Read Fulfulded 2 Habaruuji Nyalaaɗe 1 Bible Online

2 Habaruuji Nyalaaɗe 1 - Fulfulded bible

2 Habaruuji Nyalaaɗe 1

¹Suleymaanu ɓii Daawuda tabitini laamu muuɗum. Allah Jawmiraawo wondi bee maako, mawnini maŋngu maako masin.

²Suleymaanu hawti yimɓe Isra'iila fuu, ardiiɓe dow honooɓe ujineere e ardiiɓe dow honooɓe teemerre e hiitooɓe e ardiiɓe Isra'iila fuu, waato baaba-ci'e'en fuu.

³Nden ɓe njehi haa nokkuure townde haa Gibiyon, Suleymaanu e jama'aare fuu. Laymaaru fottirde Allah ndu Muusa jaggiiɗo Jawmiraawo waɗno ɗum nder ladde ɗon ton.

⁴Ammaa sundukru alkawal Allah, Daawuda yahruno ndu diga Kiriyat-Ye'arim haa Urusaliima haa nokkuure nde o taaskanino ndu. O darnuno suudu laymaaru ngam maaru ton.

⁵Hirsirde njamndi mboɗeeri nde Becaleel ɓii Uuri ɓii Huuru waɗno ɗum, ɗon dari haa Gibiyon yeeso jooɗorde Jawmiraawo. Suleymaanu e jama'aare fuu njehi ton ngam ƴamugo Jawmiraawo.

⁶Suleymaanu wa'i dow hirsirde man, lii'ani Jawmiraawo guleteeɗi ujineere.

⁷Jemma man Allah waŋgani Suleymaanu, wi'i mo: “Tora ko ngiɗɗa fuu, mi hokkete!”

⁸Suleymaanu jaabi mo: “A woonani baaba am Daawuda bee mbooɗeeŋga ɗuuɗŋga, a laamini yam haa pellel maako boo.

⁹Yaa Jawmiraawo Allah, tabitin wolde nde mbi'ɗa baaba am Daawuda, ngam a laamini yam dow ummaatoore ɗuuɗnde bana njaareendi.

¹⁰Hokkam hikma e hakkiilo ngam ɗowugo yimɓe ɓe'e. Ngam moy foti laamanaago ummaatoore ma ɗuuɗnde nde'e?”

¹¹Allah wi'i Suleymaanu: “Nde a torake ɗu'um, a toraaki risku e jawdi e tedduŋgal malla mbaraneego wanyɓe ma malla juutal balɗe, ammaa a tori hikma e hakkiilo ngam laamanaago yimɓe am ɓe mbaɗmaami a laamiiɗo muuɗum'en,

¹²ngam man a heɓan hikma e hakkiilo. Mi hokkete risku e jawdi e tedduŋgal boo, ɗum laamiiɓe aartuɓe ma meeɗaay heɓugo, ɓaawo maaɗa boo, walaa keɓanɗo ɗum.”

¹³Nden Suleymaanu ummi haa laymaaru fottirde dow nokkuure townde haa Gibiyon, warti Urusaliima, fuɗɗi laamanaago Isra'iila.

¹⁴Suleymaanu mooɓti mootaaji pucci konu e pucci. Ɗum waɗi mootaaji ujineere e teemeɗɗe nayi (1.400) e pucci ujine sappo e ɗiɗi (12.000). Nden o jo'ini goɗɗi nder berniiji cigorɗi maaji, goɗɗi boo haa Urusaliima, haa kommbi maako.

¹⁵O ɗuɗɗini cardi e kaŋŋeeri haa Urusaliima bana kaa'e, o ɗuɗɗini leɗɗe cemmbiɗɗe boo bana dundeeje haa lesdi towndiije.

¹⁶Ɓe ngaddani Suleymaanu pucci diga Misra e Kuwe, filooɓe laamiiɗo keɓoyi ɗi haa Kuwe bee saman coggu.

¹⁷Haa Misra ɓe njehi, ɓe coodoyi mootaaji pucci, ngoota fuu baakin ceede cardi teemeɗɗe joweego (600), pucci boo, ngootu fuu baakin teemerre e cappanɗe jowi (150). Ɓe coodani boo laamiiɓe Heti'en fuu e laamiiɓe Siriya boo.

¹⁸Suleymaanu waɗi anniya nyiɓugo suudu ngam teddingo innde Jawmiraawo e suudu laamu ngam hoore mum.