Read Fulfulded 2 Habaruuji Nyalaaɗe 10 Bible Online

2 Habaruuji Nyalaaɗe 10 - Fulfulded bible

2 Habaruuji Nyalaaɗe 10

¹Robo'am yehi Sikem, ngam Isra'iila'en fuu mooɓti haa Sikem ngam laamingo mo.

²Yerobo'am ɓii Nebat ɗonno haa Misra, ngam o doggino laamiiɗo Suleymaanu. Nde o nani haala mooɓturu maajum, o warti diga Misra.

³Ɓe neli ewnoyaago mo, o wari, kaŋko bee Isra'iila fuu. Ɓe mbolwani Robo'am:

⁴“Baaba ma saatini kaɓɓirgal dow amin. Ammaa an, hoynu kuuɗe baaba ma caatuɗe e kaɓɓirgal maako tedduŋgal nga'al dow amin, nden kam min kuuwante.”

⁵O jaabi ɓe: “Munye nyalɗe tati, nden lorte haa am.” Yimɓe ndilli.

⁶Nden laamiiɗo Robo'am ƴami sawari haa ndotti'en jagganiiɓe baaba muuɗum Suleymaanu, nde o ɗonno bee yoŋki. O ƴami ɓe: “Ɗume mi jaaboto yimɓe ɓe'e? Mbi'eeɗam.”

⁷Ndotti'en mbi'i mo: “To a woonani yimɓe hannde, to a waɗi ko ɓe ƴami, to a wolwani ɓe bolle belɗe, nden kam ɓe mboonante foroy.”

⁸Ammaa Robo'am wudini sawari ndotti'en. O yehi o sarwotiri bee sukaaɓe ɓe o mawnidi, jagganiiɓe mo.

⁹O wi'i ɓe: “Ɗume mi jaaboto yimɓe ɓe mbi'i mi hoyna kaɓɓirgal ngal baaba am yowani ɓe? Ko mbi'ɗon?”

¹⁰Sukaaɓe ɓe o mawnidi mbi'i mo: “Ndaa ko mbi'ata ɓe: Cimatel am ɓuri haddorde baaba am loorugo.

¹¹Baaba am yowani on doŋgle tedduɗe, min mi ɓesdanan on doŋgle ɓurɗe teddugo. Baaba am elti on bee ɓoccol, ammaa min mi eltan on bee ngabbuwol.”

¹²Nyannde tataɓre, Yerobo'am e ummaatoore fuu lorti haa laamiiɗo Robo'am, bana o wi'no ɓe.

¹³Laamiiɗo wolwani ɓe bee caatal. O wudini sawari ndotti'en,

¹⁴o jaabi fodde sawari sukaaɓe. O wi'i: “Mi yowanan on doŋgle tedduɗe, mi ɓesdanan on doŋgle man boo. Baaba am elti on bee ɓoccol, ammaa min mi eltan on bee ngabbuwol.”

¹⁵Bana non laamiiɗo sali jaɓugo ko ummaatoore ƴami mo, Allah wayliti haala man non ngam gooŋɗingo iinawol muuɗum ngol o iinani Yerobo'am ɓii Nebat bee hunnduko Ahiya Siloojo.

¹⁶Nde Isra'iila'en paami laamiiɗo sali nanugo ɓe, ɓe fuu ɓe neldi mo jaawaabu: “En ngalaa geɗal haa saare Daawuda! En ngalaa maral haa ɓii Yessa. Isra'iila'en, sey koo moy fuu hoota! E an goɗɗo saare Daawuda, suklu bee laamu ma.”

¹⁷Isra'iila'en fuu kooti. Ammaa Robo'am laamani Isra'iila'en jooɗiiɓe nder berniiji Yahuuda.

¹⁸Nden laamiiɗo Robo'am neli Hadoram, kaliifaajo kuuɗe dooleeje. Ammaa Isra'iila'en piɗi mo bee kaa'e, o maayi. Bee daker laamiiɗo Robo'am wa'i moota pucci mum, doggi haa Urusaliima.

¹⁹Bana nii Isra'iila tuurtirani saare Daawuda, haa wargo hannde.