamkuuji ma e farillaaji ma, haa o nyiɓa boo laamorde nde taaskitinmi.”

²⁰Nden Daawuda wi'i yimɓe jama'aare fuu: “Ngette Jawmiraawo, Allah mooɗon!” Ɓe fuu ɓe ngetti Allah Jawmiraawo kaakiraaɓe maɓɓe, ɓe turi, ɓe cujidi yeeso Jawmiraawo e yeeso laamiiɗo.

²¹Jaŋngo man ɓe lii'ani Jawmiraawo kirsaaɗi e guleteeɗi: Ga'i kalhali ujineere e jawɗi ujineere e njawkoy ujineere, bee dokke dufeteeɗe maaji e kirsaaɗi ɗuuɗɗi ngam Isra'iila fuu.

²²Nyalaade man ɓe nyaami, ɓe njari, ɓe ceyi yeeso Jawmiraawo. Ɓe laamini Suleymaanu ɓii Daawuda fahin, ɓe moyti mo, o laamiiɗo ngam Jawmiraawo, ɓe moyti Cadok boo o limanjo.

²³Suleymaanu jooɗi haa leeso laamu Jawmiraawo, o laamiiɗo haa pellel baaba maako Daawuda. O heɓi hayru, Isra'iila fuu ɗowtani mo.

²⁴Mawɓe e suusɓe e ɓiɓɓe laamiiɗo Daawuda fuu ɗowtani laamiiɗo Suleymaanu.

²⁵Jawmiraawo mawnini Suleymaanu yeeso Isra'iila masin, o hokki mo daraja laamiiɗo ko ɓuri laamiiɓe Isra'iila aartuɓe mo.

²⁶Bana nii Daawuda ɓii Yessa laamori dow Isra'iila fuu.

²⁷O laamani Isra'iila duuɓi cappanɗe nayi: Duuɓi joweeɗiɗi o laami haa Heburuun, duuɓi cappanɗe tati e tati boo o laami haa Urusaliima.

²⁸O maayi bee ndottaaku mbooɗŋgu, o kaarɗo balɗe e risku e maŋngu. Ɓiyiiko Suleymaanu laami haa pellel maako.

²⁹Haala Daawuda, fuɗɗoode maaka e timmoode maaka, winndaama nder Habaruuji Samuyila, Gi'oowo e nder Habaruuji Annabi Natan e nder Habaruuji Gada, Gi'oowo.

³⁰Defte ɗe'e tinndini haala laamu maako e baawɗe maako e ko saali nder ngeendam maako e nder Isra'iila e laamuuji lesɗe fuu.