Read Fulfulded 2 Habaruuji Nyalaaɗe 11 Bible Online

2 Habaruuji Nyalaaɗe 11 - Fulfulded bible

2 Habaruuji Nyalaaɗe 11

¹Robo'am boo wari Urusaliima. O mooɓti le'i Yahuuda e Benyamin, honooɓe suɓaaɓe ujine teemerre e cappanɗe njoweetato (180.000), ngam haɓugo bee Isra'iila, ngam wartirgo laamu haa Robo'am.

²Ammaa Jawmiraawo wolwani Sema'ya goɗɗo Allah, o wi'i:

³“Wi' Robo'am ɓii Suleymaanu, laamiiɗo Yahuuda e Isra'iila'en nder le'i Yahuuda e Benyamin fuu:

⁴Ndaa nii Jawmiraawo wi'i: Taa njehe haɓugo bee banndiraaɓe mon. Koo moy loro haa saare mum, ngam huunde nde'e iwi haa am.” Ɓe nani wolde Jawmiraawo, ɓe kooti, ɓe njahaay haɓugo bee Yerobo'am.

⁵Robo'am jooɗi haa Urusaliima. O semmbiɗini berniiji Yahuuda:

⁶Baytilaama e Etam e Teko'a

⁷e Bayti-Cura e Soko e Adullam

⁸e Gaat e Maresa e Zif

⁹e Adorayim e Lakis e Azeka

¹⁰e Cor'a e Ayyalon e Heburuun, ɗi fuu ɗi berniiji cemmbiɗɗi nder lesdi Yahuuda e Benyamin.

¹¹O semmbiɗini ɗi, o jo'ini ardiiɓe nder maaji, o sigi nyaamdu e nebbam e inaboojam ton,

¹²non boo bawarɗe[15] mawɗe e labbe nder berniiji ɗi'i fuu. O semmbiɗini ɗi masin. Kaŋko mari Yahuuda e Benyamin.

¹³Liman'en e Lewi'en wonɓe nder Isra'iila fuu, kawtani Robo'am diga nokkuuje muuɗum'en.

¹⁴Lewi'en acci durduɗe muuɗum'en e mare muuɗum'en, ngari haa lesdi Yahuuda e haa Urusaliima, ngam Yerobo'am bee ɓikkoy muuɗum ngurtini ɓe kuugal limanku yeeso Jawmiraawo.

¹⁵Yerobo'am suɓi worɓe woɗɓe, waɗi ɓe liman'en haa nokkuuje towɗe e ngam suuraaji jawɗi e nga'oy[16] koy o waɗno.

¹⁶Woɗɓe iwɓe le'i Isra'iila fuu, ɗowtantooɓe Jawmiraawo Allah Isra'iila bee ɓernde woore, tokki Lewi'en go haa Urusaliima, ngam haa ɓe lii'ano Jawmiraawo Allah kaakiraaɓe maɓɓe kirseteeɗi.

¹⁷Ɓe cemmbiɗini laamu Yahuuda, ɓe tabitini Robo'am ɓii Suleymaanu duuɓi tati. Bana nii, duuɓi tati ɓe tokki laawol Daawuda e Suleymaanu.

¹⁸Robo'am te'i Mahalat ɓii Yerimot ɓii Daawuda. Innde daada Mahalat, Abihayil ɓii Eliyabu ɓii Yessa.

¹⁹Mahalat danyani Robo'am ɓiɓɓe worɓe ɓe'e: Ye'us e Semariya e Zaham.

²⁰Ɓaawoɗon o te'i Ma'aka ɓii Absalom. Kaŋko o danyani mo Abiya e Attay e Ziza e Selomit.

²¹Robo'am ɓuri yiɗugo Ma'aka dow rewɓe mum e sulaaɓe mum fuu. O woodi rewɓe sappo e njoweetato e sulaaɓe cappanɗe njoweego. O danyi ɓiɓɓe worɓe noogas e njoweetato e ɓiɓɓe rewɓe cappanɗe njoweego.

²²O waɗi Abiya ɓii Ma'aka hooreejo, ardiiɗo deerɗum'en, ngam o tammi ronnugo mo laamu.

²³Robo'am o kakkilɗo, o sennditi ɓiɓɓe maako worɓe, o halfini ɓe berniiji cemmbiɗɗi fuu nder lesdi Yahuuda e Benyamin fuu. O hokki ɓe nyaamdu ɗuuɗndu, o te'ani ɓe rewɓe ɗuuɗɓe boo.